Jisoo leh Ahn Bo-hyun in-date
BLACKPINK member Jisoo, kum 28, leh actor Ahn Bo-hyun, kum 35, te chu an in-date tih an puang a, Bo-hyun-a thupuangtu chuan, “An pahnih hian an inkawm nel tan a ni,” a ti.
Jisoo leh Bo-hyun te hi Seoul khawpuiah an chhuak dun lai an hmu zeuh zeuh a, chuta tang chuan an in-date tih thawm a awm ta a, Bo-hyun thupuangtu chuan an inzui thu hi a nemnghet ta a, “Hlim takin lo thlir dun thei ula kan lawm ngawt ang,” a ti bawk.
BLACKPINK label YG Entertainment pawhin South Korean news agency Yonhap hnenah Jisoo leh Ahn Bo-hyun te inzui thu an nemnghet tawh bawk a ni.
Jisoo hi BLACKPINK member zinga ngaihzawng nei an puan chian awm chhun a la ni a, hetihrual hian Rose, Jennie leh Lisa te hmangaihna khawvel pawh a thawm a reh bik chuang lo a, Jennie phei hi chu BTS member ‘V’ nena inhaw vak lo angin thu a thang tawh bawk a nih kha.
Ahn Bo-hyun hi film leh TV show hrang hrangah a inlan nual tawh a, ani hi modeling atanga bul tan niin, Busan khawchhuak a ni a, 2014 atangin lemchan khawvelah a chuang lut a, K-drama ‘Itaewon Class’, “Yumi’s Cell,’ leh ‘Descendants of the Sun’-ah te pawh a lo chang tawh a ni.
Jisoo pawh hi BLACKPINK anga a chet chhuahna bakah lemchan lamah pawh a lo inhmang ve zeuh zeuh tawh a, TV series ‘Snowdrop’-ah pawh Jung Hae-in nen an chang dun tawh a ni. Tunah chuan BLACKPINK hian nikuma an album tlangzarh ‘Born Pink’ puala ‘Born Pink World Tour’ an neih mek chu an zo dawn hnai tawh a, he album hi Billboard 200 (albums) chart-ah pawh No.1 kaiin, an group tana he chart-a No.1 kai thei hmasa ber a ni a, he album-a hla ‘Pink Venom’ leh ‘Shut Down’ te chu Billboard Global 200 chart-ah No.1 an kai thei nghe nghe a ni.
Jisoo leh Ahn Bo-hyun in-date
