Daily Newspaper

Ka hnek lo kha ka inchhir – Neymar; Chak loh pawm thiam ve rawh – Gonzalez

14

Pathianni zana French Ligue 1 khelhah mak tak maiin champion lai Paris St-Germain chu an mikhual Marseille lakah an tlawm a, season tharah vawihnih khel tawhin an la tlawm ve ve. Marseille an hmachhawn tum hian hun tawp dawnah an intibuai nasa hle a, player panga ngawt hnawhchhuah an ni. Buaina chawkchhuaktu a ngaih pahnih Neymar leh Alvaro Gonzalez te chu social media-ah an inbeizui zel a, Neymar chuan Gonzalez hmaiah a hnek loh vanga a inchhir thu a sawi a. Gonzalez pawhin chhang let ve nghalin ‘chak loh thiam lo, chak loh tum pawha nungchang mawi zir ngai’ niin Neymar chu a sawi ve thung.

Minute 90+1 Neymar leh Gonzalez te hi an inhnial chiam a, an boruak a lum hle. Hemi tum hian Neymar hian Gonzalez tukhumah ngeiawm tak, huat theih chiah si lohin a beng nghe nghe. Ball a nun ve leh Gonzalez hian PSG midfielder Layvin Kurzawa a titlu tawp a, boruak lum tak chu a alh chhuak nghal a, team hnih player te intibuai zuiin player pali hnawhchhuah an ni phawt. VAR rawn a nih hnuin Neymar-a’n Gonzalez a beng tih hmuhchhuah a ni zui leh a, Neymar pawh hi hnawhchhuah a ni zui ve leh. He buaina chhuah chhanah hian Neymar chuan Gonzalez hi a puh fithla hmak a, vung rawng hmusitna tawngkamin a bei niin a sawi.

Inkhel a zawh hnu pawhin player pahnihte an la ngawi mai thei lo ve ve. Neymar chuan, ”A hmaiah tak ka hnek chawrh lo kha ka inchhir ber mai”, tiin Twitter-ah a tweet. Gonzalez pawh a lo ngawi hle hle thei bik lova, chi inthliarna lam hawia a khingpuite a beih loh zia sawi hmasa zet in. Neymar chu, ”A chang hi chuan chak loh i zir thiam ve a ngai a ni. Chak lohte hi pawm thiam ve a ngai a nia”, tiin chak loh thiam lo niin Neymar chu a puh let ve thung.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy