Daily Newspaper

June thlaah Krismas hla

9

(POST NEWS SERVICE)

Hman ni lawk thleng kha chuan thlasik leh T Lalengzauva hi an inzawm emaw tih mai tur hi a ni thin; Zoramah chuan thlasik rim a lo namin Krismas rim a lo nam a, hmun hrang hrangah T Lalengzauva zai ri a ri chuah chuah thin. Vawiin thlengin a hming lam rik ringawt pawhin mi tam tak chu an lung a leng ang.

Hranghlui chan chang ve ta, zaithiam lar T Lalengzauva hian 1982 leh 1984-ah Krismas album a siam a, chu chu Krismas laia Zofate chawmtu pawimawh a tling. 1982-ah ‘Bethlehem Arsi’ tih album a siam a, 1984-ah ‘Fak r’u Imanuela’ tih a siam leh. Cassette hun lai a ni a, chung lai chuan “aw an thun” thin. A lar ta em em mai a, a sing tel an hralh.

A album hmasa zawk hi fur laia an siam a ni a, Krismas laia thehdarh tur a nih avangin June thla-ah studio-ah an thun. Krismas rim nam hma ni mah se amah T Lalengzauva thinlungah chuan Krismas a thleng tawh a, tui em emin a zai thin. ‘Mal min sawm turin’ tih hla phei chu hnukulh teuhva a sak a ni.

“June thla, khawchen lai kha a ni a, mahse ka tui ve hrim hrim a, ‘Mal min sawm turin’ tih hla ka sak lai phei chuan ka hnuk a ulh a. Thlarau chenpuina… kha khan min khawih chiai chiai thin a,” Enga chuan a ti.

Hla thenkhat chu a hnuk tiulh lo zawngin, a chi dangin a thawk tih a sawi a, ‘Ram thianghlima lal lo piang chu’ tih hla a sak lai te chuan a ‘chona’ ang zawngin a thawk tih a sawi. He album a siam lai hian a tui em em a, studio-ah tui taka a zai thu leh vawiin thleng pawhin a rilruah a la awm thu a sawi.

A album pahnih hi hralh a tla ngang mai a, a sing tel teh meuh an hralh. A hmasa zawk hi an hralh hnem zawk. Khatia mipuiin an lo duh em em mai kha amah pawhin mak a ti a, “Ka beisei phak bak a ni a, ka beisei phak bakin mite’n an lo ngaihlu a, lawmpuina pawh kan dawng ve malh malh e,” a ti.

“Mizo irawm chhuak hi, Krismas hlaah hi chuan kan duh a ni. A hla hrim hrim hian kan lung a tileng a, Mizote rilrem zawng a ni a, vawiin thlengin kan la sa tui a,” tiin a Krismas album a hlawhtlin chhanah a ngaihdan a sawi.

A Krismas hlate hian Zoram khawvel a tuam tak meuh a, mobile phone leh whatsapp awm hma ni mah se hmun hrang hrang atangin ‘feedback’ a dawng nasa. Krismas card inthawn hun lai a ni a, “Beisei loh deuhin khawi khawi emaw atangin Krismas card te kha kan dawng leh nawlh thin,” a ti. “Miin an lo ngaithla a, an lo hlawkpui a, dam lovin an lo ngaihthlaka an dam tak thu te pawh ka dawng,” a ti bawk.

1981-ah khan T Lalengzauva hian ‘An dang chuang lo e’ tih album a siam a, Otto recording Studio rawtnain a kum lehah Krismas album a siam leh. A zai zui zel a, album hi 10 a siam. Tunah chuan Lunglei-ah Chanmari Vengthlang Baptist Kohhranah upa a ni a, Revival Team speaker niin thu a hril thin bawk.

Cassette hun lai liam tawh mah se youtube-ah a zai hi ngaihthlak tur a awm a, amah pawhin lungleng takin a ngaithla thin. Ral lehlamah ring taka an lo play chang te pawh a awm a, “Lung chu a leng ve thin khawp mai… Ka rilru a tithar thin,” a ti.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy