World Cup 2026 khelhah Thawhtan zan khan Brazil leh Japan ten last 16 luh an inchuh a. NRG Stadium, Taxas a inkhel hmuhnawm takah Brazil in 2-1 a Japan lehthalin lasr 16 an lut.
Last 32 kal kawng
Football a ram hmasawn tak Japan hi Asia khawmual atanga World Cup khel tur zawnnaah an chetha viau a, khelh 10 atangin vawi 7 an chak a, draw vawi hnih an neih bakah vawi khat an tlawm. An khingpuite lakah goal 30 zet an thun laiin goal thum chauh an chhuah a, an chetha hle. Inelna thlengtu USA, Canada leh Mexico ni lo zingah Japan hi World Cup 2026 khel tura tling hmasa ber an ni.
World Cup 2026-ah Group F-ah awmin, Netherlands nen an inhnehtawk phawt a. Tunisia an hneh hnuin Sweden nen an inhnehtawk zui leh a, pahnihna ni chungin last 32 an lut.
Football ram ropui, World Cup-ah vawi nga champion tawha champion ngun ber ni mek Brazil hi South America khawmual (CONMEBOL) atanga World Cup khel tur zawnnaah an chetha lem lo viau. Khelh 18 atangin vawi 8 an chak a, draw vawi 4 an neih bakah tlawm zawkah vawi ruk ngawt an tang bawk. CONMEBOL-ah pangana ni chungin World Cup khel turin an tling.
World Cup 2026-ah Group C-ah an awm a, Morocco nen an inhnehtawk hnuin Haiti leh Scotland an hneh zawn a, Group champion niin last 32 an inhlangkai. An khelh hmasak berah buai deuh mah se an insiamtha a, an khel tha deuh deuh zel.
An inkhel ta
Japan head coach Hajime Moriyasu-a’n a hman thiam sa 3-4-2-1 formation hmangin a player te a rem a. Mid-bloc – Quick Transition chu a innghahna pui ber a ni. Japan hian phui takin an tlarhnung an rem a, an khingpuiten ball chang tamin, nawr viau pawh ni se pawi an ti lo. Hun remchang an neih ve leh nawr thut a, goal thun tumin hun remchang an zawng. Inkhel tir lamah ball chang tlem viau mah se an tumah an hlawhtling a, an nghah ruk rauh rauh nghakchhuakin an khingpuite an nawr lut thut a. Fuh taka a khalh tlang hnuin Kaishu Sano chuan lei hrulah fuh zetin a pet goal a, minute 29-naah hmahruaina goal a thun.
Si an phurh hnuin Brazil in na takin an khingpuite an nawr a, ball chang tam viau mah se Japan tlarhnung inrem phui tak an thiat thei lova, goal thun theihna hun remchang an hmu thei lo. Forward tlan chak leh ball thiam Vinicius Junior te meuh pawh Japan ral lian hmaah awm ze neiin an khelchhuak hleithei meuh lo. Ball chang tlem zawk ni bawk mah se Japan hi chawlhlawk hmaa chungnung zawk an ni.
Ancelotti a che, danglamna a thlen
Brazil in chawlhlawk an hmang tangkai a, manager fing leh tawnhriat nghah Carlo Ancelotti-a’n mi bik a nihna a lantir a, chawlhlawk hnu lamah a thiam thil lantirin danglamna nasa tak a thlen a, goal hnih thunin Japan an lehthal ta hial a ni.
Ancelotti hian Japan game a hrechiang a,an inkhel chu midfield batlle a ni lo tih hrechiangin midfielder Lucas Paqueta a la chhuak a, forward tlan chak Endrick a luhtir. Endrick a luh hnuin 4-3-3 formation chu 4-2-4 formation in an thlak danglam a, striker pahnih hmangin Japan an nawr. Striker pahnih hmanga an nawr vangin Japan an buai a, an bet leh zual. Mid-Block hmang a, quick transition hmang thiam Japan chuan loh theih lohin low-block an hman a ngai a, an beh tak em vangin awmze neiin an khingpuite an nawr let hleithei ta meuh lova, Sakei a ngho phawisak ang deuh mai an ni tawh.
Ancelotti hian formation a tih danglam bakah Groun ball in awmzia a awm tam loh vangin ball kang a vawrh luh tir nasa a, khelh dan phung a thlak danglam hlawk bawk. Ball kang an vawrh lut nasa hi pumraw lian bik lo Japan lakah an chhawr tangkai a, goal an thun phah ta hial nghe nghe. Arsenal defender Gabriel Mangalheas ball vawrh luh tha tak chu midfielder Casemiro chuan fuh zetin a tauh goal a, minute 56-naah an si phurh a sut.
1-1 a nih hnuin inkhel a hmuhnawm chhunzwm viau a, goal thun tumin an innawr tawn nasa hle. Hun pangngai tawp thlengin goal lut a awm belh thei lova, hun pek belh tir lamah pawh goal a luh belh thei chuang lo. Extra-time an khel ngei tura ngaih a nih laiin Brazil an chefuh a, goal an thun. Buai deuh nuaih nuaih karah vengtu nei lo Gabriel Martinelli chuan ball tha tak a hmu a. A hun leh hmun dika awm Martinelli hian minute 90+5-ah hma an hruai letna goal a thun.
Mit khap kar lek an inthlah dah a, an marking that loh vanga goal chhuah Japan hian hun tlem la awmah an si phurh sut tumin thapui thawh bawk mah se Japan in goal an thun thei tawh lova, Brazil lakah uiawm taka tlawmin World Cup 2026-a an zin kawng an zawh tawp. Football ram ropui Brazil lakah hnehna chang zo lo mah se Japan in football a hma an sawnzia khawvel hriatah an pho lang. Hajime Moriyasu hnuaiah Japan hian hma an sawn viau a, World Cup 2022 khan Spain leh Germany an hneh. 2026-ah pawh Netherlands leh Brazil te nen pawh an intiattawk ta viau a. Hei hian football a hma an sawnzia a tilang chiang hle.
Japan hnehtu Brazil hian Norway leh Ivory Coast te inkhela chak zawk zawk last 16-ah an hmachhawn zui leh ang.
Japan ral lian tudaitu Brazil
