Jammu and Kashmir Governor Satya Pal Malik chuan Pulwama a firfiakte chetna sawiin kum 2019 Lok Sabha inthlan kha ‘kan sipaite ruang’ chunga inbeihna a ni a, kha thil thleng kha chhui chianna awm se chuan khatih laia Home Minister kha bang tur a ni a ti.
Prime Minister Narendra Modi chu Pulwama beihna thlen veleh a hrilh hriat nghal thu sawiin PM Modi chuan ‘lo ngawi reng rih rawh’ min ti tiin a sawi bawk.
“Lok Sabha 2019 inthlan kha kan sipaite ruang chunga beih niin investigation neih a ni hek lo. Inquiry neih ni se chuan khatih laia Home Minister Rajnath Singh kha bang tur a ni. Officer tam tak te Lung Inah khungin an awm tur a nia sawisel a nasa khawp ang,” tiin Malik chuan a sawi a.
Malik hi Jammu and Kashmir \hen hrana Union Territory pahnih Ladakh leh Jammu and Kashmir a \hen a nih hmaa Governor a ni a.
Pulwama beihna kha February 14, 2019 ah a thleng a, khami ni tak khan Prime Minister chu Jim Corbett National Park ah shooting neiin hun a hmang a ti bawk a.
“A haw hnuah min rawn bia a. Kan sipaite an thi a, kan tihsual avanga thi an ni ka ti a. Ngawi turin min ti a ni” tiin Malik chuan a sawi bawk.
Malik hi tun hnaiah CBI te chuan Jammu and Kashmir Governor a nih lai August 23, 2018 leh October 30, 2019 inkara insurance scheme kaihhnawiha thama Rs 3000 crore pek tuma thlem a nih thu a sawi hnuah an chhui chiang mek bawk a.
Malik chuan Prime Minister Narendra Modi chu Adani issue chungchangah a bei bawk a. Adani chuan kum thum chhungin hausakna nasa takin a chhekkhawl tia sawiin tute nge Adani anga hun reilote chhunga a hausakna anga tipung thei awm tiin zawhna a siam bawk a.
Congress leader Rahul Gandhi an Parliament-ah Adani chuan Rs 20,000 crore a neih chu sorkar hnenah ‘khawi a\anga a neih nge?’ tiin a zawt a. “Prime Minister in a chhang thei lo. Ni hnih chhung thusawina a neihah chhanna pakhatmah a siam thei lo va, ka sawi zawk chu Adani pawisa vek a ni em tih a ni,” tiin Malik chuan a sawi bawk a.
“Chief Minister te an laksaka Adani hnenah an pe a, ani a lo sumdawnga ka pawisa a ni a ti mai a ni,” tiin Malik chuan a sawi bawk a.
“Goa a ka awm laiin khatih laia Chief Minister eirukna ka hriaa Prime Minister ka hrilh a, a chhanna chu Governor a\anga paih ka ni a, CM chuan a nihna a la chelh zui thung. Hei vang hian eirukna hi PM Modi hian a hriatpi veka a share a, a share zawng zawng chu Adani hnenah a lut vek,” tiin Malik chaun a sawi bawk.
Mipuite chu sorkar thlak turin a ngen zui a, “In vote tling leh a nih chuan vote thlakna hun in nei leh tawh lovang. In vote a phal zui tawh lovang a, inthlan apiangin ka chak a, eng vangin nge inthlana sum sen a ngaih ziah a ti ang,” tiin a sawi bawk.
J&K Governor hlui Malik-a’n PM Modi kap na
![](https://theaizawlpost.org/wp-content/uploads/tap_logo-min-large.jpg)