Daily Newspaper

KA HAWI KIR LO’NG: REV. SIMON MARAK

17

-RE Ralte

I have decided to follow Jesus ;(3x)
No turning back, no turning back.
The world behind me, the cross before me ;(3x)
No turning back, no turning back.
Though none go with me, still I will
follow ;(3x)
No turning back, no turning back.
With no doubt follow, and receive the crown ;(3x)
No turning back, no turning back.

Sikul kan kal laia kan sak tuar tuar thin, ‘I have decided to follow Jesus’ tih kha sap hla pangngai, sap phuah emaw ka lo tih thin laiin North East mi, Garo pa Rev. Simon K. Marak-a phuah ngat a lo ni a. He hla hi Pathianin mal a sawm nasa a, miten an duh hle a niang, tunah pawh hian han google ila, zai thiam hrang hrang music video a tam hle. He hla phuah a nih dan chanchin pawh internet-ah sawi dan chi hrang hrang a awm nual a ni. Tin, Sap hlabu changtlung tak taka chhut tel a nih tawh avangin Garo Hills, Meghalaya lama miten tichiang turin research an bei a, mi engemaw zah an kawm hnuin a sawifiahna Garo Baptist Convention Sesquicentennial Souvenirah an chhuah ta hial a ni.

Simon K. Marak chu tunge?
He hla ropui tak phuahtu chu Simon Kama Marak, Garo mi, Assam-a awm thin a ni a. He hla hi Jorhat Baptist Church, Assam-ah Assistant Pastor a nih laia a phuah a ni awm e. A phuah chhan pawh Pathiana lawmnaa a khah vang leh chung hunlaia a Pathian fakna hla sak tur a tam loh em vang a ni, an ti. “Pathian Thu hrilna hmun apiangah sak tur a ni,” a ti tawp mai nghe nghe a ni awm e. Heng hun lai hian Pastor, missionary leh sikul zirtirtu hna a thawk kawp vek a ni.

Pu Simona hi 1877-ah Baroigaon khua, khatih hun laia Kamrup bial, Assam a piang a ni. A nu leh pate hi Soraigurung, West Khasi Hills lam chhuak a ni. Khasi lal hnuaia harsatna neuh neuh an neih avanga pem ta an ni awm e. Simona hi a pain a thih san hma hle a, bawng ven a ngaih thin avangin lehkha pawh a zir tlai phah a. Kamrup Baptist Association ten an tanpui zar zar hnuah Government Training School, Jorhat-ah 1912 khan a zir chhuak ta hram chauh a ni a. A zir chhuah veleh hian Mission school-ah thawk nghalin rawngbawlna chanvo pawimawh tak tak a chelh chho a. Kum 1975 October ni 16 khan Lalpa hnenah a lo chawl ta a ni.

Hun harsa tak tak tawngin vanduainain a tlakbuak nasa ve hle a. He hla pawh hi chutiang harsatna kara Isua Krista tana rinawm tura insanphekna hla a nih hmel hial a ni. A pain a naupan laia a thih san mai piah lamah nupui 3 leh fa 4 lai a sun a. A nupui 4-na nen chuan fa 7 neiin Pathian malsawmna an dawng ta thung a ni. A fanu 4-na Pi Rini phei chu Mizo pa Pu C.L. Tlanthanga, Zarkawt nena inneiin tunah hian kum 80 chuang a ni tawh a. Kan MP zahawm tak Pu C. Lalrosanga hringtu nu hi a lo ni a, tunah hian Zarkawtah a khawsa mek a ni. Thil hriat nuam deuh chu Pu Simona hi kan mi chhuanawm Pu Ch. Saprawnga te, Zarkawt Upa Lalchungnunga (L) te leh Mizo lehkhathiam hmasa mi tam tak baptistu Pastor a ni nghe nghe tih thu a tunu Rokimi, Zarkawtin a sawi a ni.

Hla phuah kum
Internet lamah chuan chiang lo ruaiin a phuahtu hi Sadhu Sunder Singh tih te, Garo mi vek Noksenga phuah tih ang tea inziak hmuh tur a awm. Pu Simona phuah a nihzia khawvelin a hriat chian a pawimawh telh telh dawnin a lang. Ani zawk kha pa inngaitlawm leh thuhnuairawlh chi, mahni inlaklen tum lo chi tak a ni hmel a. He hla a pawh hi a ‘intiphuah’ lo hle a ni mai thei, a phuah hun chiah pawh hi record mumal kan nei ta lo a ni. A fanu upa ber Onima, kum 1938-a piang chuan, “Ka hriat theih tirh atangin ka pain a sak thin ka hria,” a ti a, Phillix Marak, Baroigaon khua mi Jorhat Mission School-a 1944 vela lehkha zir chuan, “School ka va kai tirh atang tawhin kan school leh Biak Inah te kan sa thin,” a ti. Chuvangin a phuah hun hi 1935 leh 1940 inkar vel a nih hmel ta ber a ni. A fanute hi Guwahati, Serampore, Sadiya, Karbi Anglong leh Mizoramah te pasal nei an nih hlawm avangin an awmnaah midang an zirtir zel a, he hla larna hmanraw pawimawh tak a ni ta zel awm e.

He hla hi Assamese Hymnal 1960, 1972 leh 1978 kuma an chhuahah te chuang tawhin Simon K. Maraka phuah angin a inziak vek a. Sapho hian he hla hi an ngaisang viau ni tur a ni. Saptawng Fakna Hlabu tih tlak deuhah chuan a chuang zel a ni awm e. A tirah chuan English mam lo ve tak, ‘I have decided to Jesus follow’ tiin a phuah an ti. Chang 2 chauh a phuah phawt a, a hnuah chang 2 dang a belh leh a, tichuan ama phuah chu chang 4 a ni ta. Tun hnuah hian zaithiam ten an remchan angin belh an ching tih a hriat theih. Saptawnga a phuah dan tak chu hre pha chiah lo mah ila, a dam lai ngeia an chhuah Assam Hymnal-a Assamese tawnga inziak chu a chunga kan dah dan khian a hnaih ber awm e.

He hla ropuina
He hla, kum 1950 vel atanga lar tawh, hian ngaihsan a phu hle mai. A hla thu ropuina leh a phuahtu nun duhawm chu thu khat pawh lo ni se, Pathianin amah inchawimawi nana a hman nasat dan han ngaihtuah hian ngaihhlut loh theih a ni lo va. India hmar chhak a awm ringtu irawm chhuak ve mai, khawvel huapa sakho dual dual a ni thei hi a ropuina lai tak niin ka hria. Hetiang dinhmun chang pha hla dang a lo awm ve a nih pawhin a tam lo viauin ka ring. |hangtharten kan hlut thiam telh telh a va duhawm em! Fakna hla leh hla dang pawh kan hla phuahtuten an phuah a, kan rilru min hnehtu leh kan thlarau nun chawmtu a tam narawh e. Amaherawhchu, he hla tluka hnam tinin kan ngainat rawn leh khawvel pum huap zo hi North East chu sawi loh, India ram atang pawh hian a awm meuh awm lo asin!

A phuahtu Pu Simon K. Maraka nun atang pawh hian zir tur a tam thei ngawt ang. Tun hma phei chuan a hming hi ka hre ngai lo hrim hrim a. Mi lar tehchiam a ni bik lo aniang. Mahse chutih lai reng chuan a hla phuah chu nikhaw hriat tirh deuhthaw atangin ka hre tawh si. Pathianin a hla phuah mal a sawm chen tur hi amah ngei pawhin hre pha miah lo vang. Tunlai khawvela zai thiam ber berten an la sa ang a, khawvela Kristiante hla duh ber pakhat niin Youtubeah te an la post chei chuai ang tih a suangtuah phak bik a rinawm loh hle mai. Mahse, Lal Isua hnung zui a tumna nghet tak; hawikir tawh lo tura a intiamna; kraws hmachhuana khawvel a hnuchhawn nun; leh, ringhlel lova zui a lallukhum chang tur a nihzia a lo puanchhuahna chuan khawvel a fan chhuak ta a nih hi. Pathian tana thinlung taka thiltih hian nghawng a neih thui theihzia a chiang ka ti.

Isua rinawm taka zui ka tum ta, ka hawi kir lo’ng;
Ka hma lamah kraws, ka hnunglam khawvel, ka hawi kir lo’ng;
Mal tur ni mah se, ka zui zel dawn e, ka hawi kir lo’ng;
Ringhlel lova zui, lallukhum khumna, ka hawi kir lo’ng.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy