Daily Newspaper

‘Ka hmangaih che’ tih sawi bakah engtin nge i hmangaihna i lan tir ang

138

Hmeichhia ten mipain, “Ka hmangaih che,” an tih hi ngaihthlak nuam an ti a, mahse, mipa tan erawh chutiang a ni ve kher lo mai thei. Mipa te chuan thil sawi vel hi an peih vak lo thin a, “Ka hmangaih che,” tih tih aiin, an tana thil eng emaw i tih sak khan an lawm zawk mai thei. Chetziaa i hmangaihna leh i care a ni tih i lan tir kha tawngka aiin an tan a tla na zawk mai thei.

Psychiatrist leh relationship counsellor Dr Pavan Sonar chuan, “Tawngkaa ‘Ka hmangaih che’ tih sawi kher lo va i bialpa hnenah i hmangaih tih i lan tir theih dan kawng hrang hrang a awm a, mipain i ngaihven a, i ngaihsak ni a a inhriat chuan nuam a ti hle thin. Chu chu a tihdan kawng hriatfuh chuan thil harsa a ni lo a, i lawm a ni tih lantir nan han kuah mai te pawh a tawk em em a ni. I kuah dan leh i khawih danah khan i special touch chu a hre dawn lutuk,” a ti.

1. In pahniha inawm dunin ngaihsak tha rawh. Thildang ngaihvensan daih angin lang suh, ani hi i ngaipawimawh ber a ni tih a hriat theih ngeina tur ngaihven ang che. In pahnih chauha in inkawm fal laiin i phone check zuk zuk ching lo la, phone call pawh tih loh a tha. Eng nge a sawi uluk takin ngaithla la, eng nge a tih tih te pawh chik ang che. Eye contact bakah kut invawn sak te pawh a pawimawh hle. Hetiang hian amah i ngaihven a, i rilru zawng zawng i pe tih a hre thei dawn a, ani chu i ngaipawimawh ber tih a hre thei dawn a ni.

2. Mipa chu a tui tih zawng te i hriat sak vek a nih chuan mark i hmu sang khawp mai. Mipa thinlunga kawngka pawimawh chu a pum a ni an ti hial a nia. A ei tur duhzawng te i siam sak fo theih a, a tui tih zawng i hlui fo thei a nih chuan i score sang dawn. A ei tur tui tih leh duh zawng i hriatsak chuan amah kha i care hle a ni tihna a ni a, chu chu a hrethiam ve reng a nia.
3. Mipa chuan i i inchei dan tura a duhzawng a sawi tawh chuan chu chu a tam thei ang ber zawm tum la i tifuh ang. A thawmhnaw nalh tihzawng tak i hak te khan a thluakah signal a thawn lut nghal a nia. A mawi tihzawng te i ngaipawi-mawh tih a hriat a, a mit-a nalh taka lan i duh tih a hriat kha a pawimawh tlat.

4. Mipa chu fak fo rawh. Tunge fak lawm lo awm ngai? Hmeichhia ten fak hlawh deuh mawlh mawlh an duh laiin mipa chu a khat tawka fak a tawk viau thung. Mahse, fakderna chu an hrethiam teh mai a nia chuvangin i fakna awka kha a tak tak a nih loh chuan a pawi leh si ang. An lan dan emaw, an chezia emaw, an hnathawh leh thil tih emaw tha i tih zawng kha chu fak hreh suh. A ngaihzawngin a incheina leh a awmdan leh chetdan vela a fakna awri aia thil ri mawi dang mipa bengah a awm chuang lo.

5. Mipain thurawn a pek che chuan zawm ngei tum rawh. A thurawn i zawm sak phawt chuan i tana pawimawh ni a inhriatna a nei ang. Harsatna chi hrang hrang i tawk a ni thei a, chutiang hunah chuan engtia tih tur nge tih rawtna a neih te ngai pawimawhin zawm sak la, chutianga i tih chuan i tana tangkai leh pawimawh anga inngaihna a nei ang.

6. I tan thil eng emaw a tihsak che a nih chuan “Ka lawm e,” tih theihnghilh loh a tha. Kan kawppui te an nih avangin lawmthu hrilh ngai lo turah kan ngai fo thin, anni pawhin lawmthu sawi kha an phut hauh lo ang a, tul pawh an ti kher lo ang, mahse, “Ka lawm e,” i tih chuan ani pawh a thinlung a lawm ve si ang. Tin, lawmthu i hrilh khan a tiphur sawt bawk ang.

7. Mipa chu kuah fo rawh. In atanga i chhuah dawn te, in inkalsan dawnah te kuah thin rawh. Kuah zuai satliah ringawt lo deuhin, nghet deuh taka kuah vawng vawng te kha a tha a, rei tak a tul chuang lo a, minute hnih khat kha a tawk mai. Khatianga i tih khan mipa chuan i thlahlel a, i ngai a ni tih a hriat theih phaha, chu chuan nilengin a tihlim tawh mai dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy