Daily Newspaper

Joe Biden lakluh ruahmanna kal zel

9

US President-elect Joe Biden leh Vice President-elect Kamala Harris te chuan US Capitol building pawnah lakluh an nih hunah rinawmna thutiam an nei dawn a, hei hi ruahmanna siamtu tena president lakluh inkhawm pangngai taka Covid-19 protocol zawm chung sia kalpui dan an zawn vang a ni.

Biden team te chuan January 20 a lakluh inkhawmna neih huna ruahmanna kimchang thenkhat an tichhuak a. Ruahmanna an siamah president kalchhuak mai tur Donald Trump erawh tel lo turah an dah phawt thung.

President Trump chuan tun thlengin Biden lakluh inkhawmna neihah a tel leh tel loh tur thu a la sawi duh rih lo a ni.

Mi tam tak te chuan Trump chuan lakluh inkhawmah a tel an ring lo va, thenkhat thung chuang tih thin danphung zawm duh hrim hrim vang pawhin a tel an rin thu an sawi thung a ni.

US-ah Covid-19 vaccine pekchhuah a ni tawh chungin mipui nawlpuiin an dawn theih hun tur chu a la hla hle rih dawn a, Biden team te chuan lakluh inkhawmah pawh amah thlawptute chu Washington DC a kal khawm lo turin ngenna an siam a ni.

President lakluhna chu mi tlemte te chauh sawma neih tur niin a hnua parade kalpui tur pawh siam danglam a nih tur thu Biden inaugural committee te chuan thuchhuah siamin an sawi.

Lakluh a nih hnuah Biden chuan thusawina nei zui nghalin virus leng karah a hmathlir te US mipuite hnena hrilh hriatna a nei zui dawn a ni.

Committee chuan Dr David Kessler, Food and Drug Administration commissioner hlui chu inauguration chief medical adviser atan an ruat bawk a.

Ram pumah pandemic-in vantlang hriselnaah nghawng a la nei nasa tia sawiin Kessler chuan, “Americans te chu president lakluh inkhawm pawh mahni chenna inah chhungkua, thian te nena him taka chhim zawk turin kan ngen a ni,” tiin a sawi.

Tihfel loh tam tak la awm thungin lakluh inkhawmna neih hnua Congress member te nena chawchhun ei te leh president kal chhuak tur nena pre-ceremony thingpui inho tur a nih leh nih loh te chu tihfel a la ni lo thung.

Pathianni khan Fox News tena an interview naah Biden lakluhnaah a tel dawn em tia an zawhna chu Trump chuan ‘Chutiang sawi ka duh lo’ tiin a chhang a ni.

Senate Majority Leader-in Biden pawm
US President Donald Trump’s Republican Party top member Senate Majority Leader Mitch McConnell chuan Joe Biden chu US President thlanna neihah chakna a chan avangin a lawmpuina a thawn.

Electoral College tena Trump lakah Biden-a’n chakna a chang tih an puan chian hnuah Senator McConnell chuan lawmpuina hi a thawn ni.

Democrat te chuan electoral college vote-ah 306 hmuin Trump chuan 232 a hmu a ni. Senate chu Republican tena an thunun a nih avangin Biden tan pawh Republican te nena inhmuhthatna chu pawimawh hle tura ngaih a ni.

McConnell chuan November 3 inthlanah ‘result dang zawk’ an beisei thu sawiin mahse electoral college ten an tihchian tak tawh thu sawiin “Hei vang hian President-elect Joe Biden ka lawmpui a ni,” tiin a sawi.

Biden running-mate Kamala Harris pawh lawmpuina thawnin, “American tin ten kan ramah a tum khat nan vice-president-elect hmeichhia kan nei hi kan lawm tur a ni,” tiin a sawi bawk.

Biden pawhin a hnuah McConnell chu phone-a biain lawmthu a hrilh thu sawiin an pahnihin inhmuh vat an tum thu a sawi bawk.

Harris pawhin McConnell lawmpuina chungchang sawiin, “Tun aia hmain min lawmpui se a ni tur a ni a. Mahse, min lawmpui tawh a, chu chu a pawimawh lai ber a ni. Hma lam pan ila, kan duhtlan te zawngin hma kan la ang,” tiin a sawi.

Senate Democratic Leader Chuck Schumer pawhin Trump chu a president term chu zahawm taka titawp tura ngenin, “Democracy avang talin, felfai taka thuneihna inhlanchhawn vang talin fel lo taka thil kalpui a ti tawp tur a ni a, Joe Biden kan president thar a ni tur hi pawm mai tur a ni,” tiin a sawi.

Hetihlai hian President Trump chuan Tweeter-ah finfiahna pe chuang si lovin vote tihchingpen nasa tak finfiahna a lo lut mek zel e, tiin a sawi thung.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy