Shah Rukh Khan channa Bollywood film an tlangzarh thar ‘Jawan’ chuan opening weekend-ah khawvel huapin cheng vaibelchhe 500 a lalut nghal thei a, a channa film dang kumtir lama an tlangzarh ‘Pathaan’ khan khawvel huapin cheng vaibelchhe 1,055 a lalut tawh bawk a, tihian Shah Rukh Khan India actor zinga kum khata cheng vaibelchhe 500 chin lalut thei film pakhat aia tam nei thei awm chhun a ni ta a ni.
Shah Rukh Khan leh Nayanthara te channa ‘Jawan’ hi Ningani kaltaa tlangzarh kha niin, Hindi bakah Tamil leh Telegu version a awm bawk a, a ni khatnaah India-ah ringawt cinema hall ticket hralhna atangin cheng vaibelchhe 65.5 lalutin, Zirtawpni-ah vaibelchhe 53.23 leh Inrinni-ah vaibelchhe 77.83 lalut lehin, Pathianniah cheng vaibelchhe 81 a lalut leh a, ni li chhungin India-ah cheng vaibelchhe 287 a lalut nghal der mai a ni.
He film hian ticket hralh tamah pawh record a siam a, Pathianni bikah khan India-a he film puala cinema hall ticket an hralh zawng zawng chu 28,75,961 a tling a, Bollywood film tan chuan ni khat thil thuah India-a cinema hall ticket hralh hnem ber a la ni.
Pathaan pawh kha a che tha hle a, India-ah opening weekend-ah cheng vaibelchhe 280.75 a lalut thei a, hei hi ‘Jawan’ hian vaibelchhe 7 dawnin a rawn khum ta a ni.
Jawan film-ah hian SRKleh Nayanthara te bakah Deepika Padukone pawh a inlan zuai a, Vijay Sethupathi chu misual lemah a chang a, Sunil Grover, Sanya Malhotra, Ridhi Dogra, Priyamani, Ashlesha Thakur, Sanjeeta Bhattacharya, Girija Oak, Lehar Khan leh Aaliyah Qureishi te pawh an inlan.
Action-thriller ‘Jawan’ film hi Atlee direct niin, hmeichhe rual khat te puihnaah mipakhatin khawtlang siamthat a tum dan vel tarlanna a ni a, SRK hi double role anga inlanin. Nayanthara chu police, SRK character tukdawl tura thuhmu lemah a chang ve thung.
‘Jawan’-in vbc 500 lalut nghal
