J&K-ah mi firfiak pahnih dang chep mek
Jammu & Kashmir-a Kishtwar district-ah venhim hna thawktute chuan Pathianni atang khan ram ngawah beihpui thlakin Hizbul Mujahideen firfiak pahnih an dang chep a, luh chhuahna zawng zawng an khar vek.
Pathianni zing hma tak atanga beihpui an thlakah hian nileng leh zan thlengin silai a puak deuh reng.
Indian Army White Knight Corps chuan sipaite hian thu an dawn bawhzuiin beihpui an thlak a, Pathianni khaw var tirhah heng laiah hian mi firfiak inbiakna an hre fuh a, an bawhzui ta niin X-ah a tar lang a. Silai a puak deuh reng a, an tawmna lai tak an la thlen theih loh avangin fimkhur takin an bei zui zel tih an tar lang bawk.
Thuneitute chuan zing dar 06.30 velah Bhagna ramngaw, Dool-ah mi firfiakte an awm tih hi an hre tan a, Rashtriya Rifles-in an um zuina pawh a kap hmasatu an nih thu an sawi.
Venhim hna thawktute hian an chhang let a, rei vak lo chhung chu an inkap tawn a, a hnuah ramhnuai ril zawkah firfiakte hi an tlan lut zui a, an um zui ta zel tih an sawi a ni.
Beihpui thlaknaah hian tual chhung police-a special operations group (SOG) leh CRPF ten an zui a, mi dangte pawh inchah belhin a chhehvela rinhlelhawm deuh hmunte chu luh chhuahna an dangchat vek a ni.
Mi an zawn mekte hi July thlaah pawh khan beih an ni tawh a; mahse, him ta hlauh nia hriat an ni a. Riyaz Ahmad leh Mudassar Hazari-a te nia hriat niin anmahni hi tual chhung mi an ni a, kum riat chhung heng lai district-ah hian firfiak zawngin an khawsa tawh niin an sawi.
Zing atanga venhim hna thawktuten beihpui an thlaknaah hian a khât tawka silai puak zeuh bakah inkahna lian deuh vawi hnih a thleng tawh a; mahse, a khawi lam ve ve-ah pawh thi leh hliam an awm hriat a ni rih lo.
July 20 khan venhim hna thawktuten Hadal Gal ramngaw, Cherji-a beihpui an thlaknaah Ahmad-a leh Hazari-a te hi an lo him tawh a ni.
J&K-ah mi firfiak pahnih dang chep mek
