Tokyo khaw Korakuen Hall-a boxing inelnaah thluak nghawr chhe pha hliam (brain injury) ve ve avangin Japanese boxer pahnihin karliamta khan nunna an chan!
August ni 2 inhnekah Yoji Saito chuan kum 28 mi Hiromasa Urakawa a knockout a, he mi tuma Urakawa lua hliam hi enkawl a nih hnuah karliamta Inrinni khan a thihpui ta a; a hma ni chiah Zirtawpni khan August ni 2 inhneka hliam tuar ve bawk Japanese boxer dang Shigetoshi Kotari pawh a lo thi tawh bawk a ni!
Both boxer pahnihte hi Korakuen Hall-a an inhnek tum khan an vanduai a, an thluak leh luruh inkarah thi a tling ve ve a, chu chu medical tawngkamin ‘subdural haematoma’ tih a ni a; doctor-te’n an nunna chhan tumin an zai ve ve a, an hlawhchham ta a ni!
World Boxing Organisation (WBO) chuan thuchhuah siamin Japanese boxer pahnih Hiromasa Urakawa leh Shigetoshi Kotari-te thihna chu pawi an tih thu leh an chhungte bakah an thiante ve ve leh Japanese boxing community pumpui an tawrhpui thu an tarlang.
August ni 2 inhnek zawh khan Japan Boxing Commission (JBC) pawhin an kalphung tidanglam zui nghalin, Oriental and Pacific Boxing Federation (OPBF) title bout zawng zawng chu round 12 khel tawh loin round 10 thleng chauh khelh a nih tawh tur thu an puang.
Japanese media report hrang hranga a lan danin, JBC hian an boxer pahnih thihna chungchang hi an chhui nghal a, he thihna chungchang sawiho tur hian September thlaah meeting pawimawh a ko nghal.
Urakawa thihna kha kumin bika boxer level sang chin (high-profile boxer) thi pathumna niin, kumin February thla khan Belfast khawpuia a inhnek tuma a hliam avangin Irishman John Cooney chuan a nunna a lo chan tawh bawk a ni.
Kum 28-a upa Cooney pawh khan Welshman Nathan Howells nen an inhnekna lamah head injury (intracranial haemorrhage) a nei a, a thihpui ve tho a ni.
Japanese boxer pahnih an thi!
