Daily Newspaper

Juventus an tlawm

31

Nilai zan khan Italian Serie A-ah inkhel pasarih a awm a, champion thar Juventus an tlawm laiin Lazio an chak ve thung. Ciro Immobile-a’n goal a thun laiin Cristiano Ronaldo chuan goal a thun thei lo thung a, Serie leh European Golden Boot dawn a beiseina a tawp ang thawthanga ngaih a ni tel bawk.

Ronaldo beiseina a chuai
Juventus hian champion an tumna an pui tlin tawh a, an player pawimawh Cristiano Ronaldo chuan topscorer nih tumin beiseina lian tak a nei a, inelna pawimawh tak a hmachhawn a la ngai thung. Juventus in khualmualah Cagliari an hmachhawn tumin Ronaldo hian goal a thun lova, si hnih faiin an tlawm. Serie -ah khelh hmabak pakhat chiah a awm tawh a, topscorer ni thei turin Ronaldo hian khelh khatah goal li a thun a ngai a, Immobile-a’n goal a thun loh a ngai tawh dawn a, tih theih loh ni em lo mahse match khata goal li thun hi thil harsa tak ni tura ngaih a ni. Portugguese forward C. Ronaldo hian Serie A-ah goal 31 a thun tling tawh a, Ciro Immobile hian goal 35 a thun tling tawh thung.

Table-ah 13-na luah mektu Cagliari hian an mikhual Juventus lakah bul an tan tha hle a, minute 8-na lekah Luca Gagliano chuan hmahruaina goal a thun nghal a, an mikhualte a barakhaih chiang hle. Serie A champion Juventus hian an si phurh sut ngei tumin nawr thin bawk mahse an hlawhtling thei lova, chawlhlawk dawn tep-ah goal an chhuah belh ta zawk. Minute 45+2-ah Giovanni Simeone chuan an goal hnihna a thun a, champion thar lakah si hnih faiin an chak theih phah ta a ni.

Inrinni zan khian Juventus hian pangana ni nek AS Roma an hmachhawn zui leh ang. Roma hi hian hma an sawn thei tawh lova, pangana aia hniamah an tla thla thei tawh lo bawk a, an tan chuan inkhel awmze nei lo a ni tawh a, champion chiang tawh Juventus pawh inkhel awmze a ni bik chuang lo bawk a, rawlthar an chhawr deuh nual tura ngaih a ni.

Immobile a kal zel e
Immobile-a elpui Cristiano Ronaldo in goal a thun loh laiin Serie A topscorer ni mek Ciro Immobile erawh chuan tlahniam chiang tawh Brescia lakah goal a thun ve thung a, Serie A topscorer nih a hnaih zel bakah European Golden Boot dawng thei turin Robert Lewandoski a khum chiah a, Serie A record thar siam theihna hun tha a nei tel bawk.

Lazio hian an mualah tlahniam chiang tawh Brescia an mikhual a, minute 17-na lekah Joaquín Correa chuan mualneitu hmahruaina goal a thun. Hun tawp dawn hnaih minute 82-naah Ciro Immobile chuan an goal hnihna a thun zui ve leh bawk. An muala an chak vangin Lazio hian palina an luah nghet a, champions league khel turin an tling chiang tawh.

Brescia laka an goal hnihna thuntu Immobile khan Serie A-ah goal 35 a thun tling chiah a, a elpui C. Ronaldo chu goal 4 ngawtin a tlansan a, topscorer a nih ngei a rinawm ta hle. Serie A-ah hian season khat chhunga goal thun hnem ber chu Napoli foward Gonzalo Higuain a ni a, 2015-16 season-ah khan goal 36 a thun tling. Higuain record hi Immobile hian goal khat lekin a la phak lova, um phak bakah lehpelh theihna hun tha a la nei. An match hnuhnung berah Napoli an hmachhawn dawn a, goal khat a thun thei a nih chuan Higuain record a nih rual ang a, goal hnih a thun thei a nih chuan Serie A record thar a siam thei dawn a ni. Napo hi khingpui hautak an ni ngei thung ang.

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy