Israel National Security Minister Itamar Ben-Gvir chuan Jerusalem-a al-Aqsa Mosque compound tlawhin a tawngtai a, Middle East-a hmun inchuh nasat ber hmuna kum tam tak thil kalpui dan tur an lo ruahman tawh a bawhchhia.
Thlalak leh video-ah chuan Ben-Gvir-a hian compound chhunga Juda tawngtai a hruai a, he hmun hi Judaten Temple Mount tia an sawi, an luah chin East Jerusalem-a awm a ni.
He hmun hi Judaten an tlawh thei a, an tawngtai erawh phalsak an ni lo.
Israeli prime minister pisa chuan thuchhuah siam nghalin Israel-in inremna a lo neih tawh sa chu a la vawng reng a, Muslim-te chauhvin pathian an be thei tura thu dah chu an la vawng tih a tar lang.
He hmun enkawltu, Jordan chuan Ben-Gvir-a’n a tlawha a hun hman dan chu ‘boruak tisosang thei’ tiin an sawi.
Hamas chuan ‘kan Palestinian mipuite an nawrchep mek tizualkaitu’ tia sawiin Palestinian Authority President Mahmoud Abbas-a thupuangtu pawhin ‘tiam chin zawng zawng pel’ tiin a sawi bawk.
He hmun hi Bible-a temple pahnih dinna a nih avangin Judate hmun thianghlim ber a ni a. Muslim-te tan Prophet Muhammad-a vanram kaina hmun a nih avangin an hmun thianghlim ber pathumna a ni bawk.
Israel chuan 1967 Middle East indoah khan Jordan kut atangin a la a. A hnua inremna (status quo) an siamah Jordan hian hman lai hmun pawimawh a nih avangin enkawltu (custodian) nihna a la chang chhunzawm a, Israel-in a himna leh luhchhuahna lama thuneihna a chang thung.
Tun hnaiah Palestinian-te chuan Israel hian ruahmanna a siamah Juda tlawhtute tawngtaina hmang an awmin an dang ngai lo niin an lo sawi tawh thin.
He hmun enkawltu, Islamic endowment Waqf chuan Ben-Gvir-a rual hian Pathianni tuk khan Juda 1,250 rual a compound an lut niin an sawi.
Juda hnam chawivawng tumtu langsar, an rama police enkawltu. Ben-Gvir-a hi national security minister niin tun hmain a lo tlawh tawh thin a; mahse, langsar taka tawngtai erawh tun hi a vawi khat tihna niin Times of Israel chuan a tar lang.
Compound luta a fan kualnaah police officer-ten an veng nasa hle bawk.
A hmuna thu a sawi video darhah Ben-Gvir-a hian tun hnaia Hamas-in an mi hrente dinhmun an tihchhuahah an dinhmun a hniam hle a, hei hi Israel an nawrna nia sawiin chhuah turin a ti.
Minister hian Israel chu Gaza Strip pum luah tura tiin a cheng mek Palestinian-te chu ‘duhthua pem’ angah a chhuah.
Mi thiamte chuan he thil hi a thleng a nih chuan civil mi tam tak an baihvai ang a, indonaa dan bawhchhiatna pawh a thleng dawn niin an sawi.
Ben-Gvir-a hi UK chuan West Bank-a ‘Palestiniante laka tharum thawh tura mi a fuih’ avangin an hrek mek a ni.
Jerusalem hmun pawimawha Israeli minister tawngtaiin boruak tisosang
