Kai thar mualah Bayern chak chang chang
Inrinni zan Bundesliga inkhel pakhatah hmahruaitu Bayern Munich chuan first half minute 22-a Jamal Musiala goal khat tihluh hmangin an mikhual St Pauli lakah sikhat faiin hnehna an chang hram a; nizan result tarlan hman lohah Borussia Monchengladbach laka RB Leipzig an chak chuan league-a a sang pahnih inthlauhna hi point thumah bawk a ding chhunzawm leh ang.
Bayern zinchhuak tana chakna goal awmchhun khungtu German international Musiala khan Bundesliga away game a khelh hnuhnung vawikuaah goal kua a thun tling ta.
Kartawp inkhelah hian England captain Harry Kane thawm a zawi hle a, vawikhat chu Serge Gnabry chhawpsak atanga a ball hmuh chu goal kham chungah a thlawhchhuak ve awm e!
St Pauli goalkeeper Nikola Vasilj a langsar thung a; Leon Goretzka leh Leroy Sane-a goal tur dansakin, hun tawp dawnah Germany midfielder Musiala chuan goal dang thun belhna hun remchang hmu mah se a shot an dansak.
Bayern hi Champions League lamah pawh sikhat fai thoa Portuguese club Benfica hneh zo hlim an ni a, tualchhung league lamah pawh goal thun pur pur lo mah se point thum thawkchhuak tura an mamawh tawk goal an puitlin a, point 26 niin an hmahruaina an chhunzawm.
Inrinni inkhel dangah Koji Miyoshi chuan hun tawp dawn minute 89-ah team talbuai VfL Bochum tlawm tur chhanin visiting champions Bayer Leverkusen nen 1-1-in an inhnehtawk phah.
Miyoshi goal avang khan Bochum coach thar Dieter Hecking chuan fakawm fuin bul a tan theih phah a ni.
Tun kha Xabi Alonso hoa an champion hnua season thar hmang fuh zui ta lutuk rih lo Leverkusen tan league draw vawithum an neih zawnna niin, an league game khelh hnuhnung vawiruka draw vawinga an hlawhchhuahna a ni nghal bawk.
Champions League lama an head coach club hlui Liverpool khelmuala sili fai ngawta tlawm zo chiah Leverkusen hian point 17 hum chungin Bundesliga table-ah palina an luah a, hmahruaitu Bayern Munich lakah point kua ngawtin an hniam tawh.
Champions League khel pha dang Borussia Dortmund pawh kartawpah an talbuai ve tho a, Mainz 05 mualah 3-1-in an tlawm.
Tun kha tualchhung league top flight-a vawili an chak loh zawnna ni tawhin, table-ah pawh pasarihna daih an luah tawh.
Kai thar mualah Bayern chak chang chang
