Kumin July thlaa Aizawl district hnuaia enforcement staff-ten dan bawhchhia an man atanga an sumfai chawi tir tlingkhawm chu Rs. 10,66,500 a ni.
Aizawl District Transport Officer office-in a chhinchhiah danin, July thla chhung khan lirthei enfiah 2099 an neih atangin dan bawhchhia 271 an man a. Heng zingah hian tum dang ang bawkin bungraw phur lirthei te chi ho – light goods vehicle (100) leh maxi cab (80) an tam ber a. Light motor vehicle (32), heavy goods vehicle (19) Medium goods vehicle (16) leh taxi (12) chu a tam leh deuh an ni.
Tun tumah hian excavator 3 man tel an ni a. Tax pe lo leh insurance thi te niin, excavator zingah tax pe lo leh insurance thi hi an awm fo thin tih Enforcement staff lam chuan an sawi a ni.
Hetihlai hian, tun thla, August 5-9 chhung bik khan dan bawhchhia lirthei 101 man an ni bawk a. An sum chawi tlingkhawm hi Rs. 4,58,000 a ni. Hetah pawh hian maxi cab leh LGV chu man tam ber an ni a. A tam zawk hi phurh theih chin bak phur an ni tih sawi a ni bawk.
Heng lirthei dan bawhchhiate sum chawi hi a vaiin sawrkar sum bawma chhunluh zel a ni.
Motor Vehicle Inspector-te chuan lirthei khalh laiin a remchang hle a nih loh chuan overtake ching lo turin lirthei khalhtute an ngen.
July-ah lirthei dan bawhchhiate pawisa chawi nuai 10 a chuang
