Daily Newspaper

Ka thianpa Liankunga IAS (rtd) kha

58

-C. Lalrambuatsaiha

(Chhunzawmna…..)

‘I ziahna copy chu va la teh,’ a ti a. The Aizawl Post chanchinbu-a ka thu ziahna chu ka va la a, ka hmuh tir a. ‘I thuziak hi Hindi-in va let la, min rawn hmuh tir leh rawh,’ a ti a. Mizo tawng thiam ve chuang hek lo,a pawi lo tur tawka ka ngaihin ka letling a, ka va hmuhtir leh chuan a thlek vung vung a, ‘A, a pawi lem loh hi,’ a ti a. Ka fihlim ta, ka thaw huai e,” a ti.
Ni khat chu Aizawla a lo hawn laiin, “Ti teh, vawiin chu i leng kual teh ang,” a ti a. Khawi khawiah emaw kan len kual hnuah. “Buata, nupui te lawmzawng sawi hi a tha ve riau. Kan nuin vawk a vulh teuh mai a. Vawk chaw i zawnsak teh ang,” tiin Supply Director Pu Thanhawla office-ah min luhpui a. IAS officer meuhin vawkchaw rawn dil ta chu Pu Hawla chuan bag 20 lai a lo ziah sak a. “Kan nu chu a va lawm dawn em,” a ti a kan chhuak leh ta.

Vawikhat chu Himachal Pradesh, Solan bula Dr. YS Parmar University of Horticulture and Forestry-a zir tur kan u fapa ka han thlah a. Admission kan tihfel hnu chuan khaw nge Shimla a hlat tawh loh hi ka han thleng zuai teh ang, tiin Shimla-ah ka chho a. Inter State Bus Terminal ka thlen chuan thlenna tur hotel ka book lawk lo tih ka hre chhuak a. Pu Kunga hi IAS a tlin hma khan IA&AS ah a tling hmasa phawt a, Shimla-a IA&AS training-na hmunpui a awm tawh tih ka hre chhuak leh a. “Khawiah nge thleng ila tha ang ?” tiin ka zu phone a. “Mall street-ah khan chho la, in tha deuh i hmuh apiang kha hotel a ni vek ang. A man to, AC pawh a ngai chuang lo, Shimla chu a vawh tho kha,” a ti a. A thu awihin, min lo zar sektu portar chuan ka suitcase-a khai a, Mall Street-ah ka chho a, hotel tha pangngai takah, AC room ni lovah ka innghat ta a, a sawi dik chiah a ni. AC room a lo ngai hran lo.

Shimla sawi takah chuan ka high school classmate Churachandpur mi, J.S. Lalringum (Lalrinawma) kha kha tih lai khan India President Personal Branch-ah Under Secretary-in a awm a. “President hian Shimla-ah hian Bungalow ropui tak a nei a, ka zarin i duh hun hunah i thleng thei,” tiin min hrilh bawk a. Ka han zawh chian chuan Shimla khawpui dai lam a lo ni a, ka va pan buai duh ta lo.

India President hian Bungalow (Bhavan) pathum-New Delhi, Shimla leh Hyderabad-ah a nei a. Delhi khawpuia khua a lum viau chuan President hi Shimla-ah a chho thin a. Delhi a vawh hle hunah Hyderabad-ah a chhuk leh thin a lo ni. “President hming sign-na tur file pawimawh keng hian Delhi leh Shimla, Delhi leh Hyderabad te hi helicopter-in ka kartawn zak zak reng mai maw le,” tiin ka thianpa chuan min hrilh. British-in min awp laia Governor-General te hmunhma kha President hian a rochung a, an tihdan pawh a lo la chhawm zel a ni.

Pu Kunga hi nuih ti za bang lo a ni. Tumkhat chu, “Krismas-ah ka lo haw dawn. Eng nge ka rawn hawn ang che,” a rawn ti a. Zu khap lai, zu hlut vanglai kha a ni bawk a. A rin loh tak turin “Zu min rawn hawn rawh,” ka ti mauh mai a. “Nanga zu in ngai hlei lo khan eng atan nge zu mi chah ?” a ti a. “Ka duh alawm” ka ti tlat bawk si. “A nih, eng zu nge ka rawn hawn dawn?” a ti a. “Royal Stag tih vel kha a ni mai lawm,” ka ti a. “I va han duh changkang lo. Vai ram hmun hla tak atanga inhawnsak tura chutiang lek inchah te chu, zu tha deuh hlek Scotch chin te pawh han sawi awm,” a ti a. “Eng nge zu tha chu, chu chu Scotch a ni na nge ?” ka ti he haw a. “I va’n mawl, Teachers te, Red Label etc,” te pawh” a ti leh zel a. “E, chutiangin zu hmingah Teachers te a awm ngai a ni maw?” ka han ti leh hram a. “I mawl lutuk, editor mawl tak i ni, zu tha hming pawh i hre lo,” a ti a, kan nui bawk bawk a. “Ka thiante ka present tur tal tha i tih ber kha rawn hawn rawh,” ka ti talh a. Zu tha hming hriat loh chu zahna chi-ah pawh ka lo ngai lem hlei lova.

A lo hawn chuan in a thlen hma hmain, Durlang Leitan atang hian min rawn bia a. “Krismas dawnah thlawhna ticket a harsat avangin tun tum chu Silchar lam atangin ka lo kal a. Vairengte-a Excise leh police gate-ah chuan, ‘Liankunga IAS ka nia’ ka ti a, engmah an sawi buai lo. Bilkhawthlir ka lo thleng chho a, SRS ho an lo duty a, IAS lalzia pawh an hre lo. Min zah nachang pawh an hre lo. Ka zu hawn zawng zawng min chhuhsak a, min leihbuak sak vek,” a rawn ti ta, kan nui kiah kiah a.

Zu hming hriat loh thuah hian thildangah han pakai lawk ila. 2013 kuma PM Manmohan Singh hnung zuia Brunei-a ASEAN Summit kan han chhim tum khan Indonesia khawpui Jakarta-ah India leh Indonesia Bi-lateral Summit kan rawn chhim haw bawk a. Kan thlenna JW Marriot (Five Star hotel) ah chuan zan tin hian Media-te chu Foreign Secretary te,Indian Ambassador leh Indian Chamber of Commerce te khan Dinner min buatsaih sak a. Ei tur tuhnai tinreng leh zu chu in peih athu a ni mai a. Kan in tam loh hlauin hotel boy te chuan, “Excuse me, Sir,” tiin zu chi hrang hrang an rawn chawi lêt lêt a. Ka kal dawn khan ka thianpa Mizo Aw Editor Pu D.R. Zirliana, (PM Rajiv Gandhi hnungzuia Rangoon-a lo zin tawh) chuan, “Dinner-ah khan zu tha tinreng an serve thin a nia aw. Johnnie Walker ngei kha rawn tem ve ang che,” tiin min chah a. Program a rei, mi zu in leh lam ringawt mai thlir reng mai chu a ninawm duh khawp mai. “Khawnge sawi ve reng rengah,” tiin an bar girl chu,”Johnnie Walker in nei em?” tiin inthlahrung takin ka va zawt a. “Sir, tuna kan sem mek Red Label te, Black Label te, Blue Label te hi Johnnie Walker product vek alawm,” a lo ti mai chu! Lu a lian duh hle. Hemi tum hi chuan zu hriat loh vangin ka zak ve det.

Bawngkawna a in luahtute chuan tui an hmu tha vak lo va, an bialtu tuisem nen an inbe fuh lo deuh em ni dawn, Pu Kunga chuan, “Ka tui a hal e” tih article a rawn ziak a. Kan chanchinbua kan chhuah chu PHED lam hotuten an lo hria a, IAS val meuh tuihal dangchara an dah chu zia lo an ti deuh a ni ang, an inzilh deuh nghe nghe a ni awm e.

Kum 2012 khan The Aizawl Post kum 10 tlin lawm nan Synod Coneference Hall-ah Seminar kan huaihawt a. Chumi tum chuan Pu Robert Romawia Royte, tuna kan minister zahawm tak hian “State budget pawn atanga sum hailuh dan” paper a present a. Pu Liankunga pawh Bihar atanga lo haw vang vangin, “Nitish Kumar-a hnuaia Bihar-a hmasawn dan,” tih paper a present ve thung a. Kha tih laia kan finance minister, Pu H.Liansailova Khuallianah kan hmang a. Kan resource person te pahnih hian ngaihnawn takin an sawi a ni. Hemi tum pawh hian, “I kal man tal ka lo re-imburse ang che,” ka ti a. “A ngai lo, Bihar sawrkarin tum rawh se,” a ti tlat a. Engmah kan inpe ta lo.

MJA president ka nih lai, 2013 khan Tuisual Group YMA Conf. Zohmuna neihah Khuallian turin min rawn sawm ve teh mial a. Thu ka sawi hma chuan, “Hei, nimin lamah ro kan lo rel a, kan resolution passed te hi khuallian i nih angin han re-act ta che,” tiin an resolution hrawl pui pui chu a copy min pe a. “Tuivai leh dawh that ni rawh se,” “Bagha road hi black top ni rawh se,” “Zilthaw thleng blacktop ni rawh se,” tih te “Kan bialah Sugar Mill din ni rawh se,” tih leh a dang dang te a ni.

“Thil dang hi chu sawrkar policy khawih, political will nena tihhlawhtlin chi a ni a. Keia lo sawi ve chi rual a ni lo. Sugar Mill erawh hi chu ka thianpa Liankunga IAS, Bihar sawrkara Commissioner for Sugarcane ni thin a awm a, Bihar-ah chuan sugar mill an nei teuh mai a. Ka lo bawhzui tir ang e,” ka ti a. Kut an beng dar dar. Pu Kunga chu ka zu hrilh a. Bihar-ah chuan sugar mill 14 a awm a, pakhat chu an khar tawh a, 13 an function mek. Sawrkarin a tih chuan a hlawhtling duh vak lo, private company ta vek a ni,” a ti nghal zung zung a. “Sugar Mill dinna tura company-in DPR an siam pakhat chu zerox copy siam la rawn thawn rawh,” ka ti a.A rawn thawn ta ngei a. Tuisual group YMA hruaitute ka han hrilh chuan an lawm hle. Phur em em hian Aizawlah an lo chhuk a, kha tih laia Finance Minister kha thian tha anga ka en ve ngam a ni bawk a, a hnenah kan va thehlut a. “Sawrkarin lo bawhzui rawh u,” kan ti a.

Kan ruahman dan chuan Tuivawl bial, Tuirial bial, Kolasib leh Serlui bial te hian fu huan an siam ang a. NEEPCO hydel project bul Tuirial kamah mill kan bun ang. Tuirial leh Serlui tuikhuah kual chhuakin kawng laih ni se, loneitute fu thar chhuah chu tuikhuah dil hmang tangkaiin lawngin a phur khawm theih ang a, hei baka eizawnna tha dang a awm chuang lo. Sawrkarin sugar mill rawn bun duh company te zawngin hmunhma a hawh ang a, security a pe bawk ang, tih te kan rawt a ni.

Kan minister pawh a lo phur hle. Ka han zir chian chuan fu huan hi a lo tha fu mai a. Bihar-a loneitute chuan buh (rice) an chin chuan hectare khatah Rs 60,000/- vel an thar tlangpui a. Fu an chin chuan hectare khatah Rs 200,000/- chuang an thar thei. Chuvangin an buhhmun tam tak chu fuhuanah an let tawh a lo ni a. Fu hi an chin atanga thla 11-ah an seng a, January thla hi a thlum ber hun leh a tui tam lai a ni a, January-ah an seng thin tih te ka hre zel a. Pu Kunga chuan, “A zir chiang turin farmer ho rawn hruai thla rawh, sugar mill hrang hrang ka lo fanpui ang che u. Guest House nuam tak tak an nei vek a nia,” a rawn ti nghe nghe a.

Sugar Mill hrim hrim chu ka han zir chiang a, Brazil, Australia, USA, New Zealand etc. vela an tih dan te ka hriat belh zel a. Sugar mill hi a main product chu chini a ni ngei mai. Mahse, thil dang a ken tel a lo tam mai a. Zu leh beer siam nan an hmang a, thermal power plant an siam tel a, leithatna (fertilizer) atan an hman bakah oil company te hian petrol kang chak lutuk hi a kan chak lutuk loh nan a tihnãng turin fu tui hi an lo telh teuh thin tih te ka hriat belh zel a. Thil chi nga chi rukah kan chhuah thei. Fu herna fu hmanga thermal power an siam chhuah hian sugar mill power mamawh an thar chhuah bakah an hman sen loh kha an chhehvel khuaah an supply thin zawk a lo ni a, a phurawm hle.

Finance Minister chuan, “Lo zir chiang turin Planning Secretary ka pe chhawng a, lo sawipui teh,” min ti a. Planning Secretary chu ka va lenchilh a, chu ti takin min lo tuipui lem lova. “Sawrkarin a duh chuan NLUP-ah hian rawn telh sela a ni mai lawm,” a lo ti lek fang a. NLUP-ah lah an telh ta si lo, kan hming a lo lan ve avang khan a tui lo tawk an lo awm pawh a ni mahna. A hlamzuih ta. Tu te emaw tal chuan an la rawn tihlawhtling ang chu maw. Pu Kunga min phurpuina chu kan tihlawhtling thei ta lo, a inpekna leh a inhuamna a san nen.

Mizoten Direct IAS 50 dawn lai kan nei a, an tangkaina mualah chuan an tangkai theuh. Ziakmite erawh an hlut dan a dang. An ngaihtuahna leh an thil hmuh leh hriat te midangte finchhuah leh fuih nana ziak peih an tlem hle. Pu Saiawia leh Pu Kunga an liam ta. Pu Manzuala, Pu Lalthara leh Pu PC Lawmkunga te an ni deuh tawh mai. Pu Kunga phei chu a la naupang si a, beiseina sang tak kan la neih laia heti maia min kalsan hi kan hnam tan channa nasa tak a ni.

Pu Kunga fakawm lehna chu a nupui hi a fak em em mai a. “Kan nu hi chu a fel a nia, kan in te hi vai rama ka awm bo hlana a lo sak vek a ni hi. Ka pa, kum upa lam a lo enkawl dan leh a hmangaih em em dan te hi a mak a nia. Kei chu nupui ka thlak dawn lo, nupui thlak ai chuan inawhhlum ka duh zawk,” tih te kha a tawng duh dan a ni a. A nupui hi a chawimawi thiam hle.

Hripui vangin Lockdown a ni a, kan intlawhpawh thei lo. April thla tawp lam nge May thla tir lam khan min rawn phone a. “I va reh ve,” kan inti ve ve a. thal rum lai a ni a, chawhmeh van thu te kan sawi a. “Kan huan mawng lamah khuan khanghu kung khat a awm a, phuihnam chu kan nei nual. Ral atangin ka thlir ka thlir mai a ni, lo leng la rawn vai ve rawh,” a ti a. “Lo len tur a nih chu,” ka ti na a ka leng hman ta lo. Chu chu he khawvela kan inbiak tawpna tur a lo ni ta reng mai.

Mi thil phal, ui nei lo, mite tanpui inpeih at reng mai a ni. Kan ngai dawn hle mai. A kalsan a nupui leh a tu leh fate Pathianin thlamuanin awmpui zel rawh se.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy