January tukverha sum thehchhuak nasa Premier League club-te
January ni 31, Thawhlehni zan zanlaiah January transfer window an khar a, deadline day-a thil thleng leh thlasik insuan hun laia transfer thlirkual teh ang.
Kumin hian British transfer record kan hmu a, January transfer window a tawp rualin Premier League club-te chuan 2022-23 season-ah player sengluhna atan pound vaibelchhe 2.8 an seng tling a, hei hi British transfer record thar a ni.
Chelsea chuan Benfica atanga Argentina midfielder Enzo Fernandez leina’n pound maktaduai 107 (121m euro) an thehchhuak a, he sum chevel nena belhkhawmin tun January thla liamtaa English top-flight club-te transfer sum hman chu pound maktaduai 815 a tling a, hei hi Premier League bik record a ni nghal bawk.
Deadline day bik Thawhlehnia English club-te sum hman zat chuan pound maktaduai 275 a pel a, kum 2018-a January record (£150m) an lo siam tawh tum ai khan kumin hian 83% zetin deadline day bika an sum hman hi a tam zawk a ni.
Deadline day bika tihfelte
Transfer khar dawn hnaih tak taka Chelsea-in Fernandez an sengluh chuan ‘headline’ a luah ta a; Blues hian kum 2021-a Manchester City-in Jack Grealish mana pound maktaduai 100 an sen kha khumin kum 22 mi World Cup winner mana an sum sen hmangin British transfer record thar an siam.
Tottenham chuan tun season la bang zawng atan Sporting Lisbon atanga loan-a full-back Pedro Porro an sengluh thu puangin, an mit a tlung a nih chuan euro maktaduai 45 (£40m)-a lei theihna an bilh tel; hetih lai hian defender pahnih Matt Doherty (permanent) leh Djed Spence (loan)-te chu chhuah phalna an pe thung.
Premier League hmahruaitu Arsenal pawhin an squad sawhnghet turin Italy midfielder Jorginho chu Chelsea atangin pound maktaduai 12-in an senglut a; palina luahtu Manchester United pawh thlasik insuan hun tawp ni deadline day-ah an awm mai mai bik lo a, loan-in Austrian midfielder Marcel Sabitzer chu Bayern Munich atangin an hruailut ve bawk.
Southampton chuan an club record (£22m)-in Ghana winger Kamaldeen Sulemana bakah Nigeria striker Paul Onuachu an lei.
Bournemouth pawhin Ukraine centre-back Illia Zabarnyi chu pound maktaduai 24 vel niawma ngaihin an lei a, Ivory Coast midfielder Hamed Traore pawh loan-in an lalut phawt a, nipui insuan huna pound maktaduai 20 vela lei thei turin inremna an ziak nghal.
Top flight-a kaisang dang Nottingham Forest chu thlasik insuan hun laia buai pawl zingah telin, Atletico Madrid Brazilian defender Felipe leh Newcastle midfielder Jonjo Shelvey an leina man puanzar a ni lo a; Paris St-Germain goalkeeper Keylor Navas chu loan-in an senglut thung.
Leicester City chuan Stoke City atanga defender Harry Souttar an leina sum chu pound maktaduai 20 kai chho turin inremna an ziahpui a; Crystal Palace-in France youth international Naouirou Ahamada chu Stuttgart atangin pound maktaduai 9.7 (11m euros)-in an tifel ve hman bawk.
Deadline day-a rin loh taka Premier League chhuahsan hraw zingah loan-a Bayern Munich lama kal ta Manchester City full-back Joao Cancelo telin, season tawpah hian Bavarian-in a ngeta kawl zui an duh dawn chuan nakum nipui thawt hunah euro maktaduai 70 (£61.5m)-in an lei thei ang.
January window-a transfer lian zualte
Tarlan tawh angin, Chelsea tana khel tura Fernandez chetna sum a hraw zual a; Blues hian January thlatir lam khan pound maktaduai 89 tehrengin Ukraine forward kum 22 mi Mykhailo Mudryk chu Shakhtar Donetsk atangin an lo lei tawh bawk.
Big-movers Chelsea hi Premier League Transfer Deadline Day-a an chet na piah lamah squad tichak turin an chechhuak nasa a, Graham Potter tan pawh team siksawi kawngh ngaihtuahna thar sen nual a tul mai thei. Nikum May thlaa American investor Todd Boehly kaihhruai company intelkhawm pawl (consortium)-in pound vaibelchhe 4.25 senga west London team an lei hnuah Blues hian player thar leina’n sum an seng hnem tawh hle a,
Tun January thla chhung ringawt pawh hian player pariat manah pound maktaduai 300 an sengral leh a, an mithar sengluhte chu – Mudryk, Malo Gusto (£30.7m), Benoit Badiashile (£35m), Noni Madueke (£30.7m), Andrey Santos (£18m) leh David Datro Fofana (£8m-£10m)-te an ni.
Atletico Madrid atanga Stamford Bridge-a loan-a kum 23 mi Portugal forward Joao Felix an hruailuhna manah euro maktaduai 11 (£9.7m) an seng.
Nikum nipui insuan hun lai khan Chelsa hian Premier League record (£270m) siamin, kum 2019-a nipui transfer laia club mal sum seng hnem ber Real Madrid (£292m) dawttu an ni pha.
Tun January thlaa Premier League club-te sum hman zawng zawng atanga 37% kha Chelsea sum chevel a tling pha hial a ni!
Morocco forward Hakim Ziyech chu deadline day khan Chelsea atanga PSG lama insawn tura ngaih a nih laiin ruahmanna a tlawlh a, player pawh hian Paris atangin thil fel hun tur a lo nghak hman a, mahse, a hun taka document theh-luh hman a nih loh avangin Lionel Messi team-mate thar a ni hman ta lo a ni.
Deadline day-a Jorginho an tihfel hmain Arsenal chuan Brighton atangin Belgium striker Leandro Trossard chu pound maktaduai 21 baka la pung chho thei turin inremna an ziahpui a; Serie A side Spezia hnenah Jakub Kiwior man atan euro maktaduai 20 (£17.6m) an chhunglut bawk.
Kum 23 mi Netherlands forward Cody Gakpo an leina manah Liverpool chuan Dutch club PSV Eindhoven-ah euro maktaduai 40-50 (£35.4m-£44.3m) pek an remti a, a zat chiah hi tarlan a ni lo.
Newcastle United-in Everton atanga kum 21-a upa Anthony Gordon an leina man chu pound maktaduai 45 vel nia hriat a ni.
Premier League-a a chanve hnuai lam luahtu ve bawk Leeds United pawh sum hmang tam pawlah telin, Hoffenheim atanga French forward Georginio Rutter an lakluhna man euro maktaduai 40 (£36m) chu an club record a ni.
Bournemouth pawhin Burkina Faso winger Dango Ouattara chu Lorient atangin pound maktaduai 20 velin an lei a; Leicester pawhin defender Victor Kristiansen manah pound maktaduai 17 an thehchhuak.
West Ham lama Danny Ings an hralhna mana pound maktaduai 15 rut Aston Villa chuan Colombian rawlthar striker Jhon Duran leina manah Chicago Fire chu pound maktaduai 18 an pe.