Daily Newspaper

Ka la sehlet ve khawp ang – Suarez

7

Barcelona legend Luis Suarez chuan Catalan team tana a hnawksak zui theihna tur Atletico Madrid a zawm fel ta a, nimin Nou Camp-a amah thlahna hun an buatsaihah mittuiin a bual a, thlahna thu pawh sawi tha hlei thei lawk loin, amah hnawltu hnenah a tisual tih lantir a tiam!

Catalan khelmual farewell press conference-ah Suarez hi a nupui fanaute nen a inlan a, a nupui Sofia Balbi bakah a fate Delfina, Lautaro leh Benjamin-te nen a trophy hlawhchhuah tawh thla an lakpui.

He hunah hian Barcelona a zawm hlima a lo awmsate’n an tihtlangnel dan leh inrintawkna nei nghal tura an siam thu te, coach rual khat leh a team-mate thar zawng zawngin an lo pawm nghal thlap dan mak a tih thute a sawi zet a, mi tu pawhin kha’ng kum chhunga khawvela club tha ber tana a inpumpekna an hriat vek thu leh a thiltih zawng zawngah khan a inchhuang hle tih a sawi.

Manager thar Ronald Koeman lo lan hnua a hun a tawp zui dan sawi thlengin, “Club-in change a mamawh a, coach mitah ka tling zo ve ta lo a ni,” a ti zet a, kum 33 mi chuan a la tar lo tih pholan ngei a tum thu sawichhuak sakin, “Level sang berah ka la tal thei tih hmuhtir hi ka duh a ni,” a ti chheu chheu a, a club thar tan chuan a ngaihnawm duh khawp ang le!

“Phurna sang tak nen Atletico Madrid ka zawm a, mahse, Barcelona hmachhawn boruak hi engang chiah nge ni ang tih ka la ngaihtuah chiah lo. Ka la pawm puhlum filh felfai loh vangte pawh a ni mahna.”

Lehlam pawl player seh ching thin Suarez hian a club hlui tana ngaihthlak nuam lo chhakchhuak zui zelin, tualchhung inelna lamah Atletico chu Barca leh Real el pha khawpa team tha an nih a rinhlelh loh thu a sawi a, “A lawmawm lam a ni lo mai thei a, khatia Barca-in market-a min phochhuah chiah khan kohna leh sawmna tamtak ka dawng a, Barcelona leh Real Madrid ngei mai el thei tur team zawm ka duh tlat a ni,” a ti a, chhuahsan club ep zawnga khelmual lut duh lo intite nen chuan an hawilam a inang lo awm khawp mai!

Uruguayan hian duhtawk a la ngah lo a, chhuahna kawngkapui kawh-hmuhtu Koeman chuan a tisual tih a inpawm ngei theih tura tankhawh a tum ruhzia a sawichhuak.

Barca-in Suarez an petchhuah tak avangin a season khatnaa hun khirh tak hmangliam Antoine Griezmann chuan central striker anga khelhna hun remchang a ngah tawh tura ngaih a ni.

Uruguaya star hian Camp Nou-a season ruk a khawsak chhung khan game 283 atangin goal 198 a tilut hman a, Barca player awm tawh zawng zawng zinga goal thun hnem pathumna niin, Cesar leh Leo Messi chiah phak loh a nei a, season liamta thleng khan Catalan team tana goal khung hnem ber dawttu a la ni pha a, chuti chungin head coach thar Ronald Koeman-a mitah a tling zo ta ngang si lo a, Barcelona pawhin an legend chhuah thu hi an nemnghet ta nge nge a ni.

Euro maktaduai ruk man lek Suarez manah Atleti hian sum an seng tl>m hle a, Juventus lamin passport harsatna avanga an hawisan ta kha an hlawkpui a, Bianconeri-‘n Italian citizenship nei tura engemawchen nghah ngai chu an nghah theih miau loh avangin Madrid club-in South American hmatawng tawrhhlelh-awm la ni reng an chan theih phah ta a ni.

Catalan club thuchhuah chuan an team tana trophy 13 lakpuitu an thlahliam thu hi tarlangin, “FC Barcelona leh Atletico Madrid chu kan player Luis Suarez-a transfer chungchangah kan inrem ta a, Madrid club hian FC Barcelona hnenah euro maktaduai 6 an chhunglut ang.

“FC Barcelona chuan club tana a inpekna leh theihtawp chhuahnaah Luis Suarez laka kan lawmna hi vantlang hriatah kan puangzar duh a, a hmalam hun atan duhsakna kan hlan e,” an ti a, Twitter lamah an striker inpuchhuak ta hlimthla an tarchhuak nual bawk.

Liverpool lama superstar dinhmun a hlawhchhuah hnuah Suarez hian kum 2014 khan Barcelona a pan a, Blaugrana lamah pawh ropui zelin, 2015-16 season-ah phei kha chuan goal 59 tehreng a thun hmangin Europe top scorer lawmman Golden Shoe a dawng nghe nghe.

Barca thuam a inbel chhungin Suarez hian La Liga title pali leh Champions League trophy pakhat a hawn hman a, Barca tana European title a hawn tum khan Juventus lakah ropui takin goal a thun hial a nih kha.

Diego Simeone-a team Atletico lamin loan-in Alvaro Morata chu Juventus lamah an tirliam a, thla 12 chhung Turin khaw club tana a khelh hnuah an duh a nih chuan Juve hian euro maktaduai 45 (£40m/USD52m)-in Morata hi an la nghet thei dawn a; Morata hmunruak luahkhat turin Atleti-in Uruguay forward an senglut ve ta thung a ni.

Season liamta khan Suarez hian Barca tana game 36 a khelh atangin goal 21 a tilut tling a, season lai hawlah hliamin tibuai lo phei se la chuan top scorer Messi a lehpel pha hial mai thei.

Chutiang khawpa a la hriam chungin August thlaah Barcelona-in head coach thar an nei a, Koeman chuan a hmalam ruahmannaah Suarez a tel tawh lo tih a hrilh nghal tawng a, Camp Nou-a kum 33 mi hlim lai ni chu a chuai a, chhuahna kawng zawn a ngai zui ta a ni.

Atletico tana a match hmasaberah kartawp hian Suarez chuan Granada a hmachhawn hman tura ngaih a ni a, karleh Nilaini khian Huesca an luhchilh zui leh ang.

La Liga lama Suarez-a’n a club hlui Barca a hmachhawn theih hmasakber tur nia ngaih chu kumin November ni 22 Wanda Metropolitano stadium-a team pahnih intum hun hi a ni dawn a, nakum May ni 9 khian a vawikhatna atan Nou Camp luhna hun remchang a nei thei bawk ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy