Daily Newspaper

KA ZÃNTIANG TAWMMANG

17

Dr. C. Lalrampana

England & Italy football final, 2021 zana ka zantiang tawnmang (dream) lamah he zofate chenna Mizoram zim te, a dung mêl 200 a vang mêl 100 lek hi patling hmeltha tak angin ka lo hmu a; amah hi mihring anga inlãr ta fam chu “Pu Zorama” tiin a sakhming ngeiin ka ko mai dawn a ni. Ka tawnmangah chuan Pu Zorama hi a lo vanduai thei hle a, a khat tawkin a thenawmpa kut a tuar leh thin a, nikum Oct, 9 & 17, 2020-khan a nãk ruh vei lam hliam phung khawpin a thenawm vaipain kut a thlãk tawh a, tun thla July 9-11, 2021 chhung khan he a thenawm vaipa bawk hian na takin a bek vei lam luruh keh khi hial khawpin kut a thlãk leh a; Magnetic Resonance Investigation (M.R.I) tihsak ngai hial khawpa a hliam avangin M.R.I. report chu ngun taka bihchiangin Pu Zorama hian engvanga a thenawm vaipa kut tuar fo nge a nih? tih hetiang hian amah ngei chu ka zãwt a:

1. Notification 1875 kha ram leh ram (Nations) pahnihte inremna thuthlung niin Foreign Secretary-in British India aiawhin a nemnghet a, International Boundary Notification a nih si chuan engvangin nge Assam Chief Commissioner or Chief Secretary-in an tihdanglam theih tlat? Khatih lai khan Mizoram Sorkar i ni a, i hre ve lo em ni? A tirah i hre mai lo a nih pawhin i hriat hnuah sawiselna i theh lut lo tihna em ni?

2. Sapho min awp hma March 13, 1877-a Assam (British) sorkarin Cachar Forest Reserve 7 a puan zinga chhim lam “The Inner Line Forest Reserve” 509 sq. mêl-a zau, a ramri pawh Sec 2, Act VII of 1865-ah chiang taka tarlan tawh, Assam Forest Department (British)-in, Form No. 46 hmanga Reserved & Unclassed State Forest 1896-97 a tih chhuah tawh ni bawk, “Inner Line Forest Reserve” hi Lushai Hills territory a ni tih chiang taka tarlan ni bawk si hi kum 125 hnuah pawh engvangin nge i humhim theih loh?

3. April 1,1898 Notification No. 592B anga British sorkarin Mizoram min awp tan a, Scheduled District-ah dah kan ni. No. 921P dated the 1st 1898 section 3 cluase (a) of the Scheduled District Act, 1874 (XIV of 1874) anga Governor General in thu a lo chhuah tawh angin Chief Commissioner chuan Lushai Hills territory chu scheduled Distirct-a dah a nihna thu a chhuah a. Scheduled district-ah Central Law leh State Law hman phal a ni lova, Governor General-in Council remtihna lo chuan Central leh State dante hman ngawt theih a ni lo. Ramri tihdanglam pawh Scheduled Distict Act 1874 section 8-a tarlan angin, Governor General in Council pawmpuinain Governor/Commissioner in mipui hnena hriattirna a chhuah hnuah chauh a tidanglam thei tih i hriat si chuan tun thlengin hma i la si lo em ni, engatinge a danglam tãk si?

4. Kum 49 chhung (1898-1947) Mizoram hi scheduled district act hmanga awp kan ni a, Assam thu hnuaiah kan awm ngai lova, Kum 1935 khan British Parliament chuan Government of India Act a siam a, sec. 91-in thuneihna a pek angin England Lal chuan Lushai Hills District (Mizoram) chu “Excluded Area” ah a puang a, Government of India Act 1935-in a huam loh, abika awpna dan i nei; mahse, kum 1947 atang khan India hnuaiah i intulut tawh a; ramri tanchhan nan hman fo chi a ni tawh dawn em ni? Ngatinge i la sawi lan fo thin? Tunah he dan hi paih bo (repealed) a ni daih tawh a, enge a sáwtna?

5. Kum 1947-ah India-in zalenna a hmu a, Mizoram pawh India hnuaiah kan intulut tawh a. Sixth Scheduled of the Indian Constitution hnuaiah min dah a. ADC kan nei a, Governor awpna hnuaiah kan awm a, Inner Line Forest Reserve enkawl turin forest department kan neih hma khan Assam Forest department-in a enkawl a ni. He Inner Line Forest Reserve chhiah khawnte hi Lushai Hills area a nih angin Assamin Mizoram lamah 70% an rawn chhung lut thin a, an hah manah 30% an la ve thin. Kum 1972-a UT i neih hnuah he chhiah chhun luh hi an chhunzawm ta lo tih i hriat si chuan 30% chu chhunzawmtir turin hma i la ngai lo em ni? He ILFR 509sq. Miles hi i ta a ni tak tak lo tihna em ni zawk?

6. Inner Line Forest Reserve enkawltu an nih denchhenin plantation siamin an cheibãwl a. 1930 leh 1933-a Assam CS-in Inner Line Reserve ramri a kham danglam, Mizoram hmar lam inner line chin chu inter-state boundary atan min barh lui a, Inner line forest reserve 509 sqr. mel chu Assam lamah a dah ta hmiah mai tihna a ni. He barhluih ramri dik lo hi Mizoram UT (1972) i nih khan engmah sawi buai lovin i ramri atan i pawmpui ve leh zel tihna a ni a. Mizoram UT map atangin 509 sq. mel chu paih bovin Assam lamah an behtir a. Hei hi June 30, 1986 Peace Accord ziah pawh khan i pawmpui avangin lungawi takin remna thuthlung signed hnan a ni a, i lãwm hle aniang, ri thei chitin reng nen i thawm a ring hle a nih kha! State puitling i hmuh February 20, 1987 pawh khan Assam-ho Map siam danglam hi engmah sawi buai lovin i pawmpui ta zel a, tun hi i thleng ta a ni. A thua ramri dik leh border line leh inner line, ILFR awmzia hre hrang inti viau si, engvangin nge kum 125 hnuah pawh i chin fel theih si loh? Dik lo taka map siam danglam chu engvangin nge i pawmpui zel si?

Hetia Pu Zorama zakhnuai nãk ruh hliam leh a bek veilam luruh a thenawm vaipain a vuak khiksak chhan ber M.R.I. Report nena hmehrema ka’n zawh chian chuan ani chuan-“Ka piantirh atang tawhin ka taksa leh thisena natna lo dolettu ‘Immune systems’ heng:- Sorkar, Police, YMA, Zirlai, State Boundary Committee (SBC), Political parties, Kohhran, NGOs etc. hian chakna multivitamin an tla chham a, natna hrik an lo do hneh theih loh avangin natna hrik virus & bacteria-te chuan ka thisen cell-te ei chhiain foreign diseases:-
Buruli Ulcer.
Chagas Disease.
Cysticercosis.
Dengue Fever.
Dracunculiasis (Guinea Worm Disease)
Echinococcosis.
Fascioliasis.
H A Trypanosomiasis leh HIV/AIDS bakah Covid-19 thlengin ka vei phah a, Invasion Over Land Virus (IOLV) hialin ka thluakah min luhchilh ta a, ka thenawm vaipa hi a palianin a chak si a, amah tantu mipui lah 31,205,576 lai a nei a, tanpuitu police koh mai tur 61,310 chuang zet a nei bawk si, buh leh bal lah a ngahin a intodelh vek a, kawngpui lah a nei tha bawk si a, hneh chi rual a ni lova chuvangin, mi sawp hrep ta thin alawm mawle! Hetia mi sawp hrep thinna chhanah hian tumah inmawhpuh tur bik an awm lova, ka immune system-te hian atir atangin an thawh tur ang an thawh that loh avangin natna hrik hian ka thisen cell an ei chhe hneh tawh êm vang mai zawk a ni,” tiin mi chhang a.

A tawp berah chuan i dikna chanvo (right) humhim turin engatinge 26th January, 1950 -a din tawh Apex Court, Tilak Marg, New Delhi-ah i kal mai loh ka ti a, ani chuan-” Ka Immune systems-te hi an inlungrual lova, an tanhmunah an chiang thei bawk si lo, proof documents/supporting documents or Officially valid documents (OVDs) an nei tha tawk bawk si lo; anmahni leh anmahni an hnial thul, politic khelh nan min hmang thul, Ayodhya verdict anga awm ve thei reng atir atanga min ngaihsak that duh loh avangin ka thenawm VAI PALIANA hian a nawm a makin min sawp hrep hrep ta thin a ni” a ti a.

Ka’n harh chu ka mumang a lo ni reng a; mumang mai mah ni se thil mak tak a nih avangin ka rawn hlui ve che u a ni e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy