Formosa Foundation-in nimina Joint YMA Thenzawl hnena bawlhhlawh paihna lirthei an hlanna inkhawm hmanpuitu chief minister Pu Lalduhoma chuan, Mizorama khualzin lo kalten min fak thinna langsar tak chu khawi hmun pawh a lo thianghlim viau zel hi a ni, a ti a. “Faina leh thianghlimna hian kan ram leh hnam a chawimawi mek a, mipuiten faina kan uar deuh deuh a ngai…” tiin a sawi bawk.
Mizoram hian faina leh thianghlimna hi kan vei a, sawrkar, pawl hrang hrang, khawtlang leh kohhran thlengin faina beihpui kan thlak chamchi a nih hi. Heti khawpa faina beihpui thlak a ni chung pawh hian, kan fai dan hi a la pawnlang hle tih chu a ram leilung fate chuan kan hrechiang awm e. Hun rei lo te chhung chama Mizoram rawn tlawhtu khualzinte hi chuan kawmkar an hmu pha lova, a lang thei lam erawh state dangte nena khaikhin ralah chuan kan lo fai ve viau thin ni tur a ni, social media lamah pawh Mizoram faina leh thianghlimna, boruak sik leh sa nuam leh mihring chengte hawihhawmna an phochhuak chamchi ve ta mai a, a lawmawm e.
Hetih rual hian, mikhualte hmuh atan chauha fai tumna rilru kan pui ang tih erawh a hlauhawm tel thei awm e. A chhan chu, a lang chin, a pawnlang chin fai vuk anga lang, kawmkar vel bawlhhlawh leh viau si kan nih chuan, fai anga lang hi kan thianghlim chuang dawn lo tihna a ni. Thianghlimna hi hriselna atan a pawimawh si a, a lang thei lama fai ve vuk si, chhungril lama thianghlim lo, hrisel si lo kan ni ang tih a hlauhawm.
Supreme Court-in tourist site-te thlang a, bawlhhlawh sawngbawl dante tihhmasawn a nih theihna tura hma la tura state-te a hriattir dungzuia Mizoram pawhin tourist site pasarih a thlanchhuah-ah te, hman khat daih plastic, Single-Use Plastic (SUP) hman, hralh, sem leh kawl khap a ni a. SUP hi chu tourist site kher lovah pawh sawrkar danin hman a khap sa kha a nih hrim hrim avangin, ‘tourist site’ chauhah hian kan kengkawh khauh viau ang a, hmun dangah kan thlahzal leh mai ang tihte pawh a hlauhawm tel tho.
Tuna kan fai dan hi chu ‘a parthi awrh zawng’ a la ni deuh ber a, a ground reality-ah chuan kan la fai tawk lo a, kan la thianghlim tawk hek lo. Khualzinte chuan an hmuh dan chu lo sawi mai mai rawh se, an sawi avanga fai tak tak emaw, thianghlim tak tak emaw anga lo inngaih or lo indah mai tur kan ni rih lo. Khualzinmite hmuh theiha lo tawp viau ai chuan, fai leh thianghlim anga min lo sawi theihna tawk an rawn hmu a nih chuan lawm tho ila, mahse inthlahdah phah nan kan hmang hlauh ang tih erawh a hlauhawm ve thei a nia.
Kan fai dan hi…
