Daily Newspaper

KA PI Tè KHA

10

LH.Hauheng, Nghilhloh Rûn

Nu huaisen, zonu chhulchhuak zinga pakhat, hmeichhe awmnem leh dawldang zawk ni si, mah se, a ram leh hnam tan a huaisena a dawi lo; a ram chin Mizoram hi inches khat pawn tawlh a duh lo tih hi a lang chiang reng mai a. Ka pi tè kha ka Hero a ni.

A khuhhawnna:
Mizo nu chhulchhuak zinga awmnêm tak pakhat, hlauh leh han zam eihna nei map lo, mihlim thei leh thenrual pawl tak tur tih hriatsa fahran tak mai. Vairengte tihmingthaa chawi sángtu nu duhawm tak pakhat chu a ni phawt mai a.

Amah kha:
Pi Lalrinmawii hi Champhai Zotlâng lam chhuak, nu pakhat nia sawi a ni a, a vanglai chuan motor te pawh khalh thiam, mahni inringtawk tak mi a ni tih a chiang hle. Tuna a chenna huan pakhata thlam (maurap in lian vak lem lo tak mai) a khawsa niin, mi tlawmngai leh mi fel tak, a khua leh tuite tana nu rintlak tak a ni ngei ang tih hi a chiang a.

Youtube lam ah:
Khatia Thawhtanni tlai, 26.7.2021 a Assam Police leh kan Mizoram Police te inkahnaah khan, a huaisenna social media kaltlangin ka lo hmu a, Mizoram police banker-ah a mu a, rem leh remloin lungawi tak maiin Meizial tui titakin a pak khu laih laih a, hlim leh engto lungkhamna nei map loa a awm thei leh hlim sang chunga a hmel kan han hmu a, ama tawngkam takin Pathian mi awmpuina leh venhimna a ni, a tih kha a dik khawp ang. Ka ngai sang e—ka pi tè kha!

Raltek Video Production lamin an kawmna kha ka lo thlir a, a thusawi thenkhat tha tih ka ngah mai a, chung zingah chuan, “nu leh pa thawhchhuah ringawt mai ring tur kan ni lo, kan intodelh thalaite hi a ngai a ni” a tih te kha, a dik hle. Hei kan hre chho mek zel chu a nih ber hi maw…

Keini Zoram thalai, a fing leh a ngaihna hre zawkte hi, a ni nu cher te, a hmel leh pumrua han en mai pawha sawr tur tam nei lo tih hriat reng mai, a ram leh hnam Mizoram tana a huaisennate, thihna hial pawh lo thleng se hlau map lo va, vai tawnah ka zam mai dawn lo, kan hneh ang, kan hnehsa vaiho hi ti tlat thin nu huaisen ka pi hian, “|halaite hi nu leh pa thawhchhuah ring mai lo a, harhchhuak turin min chah lawm lawm a sin!” Engtin nge kan chhan ve dawn le?!

Engang thlah nge kan nih?:
Kan ram hian engang thlahtu nge kan neih tih lam aiin, engang thlah nge kan nih tih hi a pawimawh hle a, vawiinah chuan pa zaidam, pasaltha Vanapa iangin a tawp a tawpah chuan kan Khuangchera ta a nih hi, hriat a va nuam em. Kan chhehvel hnam dangte hian Mizote thlahtu hi tunge a nih tih hi kan hrethiam tawh ngeiin a rinawm a ni.

Kap rawh:
Khatia banker chhunga an awm lai khan Assam lam atangin silai a puak a, ka pi hian, banker-a bawk kan sipaite chu “kap rawh, kap rawh” a han ti a (kan sipaite lahin order an la hmu mai si lo), pawnfen ka pe dawn che mi? a han tihkhum leh thin lah tak a, kap tura thupek an han hmu a, Silai a han puak ta chu, ‘Mizo sipaite ropuizia a va lang chiang em!” tia a thusawi te kha hriat a va nuam em!

Hun harsa leh buaina a lo thlen lai te leh, Assam Police leh Vairengte mipui innawr lai te pawha huaisen taka a hmatawng a tang char char ngam, inkah laia police banker a lo tawm ve tlat—silai mu sur karah pawh ngaihngam leh hahdam taka meizial a pak khu siai siai thei te kha; ka pi tè hi a danglam bik a ni.

Kan ram hi huaisen taka enkawla hnung tawlh lo turin a duh a, chutih rualin a hmeichhe pui te pawh fuihin, “Hmeichhia hi kan tlawm lo a ni, kan duai lo khawvelah hian” tih hi hriattir khawvel a tum leh duh ber thin ni hian a hriat a, an tlawm lo chiang a nih hi maw…

Chumai a ni lo:
Mizoram-in Parliament House a thusawi thei tura kan MP neih tawh te zing ami, Pu K. Vanlalvena Rajya Sabha MP, Zirlai Pâwl chhum hmin, pa huaisen leh mi tumruh, India ram leh khawvel hriata Mizote huaisenzia pholangtu kan rawn hmu leh zel a, hriat a va nuam em.

A thusawi dik leh tha, khawng tak ni bawk si te khan zofate hi min va thlamuan em! Vânapa ianga zaidam leh a tul huna Khuangchera anga huaisen a nihna te hian, he a ram leh hnam hi a thlamuanin a va chawimawi em. Huaisenna dika huaisen ngam te, a tulnain min nan miau chuan kan chengrâng te hial pawh kan lek fahmiang i. Hei lo hi ram dang duh mah ilangin, ram dang kan nei chuang si lo…

I ramin a ko che a sin, ding nghet tlat a, huaisenna leh rinawmna vawng nung zel turin—Mizoram hi kan Ram a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy