Daily Newspaper

Jeje-a’n Chennaiying chhuahsan

12

India footballer hriathlawh Jeje Lalpekhlua chuan kum ruk zet a lo chamchilh tawh Chennaiying FC a chhuahsan a, a club thar tur puanchhuah theih a nih thuai beisei a ni.

India forward tha, goal thun thei tak Jeje Lalpekhlua hian nimin khan kum ruk zet nuamti taka hun a lo hman tawhna Chennaiying FC a chhuahsan thu hi a puang a. Chennaiying tan game dang la khelh duh viau mahse a rem tawh loh thu a sawi. Chennaiying FC a chhuahsan tur leh a club thar tur chungchang Post Sport in a zawhna chu chona thar hmachhawn turin Chennaiying chhuahsan a nih thu a sawi a. A club thar tur chungchangah chuan indawrna a kal mek a, club thar a neih thu puanchhuah a nih thuai theih a beisei thu a sawi. India footballer hriathlawh leh hlawhtling, boruak nei lian tak a nih vangin a club thar tur hi an te thei dawn lova, a contract pawh a mawm tham viau tura ngaih a ni.

Hnahthial tlangval Jeje-a hian kum 2015 khan Mohun Bagan atangin Chennaiying FC hi a zawm. Khatihlai khan ISL leh I League khelh kawp theih a la nih vangin ISL khelh zawhah loan in a club hlui Mohun Bagan a zawm leh mai thin. ISL leh I League khelh kawp theih a nih tak loh vangin Chennai khawpuiah a inbeng bel a, hmun dang pan lovin a khel ta char char. Chennaiying FC tan hian ISL-ah vawi 59 a khel a, goal 19 a thun. Inelna hrang hrangah vawi 69 khel in, goal 23 a thun thung. ISL-ah player langsar ber pawl a ni thin a, kum 2015 leh 2017-18 ah te khan Chennaiyin FC hi Indian Super League-ah a champion pui nghe nghe. Chennaiying tan tha taka a khelh lai hian hliamin a tlakbuak a, a hliam zai a nih zui leh tak zel vangin 2019-20 season-ah a inlan thei lo tluan a, hun hreawm tak a hmang.

India tan vawi 56 khel a, goal 23 zet thun tawhtu Jeje-a chuan a club hlui nita Chennaiyin FC hnenah lawmthu a sawi a, club thuneitute leh enkawltute zawng zawng chungah lawmthu a sawi in, tun dinhmuna a din theihna chhan chu Chennaiyin FC-ah thlawpna tha tak a dawn vang a nih thu a sawi bawk.

“A hmasa berin Chennaiyin FC club thuneitute leh thawktute zawng zawng chungah lawmthu ka sawi a, anni min thlawpna tha em em mai hi theihnghilh theih a ni lo ang. He club hian Indian Super League huang min daitir ve a, vawiinah hian hetiang dinhmuna ka din theih chhan chu Chennaiyin FC vang liau liau hi a ni,” a ti bawk.

A sawi zelnaah, “Vita Dani leh Abhishek Bachchan te min thlawpna hi ka theihnghilh ngai lo ang a. Season ruk chhungin chet that chang leh chet chhiat chang a awm fo a, eng boruak pawh tawng ila anni hian min thlawp reng thin a. He team hi trophy vawi hnih ka lakpui ve hman avangin ka lawm tak zet a ni. He club enkawltu manager lo ni tawh zawng zawng chungah lawmthu ka sawi a, an kaihhruaina hnuaia ka khelh ve theih avangin ka lawm a. Chennaiyin FC tan hian match dang la khelh theih pawh ka chak a, a rem tawh si lo. In mangtha hi thil harsa tak a ni a. Helai hmuna kum ruk chhung zet zinkawng ka zawh laia min enkawlna zawng zawng avang khan lawmthu ka sawi a ni,” tiin kum 29 mi Jeje-a chuan a club hlui chunga a lawmna bakah thlakna thu a sawi.

Tarlan tawh angin Jeje-a hian ngaihventu a ngei nghal neuh a, a club thar tur chungchangah indawrna a kal mek a. A club thar tur hi puanchhuah thuai a nih theih a beiseiawm.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy