Parliament fur thutkhawm kal mekah nimin khan FCRA amendment bill chu Opposition lamin withdraw tura an duh laiin Joint Parliamentary Committee(JPC)-a thawn turin motion pass a ni ta a.
JPC hi member 31 (Lok Sabha-21, Rajya Sabha-10) awmna tur niin, he committee hian FCRA hi an lo zir chiang ang a, report kimchang chu Winter Session 2026 chawlhkar hmasa berah theh lut hman tura tih a ni a; thawk han lakna hun a inhawng leh dawn ta a ni.
FCRA siam that a tul chhan nia sawi, ram pawn atanga sum lo lut te dik lo taka hman ni ta se, dik lo taka sum hmangtute chu eng NGO/Sakhua/Pawl te nge, engtin chiah nge ram himna tiderthawng zawnga hman a nih tih te hi a finfiahna chiang taka tarlan theih tur niawm tak a nih laiin, chutiang chu hriat tur leh hmuh tur a awm leh si lo a nih chuan, he Bill hi ‘sakhaw tenau zawkte ngaih theih lohna lam hawi’ anga ngaih loh theih pawh a ni ta lo a ni. Sawrkar hian ram himna tiderthawng zawnga dik lo taka sum hmangtute chu a hria a nih chuan man se, dan angin action la mai se. Tunlai technology sâng tawh takah hian sum che vel hi chhui theih loh a awm lo ang. Bank transaction zawng zawng hi RBI leh IT Department-in an hmu thei vek a. NGO-in sum a dawnin audit report a thehlut a, CAG-in a en thei a. System hi a fel tawk lo a nih chuan amendment bill pu lut rup rup lo hian system tihfel dan turte chu ngaihtuah ni ta zawk mai se, tih hi ngaihdan awm thei a ni.
A nihna takah chuan, ram pawn atanga sum dawngtute hian sikul an din a, damdawi in an din a, zirna in an din a, mi harsa zawkte an chhawmdawl a, ram leh hnam hmasawnna vek a ni. Kohhran/Pawl neihsa – ram, building, bank balance etc. sorkar kuta dah theihna tur Dan siam tumna hian ram himna tur lam a hawi lo a, sakhua a bitum ngut ngut a ni ber a. India hi Constitution-in Secular State a ti a, sakhaw zalenna ram a ni; mahse tun hnaiah hian sakhaw inrelbawlna chhungah sorkar hi a inrawlh thuk ta lutuk a ni lo maw?
Ram himna hi chu kan duh vek, mahse chhuanlam atana ‘ram himna’ hmang chunga sakhaw tlem zawkte rahbehna leh tlawmngai pawl thahnem ngai tak te tihchhiat hi India tana pawi zawk tur a ni ang.
Eng pawh ni se, JPC zirchian hun chhung hi Kohhran leh mipui ten Aw chhuah ve theihna hun remchang a ni tih hriat a pawimawh dawn hle a ni.
JPC kutah FCRA Bill
