ZPM Political Affairs Committee member C Laltanpuia chuan, ZPM party din tirha an policy duan ‘kalphung thar’ chu ‘hnawl a ni leh si’ tiin tun hnai khan thuthar thehdarhtute hnenah a sawi a. Sawrkarin kum thum hmel a hmu tan tawh chungin ani chuan kalphung thar a la hmu lo niin a sawi a; chu chu mipui ngaihdan pawh a nih a rin thu a sawi bawk a.
Kan hnung deuh khan ZPM chhung inkhawmah TBC Lalvenchhunga pawhin an tihtur ti tha tawk lo leh, tihtur zinga tel lo ti leh nual si angin a lo sawi tawh bawk a. Heta tang hian ZPM hruaitute zingah an kal dan duhkhawp lo an awm nual tih a lang. Hetianga mipui hriat tura anmahni ngeiin an sawi chhuak ngam hian, ‘langtlang an nihzia a lantir tel’ te pawh a tih theih mai awm e.
Tuna ZPM sawrkar kal dan apiang hi kalphung thar chu a ni mai alawm, tih ngaih dan lo nei tawkte pawh an awm a. Mi thenkhat chuan, tun hmain sawrkarin budget-ah kuthnathawktute thlai thar leina tur a hranpain an la dah ngai lo a, ZPM sawrkar chuan a DAH a, chu chu kalphung thar a ni, an ti a. Tun hmain sawrkarin ‘aikal lak’ a titawp thei lova, ZPM sawrkar chuan ‘aikal lak’ a ti tawp a, chu chu kalphung thar a ni, ti pawh an awm a. Police lak dan thar an kalpui… tih te pawh a awm.
Opposition party lam pawhin ‘restricted tender’ chungchanga ZPM sawrkar kal dan chu sawrkar hmasate aia uar zawk an nih thu leh chu chu ‘kalphung thar’ tiin an lo tiel ve bawk a; kalphung thar chungchangah hian thu leh hla a tam tawh hle a ni.
Mizoramah hian, UT hun lai atang tawhin, sawrkar apiangin ei leh bara intodelh an tum thu an sawi ziah a, mahse eng sawrkar mahin ei leh bara intodelh dinhmunah Mizoram hi an la hlangkai lo a, chu chu kalphung pangngai a ni. Chu kalphung pangngai titawp tur chuan kalphung thar a awm a ngai a, chu chu ‘intodelh lo’ atanga ‘intodelh’ dinhmuna inhlankai a ni.
Hmasawnna thil dangte hi chu ‘sawrkar laipui scheme awm sa’ atanga dawn te, sawrkar laipui scheme siam sa pawhkhawm thiamnaah te a innghat a; chu chu kalphung pangngai a ni a, kalphung thar a ni lo. Mahse, ei leh bara intodelhna hi chu ‘sawrkar laipui scheme awm sa’ atanga hmuh tur ni lovin, keimahni’n kan ruahman ve a, chu kan ruahmanna tihlawhlting tura thawh chhuah ngai thil a ni.
Tuna sawrkar mek hian ei leh bara intodelhna tura ‘Kal phung thar’ tia sawi hlawh tur eng Plan/Policy nge a kalpui tih hi zawhna pawimawh tak a nih a rinawm. Mipui sum thawh khawm hmanga mipui tharchhuah leikhawm tih hi chuan intodelhna lam a hawi chiah awm lo e. State dang atanga chawk luh ngai lova, kan ei leh bar tur keimahni ngeiin kan thawhchhuah bak a chuang a liam state pawn lama thawn chhuah tham kan thar chhuah theih hunah chu chu ‘kalphung thar’ kan ti thei chauh ang.
Kalphung thar chu?
