Daily Newspaper

John Lalpeka’n Maruti Suzuki atangin Young Entrepreneur Award a dawng

20

Mizorama Maruti Suzuki dealer, GIG Motors neitu John Lalpeka chuan Maruti Suzuki atangin Young Entrepreneur Award a dawng a, he award hi East India-ah a dawng thei awm chhun a ni. Award hi Maruti Suzuki Managing Director leh CEO ni bawk Kenichi Ayukawa hnen atangin a dawng a ni.

Young Entrepreneur Award hi Maruti Suzuki-in an vawi khat sem chhuahna a ni a, East India atangin John Lalpeka hi a dawng thei awm chhun a ni. He award hi Maruti Suzuki second generation dealer-te puala an tih niin, sales leh management lama midangte entawn tlak leh chetha ni a company-in an hriat hnenah award hi hlan a ni.

Maruti Suzuki hi India-a lirthei siam lama company lian ber pawl a ni a, dealer pawh 2000 chuang an nei a, hetiang karah chawimawina a dawng thei hi lawmawm a tih thu John-a chuan a sawi a, “A award hlut dan hi kan hrethiam pha lo zawk mai thei. Ka award dawn tawh zawng zawnga ka lawm leh ngaihhlut ber a la ni,” a ti.

John Lalpeka hian Mizorama Maruti Suzuki dealership hi 2017 kum chawhnu lam atangin a kalpui tan ve chauh a, kum thum vel awrh chauh dealer a la ni nain, hetiang chawimawina dawng thei khawp hian a chetha a, “Company duhdan leh kalphung hi kan theih ang angin kan zawmin kan tipuitling ve thei thin a, kan performance atangin min teh te pawh a ni ang,” a ti bawk.

Award hi Australia khawpui Sydney-a dawng tur a ni a, mahse, COVID hripui leng avangin a tih theih ta lo va, company lamin virtual conference buatsaihin, chutah chuan award dawngtute hi an puang ta a ni. He award hi Maruti Suzuki dealer thangthar zawkte chophur nan leh infuih nana an tih a ni pakhat a, kum thum chhung lekah GIG Motors chu dealership dang tan pawha entawn thlakah an inhlangkai ta a ni.

Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy