Justin Bieber-a’n 4B view kai thei video nei ta

Justin Bieber-a’n 4B view kai thei video nei ta
Justin Bieber-a hla hit ‘Sorry’ music video chuan YouTube-ah vawi tluklehdingawn 4 en a hlawh ta a, a music video zinga hetiang zat en hlawh thei hmasa ber niin, music video hetiang zat en hlawh thei 15-na a ni bawk.
YouTube chuan September ni 4 khan Bieber music video ‘Sorry’ hian vawi tluklehdingawn 4 en a hlawh ta tih an puang. Mahse, he music video-ah hian amah, Bieber ber hi a lang tlat lo, lamthiam rual thawmhnaw lar tak tak inbel te an lam suau suau a, a choreography hi dance star Parris Goebel kutchhuak a ni.
‘Sorry’ hla hi 2015-a Bieber-a album ‘Purpose’ ami niin, Billboard Hot 100 (US singles) chart-ah No.1 kaiin, Bieber-a hla he chart-a No.1 kai thei pahnihna a ni. A hla Bieber, Justin Tranter leh Julia Michaels te phuahho a ni a, Skrillex leh Bloodpop produce a ni bawk.
Bieber hi YouTube-ah a mikhual lo hle a, 2010 khan a hla ‘Baby’ music video chuan Lady Gaga ‘Bad Romance’ music video record siam pehpelin, YouTube-a music video en nasat ber record a siam a, he record hi November 2012 thleng khan dinin, Psy-a ‘Gangnam Style’-in a rawn khum a, ‘Gangnam Style’ hian YouTube-a music video vawi tluklehdingawn en lawh thei hmasa ber record a rawn siam zui ta a nih kha.
Justin Bieber hian YouTube-a vawi tluklehdingawn en hlawh thei music video dang panga a nei tawh bawk a, 2010 a a tihchhuah “Baby” chuan vawi tluklehdingawn 3.4 en a hlawh tawh a, 2015-a a tihchhuah “What Do You Mean?” chuan vawi tluklehdingawn 2.2 en a hlawh tawh a, 2015-a a video “Love Yourself”-in vawi tluklehdingawn 1.7 en a hlawh tawh a, 2010-a a video “Never Say Never” featuring Jaden Smith chuan vawi tluklehdingawn 1.2 en hlawh tawhin, 2012-a a video “Beauty and a Beat” featuring Nicki Minaj pawhin vawi tluklehdingawn 1.1 en a hlawh tawh bawk.