Kalphung thara sawrkar hmalak meknaah hun engemaw chen chu mipui pawh chhel taka kan awm a ngai dawn tih ZPM hruaitu Dr Keneth Chawngliana chuan a sawi.
Thawhtanni ZPM party office-a inkhawmah Mizoram State Planning Board vice chairman Dr Keneth Chawngliana chuan, kan ram kalphung leh hruaitu hmasate rorel danah mipui phunnawina a tam em avangin ZPM party a lo ding a. Kalphung thar mipui sawrkar, tiin mahni inhalralin an pen chhuak a. Mipui pawhin kalphung thar hmuh an lo chak hle a, sawrkarna hial an pe ta tih a sawi.
“Kalphung thara hma kan lak mek lai hian hun engemaw chen chu mipui pawh chhel taka kan awm a ngai. Eptu party lamin kalphung hlui – Aigupta sabel an lo tawktarh bang loa, nimahse, dam lo damna turin damdawi kha kan inbarh a ngai thin. Chu damdawi chuan hna a thawh hunah chuan damloin damna a lo chang dawn a ni,” a ti.
Zirtirtu transfer leh sawrkar hmalakna dangah pawh mipuiin an thlawp ta hle a, ram tana tha tur a ni tih hriain zirtirtu transfer-te pawhin lungawi takin an hna an zawm mek niin ZPM hruaitu hian a sawi.
State puitlinga hlankai a nih hnu ah Mizoram chu special category state-a dah niin, sawrkar laipuiin duhsakna tinrengin a vur a, hmasawnna tur sum thahnem tak hman theihin a ruahman sak a; duhsakna leh malsawmna tam taka kum 37 a vur hnu pawhin ramin hmasawnna tluantling a nei thei chuang lo a, state kan nih kum atanga chhut chuan mite entawn leh kan chhehvel state-te hmasawnna kawng kawhhmuhtu tur kan nih tawh laiin, nau sawngnawi ang maiin kan than a thu tih SPB vice chairman hian a sawi.
“Heng thil zawng zawngah hian tute nge mawhphurtu tih chu mipui hian an hria. Tan lakna tur kan ngah hle a, sawrkar leh mipui kan tanrual a ngai a ni,” a ti.
Party pahnih an thawh dun reng rengin pakhat zawk an ral fo thin niin Dr Keneth Chawngliana hian a sawi a. Eptu party lian tangdunin party naupang ber an beihrawn ta chu thil thar a ni loa, tunhma politics-a thil thleng fo tawh a ni tih a sawi.
Kalphung thara hmalaknaah mipui pawh kan chhel a ngai – Dr Kenneth Chawngliana
