Daily Newspaper

Jeremy Lalrinnunga an chawimawi

14

Youth Olympic Games a India aiawha Gold medal la hmasa ber Jeremy Lalrinnunga, rit chawi chak chu vawiin tlai khan Mizoram Weightlifting Association in Aizawl Ramhlun Sports Complex a weightlifting Hall ah an chawimawi a, a hlawhtlinna te an lawmpui bawk.

Jeremy hi mipa kg 67 huangah Youth Men world record kawltu a ni mek a, nikum December thla khan Doha ah youth men world record a siam a, snatch leh clean and jerk ah kg 306 a rit a chawi a ni. Asian Youth bakah Commonwealth Youth leh Junior ah record kawl mektu (holder) a ni bawk a, India youth, junior leh senior thlengin Kg 67 huang a Record kawl mektu a ni bawk.

Kum 2011 a Mizoram sorkar hmalakna catch them young atanga bultan Jeremy hian Pune Army Boys a zawm hnuin National leh international ah a che tha zel a. Tunah chuan India sorkarin India infiammite a enkawl bik Target Olympic podium scheme (TOPS) zinga a dah leh a enkawl fal bik a ni. Infiamna thawmhnaw siamtu lian Adidas ah kum 2022 thleng contract a nei mek a ni.

Kum 2020 Olympic Games chu hripui leng avanga thulh a ni a, nakum lamah Olympics hi kalpui beisei a ni a, Jeremy hian qualifying kalkawng hautak zet zet a paltlang tluk a ni tawh a. Weightlifting coach Malsawma Khiangte, Jeremy a zirtir tantu chuan “Asian quota in Olympics ah a qualify tawh a, nakum lamah hian a chance a tha zawk dawn mahin kan hria, kumina Olympics an thulh hi a tan malsawmna a nih zawk kan beisei,” a ti.

Kum 2002 a piang, Pu Lalneihtluanga leh Pi Lalmuanpuii te fapa, Jeremy Lalrinnunga chawimawina hunah hian Mizoram state sports council Secretary Pu John Tanpuia chu khuallian a ni a. Mizoram Weightlifting Association chuan chawimawina thilpek an hlan a ni.

Jeremy Lalrinnunga chuan “Tokyo Olympics an sawn hla hi ka tan malsawmna a nih ka beisei a, training ka neih tam phah dawn a ni,” a ti a, Mizoram sorkar in a ngaihsak avangin lawmthu a sawi bawk.

Weightlifting chu infiamna har tak a ni tih sawiin, tei rei peihna leh mahni invawn a pawimawh hle tih a sawi bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy