Daily Newspaper

Jon Jones vs Brock Lesnar

11

Infiamna ngaihhlut hlawh leh hautak UFC huanga fight lian tham tak thleng thut thei a ni a. Palian huangah fighter hriat hlawh pahnih Jon Jones leh Brock Lesnar te intum turin chotuah mek an ni.

UFC president Dana White chuan Jon Jones leh Brock Lesnar te hian Octagon chhungah in-sual an duh ve ve a nih phawt chuan an insual na tur buatsaih turin a inhawng reng tih a sawi a, an hlawh pawh a chhe dawn lo viau niin a sawi hmuh zauh bawk. Anni pahnih hi an intawng thei a nih phawt chuan fight ngaihven hlawh tak a ni ngei dawn a, boruak an nei lian hle tura ngaih a ni.

Light-heavyweigh huanga fighter tha, fighter tha ber pawla ngaih Jon Jones hian palian huanga inlan tumin ngaihtuahna a seng a, palian huanga tha ber Stipe Miocic nen kawnghren inchuh turin sawirik a ni mek bawk. Stipe Miocic tan Jones hi hmachhawn chakawm tak a ni dawn a, an inhmachhawn a, a hneh a nih phei chuan palian huanga fighter tha leh ropui ber tia hriat a ni zui reng tawh ngei ang. Miocic nen chotuah an nih hma hian palian huanga fighter hriat hlawh, hnek na ber ang hiala ngaih Francis Ngannou nen inhmachhawn in, Mega fight’ hmachhawntir an lo tum thuak thuak tawh a. Jones hian sum a phut hnem a, a phut zat Dane White hian a pe dawn lo a nih chuan insual hmachhawn a tum tawh lova, a kawnghren kalsan a tum bawk. Chutiang thu leng vak a awm hnu chuan Brock Lesnar nen chotuah an ni zui ve leh ta a ni.

Wrestling leh UFC-a palian huangah Brock Lesnar hian hriat a hlawh hle a, champion hlui a ni nghe nghe. UFC huanga fight a hmachhawn hnuhnun ber tum chu 2016 ah daih tawh khan a ni a, a khingpui fighter hriat hlawh Mark Hunt a hneh. Hemi hnu hian drug test a paltlang zawh loh vangin fight a hmachhawn zui tawh lo. Palian huangah Deniel Cormier-a’n Stipe Miocic a hneh hnu Brock Lesnar leh DC te hi inhmachhawn turin an incho tawn uaih uaih a, DC hi Miocic lakah a tlawm zawn leh tak vangin an thawm a reh zui a, DC hi a chawlhzui leh tak zel vangin Brock nen hian an inhmachhawn thei dawn lo tih a chiang tawh. DC in vawihnih ngawt a hneh loh tawh Jon Jones nen erawh inhmachhawn theihna hun tha tak an nei a ngaih a ni ta thung.

Palian huanga champion Stipe Miocic leh Francis Ngannou te chu intawng nawn leh in, kawnghren an inchuh leh tura ngaih a ni a. Jon Jones leh Brock Lesnar te hi an hmachhawn thei a nih chuan Miocic leh Ngannou te insuala chak zawk zawk hmachhawn in, kawnghren chuhna hun tha tak an nei zui thei dawn a ni.

Brock Lesnar leh Jon Jones te hian inhmachhawn an duh ve ve a nih chuan UFC President Dana White hian an insualna tur a bautsaih thuai dawn a, boruak lian tak neiin, fighter pahnihte pawhin sum hlawm an hai lut thei tura ngaih a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy