Mizoram sorkarin sawhthing a lei mek a, June ni 30 thlenga lei tum niin, thla tharah chuan inkhar tawh an tum tih thu dawn a ni.
Sawhthing lei hnathawktu Mizoram Agricultural Marketing Board (MAMB) hotute’n tun thlaah sawhthing lei hna hi thawh zawh tum a nih thu an sawi a, tunah pawh hian a hma anga tam thama lei a ni tawh lo tih an sawi.
An sawi danin, tun thlaah sawhthing an la lei na a, chawh chawp ni lovin chawh sa chauh an lei tawh. Sawhthing chawh sa, a thartute’n an lo neih sa a awm a, chutiang chauh chu an lei tawh tih an sawi. Sawhthing hi a chawr tawh a, chawh hun a ni tawh lo an ti.
MAMB hian sawhthing lei sa hi an hralh leh a, hei pawh hi a la kal reng tih an sawi.
Sawhthing an hralhna man hi tun hnaiah a pun an beisei thu an sawi a, state dangah sawhthing lak tur a tlem tan avangin a leitute hian an ngam huai an beisei thu, kg-ah Rs 30 tea hralh theih an beisei thu te an sawi.
Sawhthing hi February ni 20-ah an lei tan a, March ni 20 thlengin an lei phawt. Heng lai hian an hralh lehna man a tlawm a, April ni 21-a an lei tan leh pawhin an hralhna man hi a tlawm an ti. Kg-ah Rs 13-18 velin an hralh tlangpui tia chhut theih a nih thu an sawi.
Sawhthing leitu hi an awm nual a, Serchhip district-ah ringawt pawh 32 an awm. Khawzawl district-ah 30 an awm a, heng district pahnihte hi an tamna an ni. A leitu pakhatin district pahnih pathumah an lei avangin an zat chiah hi hriat a har rih. Secondary Collection Centre hrang hrangah a leitute hian an lei a ni.
MAMB hian June ni 20 thleng khan sawhthing hi quintal 2,14,428.738 an lei tawh.
June ni 30 thleng sawhthing lei dawn
