1977 hla hit ‘Margaritaville’ satu Jimmy Buffett, kum 76, chuan September ni 1 khan khawvel a chhuahsan ta. A social media-a a thih thu an puannaah chuan, “Jimmy chuan September ni 1 zan khan thlamuang takin min kalsan ta a, a chhungte leh thiante, rimawi leh a ui ten an dawmhlum a ni. A thawk tawp thlengin a nun chu hla ang mai a ni a, sawithiam phak rual lohin kan ngai dawn a ni,” an ti. A thih chhan leh thildang chu an la puang lo.
Jimmy Buffett hian May ni 18 khan a website-ah tour neia Bahamas a kal chu a haw leh tawh thu leh, Boston-ah in-check-up nghalin, enkawl nghal vat ngai thil avanga damdawi in a luh thu a post a, “Kum upat hi pa deuh hrek hrawk lo tan chuan tih chi a ni lo. Hei hi ka tiam ang che u, perform tura ka dam leh hunah pawh She-Crab soup tamna lamah ka ti tawh ang,” a ti a, “Min tawngtai puina leh min hriatrengna te, ka tana in rinawmna te avangin ka lawm a, hei erawh lo chhinchhiah teh u, ‘A La Hun Lo Deuh’ Love to all JB” a ti bawk.
Jimmy Buffett a thi
