Kal tana chaw tha lo

Kal tana chaw Tha lo
Kal (kidney) hi kawchhung lam taksa peng pawimawh tak a ni a, kan taksa aTanga thil Tha lo thlifimtu, taksa tuiril balance siamtu, blood pressure tana pawimawh a ni. Mahse, kan nitin ei leh in aTangin kalin a huat tur chi thil Tha lo kan lak luh ve reng avangin kan hriat loh laiin kal chu hah takin hna kan lo thawh tir a, a lo rei deuh hnuah kalin a lo tuar ta Thin a ni. Nitin tui ti taka kan ei Thin te hi kan kal hnathawh tibuaitu a lo ni theia, chutah kal Tha lo lah hi a inthup thiam riau a, a symptom engmah hriat tur awm si loin a lo Tha lo hman viau tawh thei tlat bawk si a ni. Tun Tumah hian Times of India-in kal tana chaw Tha lo ni a an sawi te kan rawn tarlang e.

1. Ei mai theih tura thil siam sa an vawnThat: Chi (salt) ei tam lutuk hi kal tana hmelma No.1 a ni a tih theih ang. Chuvangin, thil chi hrang hrang, chhuan lum a ei mai theih tura an siam sa te leh ei mai theih tura an fûn mawi-ah te hian chi-al a tam thei hle a, chuvangin heng processed & package food an tih ang chi- a tin (canned) a an dah te, frozen leh processed meat (sausage, bacon etc), chips, crackers, restaurant a eitur an siam te leh salad dressing thlengin, hengah hian sodium a tam hle a, chu chu kal tan a Tha lo a, BP a tisang thei bawk.
2. In tur thlum chi: Thil in mai theih tura an siam, thlum tak tak ho hian mi a tihthau duh bakah zunthlum te pawh thlen theih an nih piah lamah kal tana thil Tha lo tak an ni. Kal hriselna lam kan ngaipawimawh a nih chuan heng in tur- Pepsi, Coca Cola, Fanta, Sprite, etc. kan tih ang chi te hi in loh hram hram tum tur a ni. Phosphorus an pai tam hle a, chu chu kal chak lo deuh phei chuan a lo process Tha hleithei tawh Thin lo a, kan taksaah phosphorus a tam lutuk chuan thisenzam leh ruh a tichhe ve leh zel bawk.
3. Fast food: Burger, fries, pizza, instant noodles tih vel te hi a tui si a, restaurant a an eitur siam tui tak tak te hi insum harsa kan ti Thin. Mahse, hengah hian sodium, sturated fat, phosphorus leh potassium a tam Thin si a, kal hriselna ngaipawimawh tan chuan pumpelh hram hram a Tha ber. Kan insum thei lo a nih pawhin ei tam loh tum tur a ni.
4. Phosphorus tamna: Phosphorus hi kal tana hmelma, mahse, sawi lar ni vak si lo a ni. Kan ruh aTangin calcium a lo pawt peng a, lung hriselna thlengin a nghawng thei. Phosphorus tamna chu sawi tawh angin processed leh package food te, soft drinks kan tih ang chi- Pepsi, Coca Cola, Fanta, Sprite etc te.
5. Sa: Sa lam chi ei tam lutuk hi kal tan a Tha lo. Red meat chauh pawh ni lovin, arsa, artui leh cheese thlengin a ni vek. Sa kan ei tam chuan kalin a nih tur aia nasain hna a thawh a ngai a, kal Tha lo nei tawh sa tan phei chuan a pawi lehzual dawn a ni. Kan taksain heng protein tamna chaw te hi a mamawh ngei mai a, mahse, ei dan chintawk neih thiam a ngai tih hriat tur a ni.
6. Potassium: Potassium chu taksa tana thil Tha tak a ni, mahse, kal Tha lo i neih tawh chuan potassium chu i hmelma a ni ve leh thung. Kal a That loh chuan potassium a lo balance thei tawh lo a, kal a tichhe zual a, tihrawl leh lung thlengin a nghawng thei. Balhla, sertlum, alu, tomato, avocado, coconut tui leh chhawngthawp te hi poatssium tam em emna chaw, kal Tha lo nei tawh tana pumpelh turte an ni.
7. Tih luma ei mai theih: Minute reilote chhuan luma ei mai theih tura an rawn siamsa ang chi reng rengah hian sodium, phosphorus, mawm Tha lo a tam viau zel tih hre phawt ila, hei bakah hian AGEs- chemical chi khat, kal tichhe theitu a awm bawk Thin. Heng ultra-processed food ho hi kan ei tam zawh poh leh kal Tha lo neih theihna risk a sang telh telh tihna a ni mai.