BY: Lalchhuanliana Hmar
Mizote kan vanneihna em em chu Chanchintha kan dawn atanga hun rei lote chhungin Kristian kan ni dual mai kha a ni. Chanchintha avangin tisa leh thlarau lamah pawh nasa takin hma kan sawn phah a, ram rorelna dik nei tur erawh chuan hmabak tam tak a la awm thung.
Khawvel ram ropui ber America ram hi Kristian ram a ni a, an ram danpui pawh Bible behchhana siam a niin chumi mil chuan ram rorelna pawh an kalpui thin a, Pathiana an innghah thu pawh an ram pawisaah a chuang kalh a ni. Danin ngaihpawimawh a hlawh a, tumah dan chunga leng an awm loh avangin milian leh mite te chu dan hnuaiah ang khat vek an niin an ram chu ram nuama sawi a ni. Chutih laiin Christian tamna ram ve tho, Africa ram erawh chu rorelna fel lo avangin mipuiin nasa takin an tuar a, ram nuama sawi a ni ngai lo thung. Kristian ram nih ngawt hi rorelna fel neihna a nih loh zia leh ram roreltute pawimawh dan chu ram pahnihte atang ngawt pawh khian a hriat mai awm e. India ram danpui hnuaiah pawh hian Pathian thu mila(diknaa rorelna)ram rorelna hi kalpui theih vek a ni. Mahse kan ram roreltute hian min enkawl dan hi a dik tawk lo a ni ang-Aw tuna kan ram dinhmun hi dawn ve la lung a awi nemaw, tham leh bawlhhlawhnaten tual an leng awi maw a pawi emai, te kan la ti reng mai a nih hi maw!
Kum 1946-a kan rama Political party ding hmasa ber, Mizo Union kha America ram ang khian Bible behchhana din lo ni ve ta se, ram rorelna kawngah pawh rinawmna leh diknain bul kan tan ve mai a beiseiawm e . A hnu maia party lo ding ve , United Mizo Freedom Organisation (UMFO) nen lah khan an inchemhar nghal kha a ni bera, kan Pol.party tobul kha a pian a fuh chiah lo deuh niin a lang .Kum 76 zet a liam hnu pawha kan Politics tobul dik tawk lo kan la siam tha thei lo lai erawh hi chu a veiawm khawp mai. Tunah chuan mithiam pawh kan ngah tawhin khawvel ram zau zawk kan hmu pha tawh a, Kohhrana rawngbawltu pawimawh tak takte pawh kan Politiciante an ni tawh a ni. Heti chung pawha vawiin thlenga kan ram rorelna hmuna diknain lalna a la chang thei lo hi ram rorelna dik tawk loh vang a ni ber ang. Politics kalphung hi siam that a harsa a nih pawhin, Politician zawkte hi insiam tha se la, dikna leh rinawmna nen ram rorelna hi kalpui mai thin se, mipui chuan kan zawm mai ang. Rorelnaa Pathian ram thlentir hi ringtute tan thil harsa tur niin a lang lo va, rinawm leh dik taka dan hnuaia hna thawh mai hi a ni, hei aia ‘rau’ hi a awm hranpa lo. Tuna kan ram awm danah hi chuan dan leh thupek kenkawh kawngah kan dul hle a, hei hi rorelna fel tawk lo nghawng niin sualna hrang hrang tingampatu pawh niin a lang.
Kan ram rorelnaa Pathian ram(diknaa rorelna) a thlen theih lohna chhanah hian mitinin mawh kan phur vek chung hian ram roreltu apiangte hian mawh an phur zual a ni . Mizote hi kan sual hran lo va, thuawih thei tak hnam pawh kan ni a, roreltu lu ber atang hian dikna hmangin huaisen takin ram rorelna hi keng kawh ngat se nasa takin hma kan sawn ang.Vawiin thlenga kan mutan la ni reng chu kan ram roreltute hi sual tinreng bul, tangka sum ngainatna bawi atanga an la chhuak thei lo hi a ni.Kan rama sawrkarna chelhtu Ministers leh MLA apiang (deuhthaw) te hausa chak lutuk leh ram hmasawnna hnathawh tha thei si lo hian mipui min tibeidawng lek lek thin a nih hi. An hlawh zat leh an in lo-ram (assets) inmil lo lutuk atang hian mipui chanai hi a pelhe nasa tih a chiang mai a, an taksa thlengin rei lote chhungin an mam kung kung zel mai a ni. Hei hian hlet nasa takin a chhuah a, an hnuaia sawrkar hnathawk thenkhat, an thurualpuite leh mi hlemhlete tan eirukna kawng zau tak a hawng a, ram leh mipuiin kan tuar thin a ni. Mipuite pawh hian kan chanai min eiruk sak tute hi tute nge tih hriain kan thikthu hi tichhe ve ila, mi pamhamte hi i hnawl teh ang u. Ram hmangaiha insawi thin, ram hmasawnna tur aia mahni inhaivur ching ram roteltu neih hi mizo kristiante hian kan mamawh lo va,ram hmelma an ni tih i hria ang u.
Kohhrana rawngbawl hna leh ram rawngbawl hna hi inrem taka kal dun tur a ni a, Kohhrana kan inzirtirna kha a takin ram rorelna hmunah kan lantir tur a ni ang. Pathian rawngbawl hna ve ve a ni a, rinawm leh dik taka mipuite thatna tura thawhna tur hmun ve ve a niin thliar hran tur a ni lo .Kan ram roreltu tam takte hi chuan ram rorelna(politics) hi Kohhrana rawngbawlna nen an dah hrang tlat a, an eiru hreh lo thin a ni.Mipui rawngbawltu an ni tih inhre lo ang hrimin an inhaivura, Politics hi eizawnnan hmangin an hausakpui a ni ber mai.Mirethei lam hawisana an chanai eisak thin Politiciante zingah hian Kohhrana rawngbawltute pawh an bang chuang lo a nih chuan, an tuh rah an la seng ngeiin a rinawm. Chawhpawlh nun hi Pathian huat zawng tak a ni si a,kan in enfiah theuh a tul hle a ni.
Kuminah MLA tur kan thlang dawn a, ram rorelnaa Pathian ram a thlen theihna turin zoram ringtuten mawhphurhna sang tak kan nei.A pawimawh hmasa berah chuan ringtu kan nih angin Pathian tih mi, mi dik leh rinawmte chu kan party mi ni kher lo mahse kan thlang ngam tur a ni ang. Kan ram hmasawnna daltute, eiruk ching, dawt sawi pawisa lo, pawisa hmanga vote zawn ching , tih theih loh tur hriat reng tih intiam ching, mipat hmeichhiatna leh ruihtheih laka fihlim lo,ram mipui aia mahni inhaivur ching thinte hi hnawl ngat ila, ram rorelna hmunah Pathian ram a lo thleng anga, malsawmna pawh a keng tel ngei ang. Mipuite pawh hi sum thianghlim lo lakah hian fimkhur ila, ran ang maia lei theih ni a min ngaitute hian min hmusit a ni tih hi hriain kan hnawl ngam tur a ni . Hetiang ang tih chingte hi ram hmangaihtute ni lo vin, ram hmelma an ni zawk tih i hria ang u.Ram hi Lalpa ta a ni a, ram rorelna dik hi a duhzawng tak a ni tih i hre nawn fo ang u.