Judge-in Siaha leh Lawngtlai tlawh

Gauhati High Court judge Justice Nelson Sailo chuan kar kalta khan Lawngtlai leh Siaha tlawhin, Court building leh judicial quarters te a enfiah.
Siaha District Court building sak mek Siahatla ami chu a hmunah a tlawh a. Building hmunhma leh a panna kawngpui tihzauh leh siamthat dan tur bakah court building-in a mamawh thildangte a enfiah.
District bawrhsap, SP, Fast Track Court judge, chief judicial magistrate, PWD, P&E leh Mara ADC lama hotute bakah Siahatla bialtu MDC, VC leh MTP te chu thutkhawm puiin District Court leh building-in a mamawh leh hmalakna tur la awmte a sawiho pui nghal a ni.
Lawngtlaia judicial quarters sak mek, type I & II Rs 119,90,755 senna tur leh judicial quarters grade II Rs 95,19,999 senna tur sak mek chu a hmunah Justice Nelson Sailo hian a enfiah bawk a. Heng quarters sak mek hi a zawh hun tura ruahman chu pel tawh mah se, a ranglama hna thawk zo turin contractor-te a chah. Lawngtlai District Court-a thawktute chenna tur quarters indaih lohna chu a rang lama phuhruk a nih theih nan hnathawktute chu an hna thawk zo thuai turin a hrilh bawk.
Quarters sak mek a en zawh hian chief judicial magistrate office tlawhin, district bawrhsap, SP, DRDO project director leh official dangte nen an inkawm a. Sawrkar inrelbawlnaa thil pawimawh a sawipui.
High Court judge hi Gauhati High Court Aizawl Bench registrar Joel Joseph Denga, District & Sessions judge Lunglei Judicial District TL Guite bakah Law & Judicial deputy secretary Thomas Lalrammawia ten an tawiawm a ni.