ZPM-in kalphung thar a tih chu sawifiah ngaihna hre lo anga sawi a awm fo a, amah leh amah a insawifiah nghal zawk tih ZPM president Lalliansawta chuan a sawi.
Aizawl West-III bialtu MLA VL Zaithanzama’n a MLA fund hmanga an bial chhunga hna a thawh chi hrang hrang dahkhawmna (documentary) thawhkhatna a siam chu a tlangzarhnaah Lalliansawta chuan, an sawifiah fo tawh hnu ah pawh miten ZPM kalphung thar – mipui sawrkar chu enge a nih, tia an zawh fo thin thu sawiin, “Tawitea ka sawifiahna chu, kalphung thar – mipui sawrkar, tih hi amah leh amah a insawifiah nghal a, kalphung tharah chuan mipui sawrkar diktak a awm dawn. Hmalakna tur kan duan tam tak piahlamah he danglamna, mipui sawrkar tih ringawt pawh hi kalphung thar a ni tawh hrim hrim dawn a ni,” a ti.
Aizawl West III bialtu MLA Pu VL Zaithanzama’n MLA Fund hmanga hmun hrang hranga hmasawnna hna an thawh leh documentary hial an siam thei chu lawmawm a tih thu a sawi a. Vantlang hmaa phochhuah ngam mai ni lo, hmasawnna min thlentu MLA fund hnathawh tha tak an hmu zel chu ropui a tih thu ZPM president hian a sawi. “ZPM MLA mai ni lo, AMC corporator thlengin an hnathawhte a hmun ngeiah kalin ka en ve tawh hlawm a, dik taka thawh a nih chuan fund tlemte hmang pawhin hna ropui tak a thawh theih tih a chiang hle,” a ti.
Kalphung thar hi amah leh amah a insawifiah nghal – ZPM president
