July-ah GST atangin Rs vbc nuai 1.96 hmu

July-ah GST atangin Rs vbc nuai 1.96 hmu
India chuan Goods & Services Tax (GST) atangin July thla chhung khan Rs vaibelchhe nuai 1.96 a hmu a, nikum tun ang huna a hmuh aiin 7.5%-in a tam zawk tih sorkarin chhinchhiahna a tihchhuahah tar lan a ni.
Tun hnai thla eng emaw ti chhungin ram economy than thu deuh mah se chhiah lak khawm hi tual chhung sum che vel leh ram dang atanga thil lak luh avangin a pung tho a ni.
Kumin April leh July chhungin GST lak tawh zawng zawng chu Rs vaibelchhe nuai 8.18 ni tawhin nikuma hetih hun chhunga lak khawm chu Rs. vaibelchhe 7.39 niin 10.7%-in a tam zawk a ni.
July thlaa GST lak khawm zinga Rs vaibelchhe 35,470 chu Central GST atanga hmuh a ni a. State GST atangin Rs vaibelchhe 44,059, Integrated GST (bungraw lak luh atanga hmuh Rs vaibelchhe 51,626 hmuh telin) Rs vaibelchhe 1,03,536 leh cess (bungraw lak luh atanga Rs vaibelchhe 1,086 hmuh telin) Rs vaibelchhe 12,670 te a ni.
July thla kha India-in GST a lak khawmin Rs vaibelchhe nuai 1.8 chuang a tlin zawn thla sarihna a ni ta a, tangka kum kal mekah thla hmasa pathum chhunga khawn zat chawhrual, Rs vaibelchhe nuai 2.1 erawh a phak lo deuh.
April thla khan GST lak khawm tam ber tum niin Rs vaibelchhe nuai 2.37 a tling a, May thlaah khan Rs vaibelchhe nuai 2.01 hmuh a ni bawk.
Pek let leh tur paih pawhin July thlaa GST hmuh hi Rs vaibelchhe 1,68,588 a ni dawn a, kum khat kal ta khan Rs vaibelchhe 1,65,800 niin kuminah 1.7%-in a tam zawk dawn tho a ni.
July thla chhunga chhiah lak khawmah hian state hrang hrangte dinhmun a inang lo hle a. Hmarchhaka state tê zingah a tlangpuiin nikum an khum nasa hle a. Tripura chu 41% zetin a thang a, Meghalaya (26%), Sikkim (23%) leh Nagaland (22%) a ni bawk.
State lian zingah Madhya Pradesh chu nikum aiin 18%-in an khawn chhuak tam zawk a. Bihar-in 16%, Andhra Pradesh-in 14% leh Punjab leh Haryana ten 12%-in nikum aiin an hmu tam bawk.
GST khawn chhuak tam ber, Maharashtra chuan July thla khan Rs vaibelchhe 30,590 khawnin nikum tun ang hun aiin 6%-in an hmu tam.
Karnataka (7%) leh Tamil Nadu (8%) pawh kum kal ta aia hmu tam zingah telin state hausa, Gujarat erawh 3% chauhvin nikum an khum ve thung.
Hmun thenkhatah erawh nikum phak lo an awm nual a. Chi leh chi inkara buaina chhuakin nunphung pangngai a awmtir theih lohna ni mek, Manipur chuan nikuma an hmuh 36%-a phak lovin Mizoram pawh 21%-in a tlahniam a. Firfiak chetna avanga thla eng emaw zat an sum hnar pakhat, khualzin an luh lohna, Jammu & Kashmir leh Chandigarh chu 5% ve vein nikum tun ang huna an khawn an pha lo bawk.
Delhi leh Uttar Pradesh chu an thang nasa lutuk lo bawk a, khawpui ber chuan 2%-a nikum khumin mihring tamna ber state hian 7%-in an khum bawk.
July thlaah khan khawvel pumah harsatna awm mah se India-a thil siam chhuah lam a thang ve thung a, thla 16 chhunga an sum thawh chhuah tam ber tum a ni hial a, hei hi GST khawn tipungtu a ni pakhat bawk.