Daily Newspaper

Juventus in C. Ronaldo an ui lo

36

Intalian Serie A club lian Juventus chuan player ropui Cristiano Ronaldo an ui vak lo niin a lang a, PSG lamah kal tir a, Argentine forward Mauro Icardi nen inthleng an hreh lo.

Kum 9 chhung zet Serie A-ah an champion zawn hnuin Juventus hi season liam ta khan an chetha lo va, palina an ni pha tawk chauh. Inter Milan lakah an trophy kawl mek an hloh a, Inter Milan hi point 13 zetin an phak lo. Champions League lamah pawh beisei an phak lova, quarter-final an thleng phak lo. Season chhe tak an hman vangin an manager Andrea Pirlo an ban a, an manager hlui Massimiliano Allegri an ruai nawn leh.

Manager thar Massimiliano Allegri hian season tharah khawng zawka inlan tumin hma a la a, an squad siksawi chiam a tum. Champions League-ah chetthat an duh vanga beiseina sang tak nena an lak luh Cristiano Ronaldo pawhin eng ruai a nihpui lova, Serie A-ah a champion pui thei tawh bik hek lo. An beisei anga UCL lamah a chetthatpui theih loh bakah a hlawh tam fal em bawk si vangin Ronaldo hi hnawk an ti ru a. Hralhchhuah an hreh loh hle tawh. French chanchinbu L’Equipe tarlan danin Juventus hian C. Ronaldo hi chhuahtir a, hun rei tak chhung lak an lo tum tawh Mauro Icardi hruai luh ve thung an duh.

Juventus tan vawi 97 khel a, goal 31 zet thun tawhtu Cristiano Ronaldo hian Turin khaw club lianah hian kum khat daih chiah contract a nei tawh. A contract neih hi hmang zo lovin Ligue lamah a kal hmel ta hle. Inter Milan tan kum sarih chhung zet khel a, an captain pawh lo ni reng tawh Icardi hi a khelh mekna PSG-ah a tuitla tehchiam bik lova, a ropuina Serie A lamah kir leh a chak hle thin, Juventus in an ngaihven tih a hriat phei chuan Italy-a let leh chak zual sauh. Serie A-ah goal 122 zet thun tling tawh a nih vangin Juventus pawh hian an tlarhma thuamchak turin lakkir ngei an duh ve bawk.

Icardi hian season liam ta khan PSG tan vawi 28 a khel a, goal 13 a thun tling. Cristiano Ronaldo hian season liam ta khan Juventus tan inelna hrang hrangah vawi 44 a khel a, goal 36 zet a thun ve thung. PSG hian Neymar leh Kylian Mbappe te nen inkawp turin an duh hle a. Player ropui pathumte hi PSG tlarhmaah an inkawp thei a nih chuan an hmuhnawm khawp ang le. Icardi hi Juventus in lak luh an duh a, C. Ronaldo hi PSG in an duh ve bawk a, inremna an neih theih ngei a beiseiawm. Club pahnihte hi player inthleng turin an indawr mek a. Thu chiang hriat tur a awm thuai beisei a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy