Daily Newspaper

Kaithar lakah Barca mualpho

10

Spanish top flight kaithar Cadiz muala fehchhuak Barcelona-in kutbengin khelmual an chhuahsan a, kum 1991 hnu lama a vawikhatna atan Cadiz lakah Catalan team an tlawm.

Minute riatna lekah mualneitu team tan Alvaro Gimenez chuan hmahruaina goal a tilut a, half time thlengin Cadiz hian sikhat faiin hma an hruai tlang a; second half tir lam minute 53-ah Pedro Alcala ‘own goal’ hlawkpuiin Barca chuan an siphurh an sut thei hram a, mahse, tlarhnung lamah bawk buaina tawk lehin, minute 63-ah Man-chester City striker hlui Alvaro Negredo chuan khelmual a luh atanga ball a tawh hmasakna lamah home team tana hnehna chhinchhiah reng tawh tur hringtu goal a khung a, kum 2006 hnu lama Cadiz-in top flight home match-a hnehna an chanleh vawikhatna chiah a ni.

Kum 35 mi ni tawh Negredo hian second 44 chiah khelmual chhungah hun a hmang hman a, hun remchang a hmuh chua goal lam hawia chhuihkualin, tlu chunga rawn inkhawh Frenkie de Jong chuan a dang hman lo a, Barca keeper Marc-Andre ter Stegen a paltlang tawh bawk avangin goal ruakah top flight kaithar team chakna goal a thun a, chak tura rin zawk Barca an hawihil.

Kum 1991 daih tawha Cadiz-in Barcelona an hneh tum khan tuna Catalan team boss Ronald Koeman hi Nou Camp club tan a khel a, tunah manager ni chungin Cadiz lakah a tlawm nawn leh ta a ni.

Barcelona hi inelna hrang hranga an game khelh hnuhnung pasarihah vawiruk an chak a, mahse, rinloh taka Cadiz an hneh loh avangin khelh 10-a point 14 nen La Liga table-ah pasarihna an luah pha chauh tawh a, hmahruaitu Atletico Madrid lakah point 12-in an hnfual tawh a, point ruk ngawtin Champions League khelh phakna hmun an hlat tawh bawk.

Barca hian tun season-ah holam tak taka goal chhuah an nei ta nual a, an hmahruaite’n goal thun an harsat bawk si avangin kumin chu champion zia put an harsat tluang zel rih.

Inrinni zana Catalan team shot neih vawi 21 zinga vawi 10 zet kha Messi chanpual ni mah se an captain themthiam meuh pawhin goal a khung zo lo a, mualneitu team goal-veng Jeremias Ledesma khan save tha zet zet vawinga lai a nei a, ball 18% chauh chang pha chungin Cadiz-in an counter-attacking masterclass an pholang a, an kawtkaiah hnehna lian an sualchhuak.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy