Ek Bharat Shreshta Bharat hmalakna hnuaiah larsap Dr Hari Babu Kambhampati chuan Nilaini khan Durbar Hall Raj Bhavan-ah Jharkhand state leh Uttarakhand state Formation Day lawmna a buatsaih.
Uttarakhand hi 2000 November 9 khan Uttar Pradesh Reorganization Act 2000 hmangin Uttaranchal tia din a ni a. Uttar Pradesh state atangin then a ni. 2007 January 1 khan Uttaranchal chu Uttarakhand tia thlak a ni a, state a nih hmaa helai hmun sawina hming a pu ta a ni.
Jharkhand hi 2000 November 15 khan Bihar state chhimlam chanve emaw vel sahthlak atanga siam a ni a. Hemi ni hi Jharkhand tan chuan tribal hruaitu lar tak leh zalenna sualtu Birsa Munda pian champha phak a ni nghal bawk.
Larsap chuan he ni ah hian state pahnih mipui chu chibai bukin lawmpuina a hlan a. State pahnih a lo pian theihna atana theihtawp chhuahtute, hruaitu pawimawh tak takte leh khua leh tui mi tangkai takte zahna chibai a buk tih a sawia ni.
Tribal hruaitu huaisen leh ropui, zalenna sualtu ni bawk Birsa Munda leh tribal mite zinga zalenna sualtute zahna chibai bukin a chanchin tawi a sawi a. Birsa Munda huaisen zia leh zalenna atana a thawhhlawk zia, tribal freedom fighter-te chawimawina atan Birsa Munda piancham chu India sawrkarin Janjatiya Gaurav Divas atan kumtin hman tura a puan thute a sawi bawk.
Sawrkar laipui Ministry of Home Affairs-in state hrang hrangte Formation Day inhmanpuina tur program – Ek Bharat Sheshta Bharat hmalakna hnuaia a siam chu tha a tih thu sawiin, “Ram inpumkhatna atan leh state danga chengte nena inhmelhriatna tha a ni,” a ti.
Larsap hian Birsa Munda thlalak hmaah zahna lantirin pangpar a dah hnuah program tan a ni a. Hemi hnu hian Uttarakhand larsap leh Jharkhand larsap te thuchah ngaihthlak a ni. State pahnihte hlimthla video clip kaltlangin thlir a ni a. Hemi hnu hian thusawi ICFAI Mizoram vice chancellor Prof Bijay Singh leh state pahnih aiawhte hnen atangin ngaihthlak a ni.
Jharkhand leh Uttarakhand State din ni pual hun hmang
