Daily Newspaper

KAN MI THIAM TEN MIZO TAWNG ZIR THA LEH DEUH SE

15

-R.Lalfakawma, Seling

Hmanni chu kan nau doctor pakhat
hi ka pum nawm theih loh avangin ka rawn ve e ka tia. Ngaihthlakna nen, ka thil ei in thinte nen lam min zawh hnu chuan ka nat chhan leh nat dan ni awm tak tak hi Sap tawng titih hian a sawi teuh mai a, ka ngaihthlak uluk tehlul nen hriatthiam aram pawh ka nei lo. A ei dan tur, a lem nen lam min ziahsak vek hnuah damdawi dawrah ka lei a; hriat rengna tha lo tih takah a lemziak milin ka ei thiam hram a ni.

Mizo tawng hi kan hnam tawng a nih rual hian fiah taka thil sawi tur chuan thiam that a ngai ve khawp mai a. Kan thiam loh luatah mi fel pangngai tak pawh biak har, in-duh, tawngkam chhe hman hrat nih zawng zawng thlengin a lo hlawh theih dawn a nih hi. A bikin kan doctor tam zawkte hi chu Sap sikul chhuak, Mizo tawnga an tawng changa lei chawitir hial tawk tawhte pawh an ni ve thei. |henkhat phei chu Chatur-a(3 Idiots) ang deuha Vaki tawng thei ang chi kha an ni mial thei bawk. State pawnah doctor ni turin an zu zir leh ngar ngar a, an nun dan ngaihtuahin Mizo tawng thiam viau chu a har ang. Chutah damdawi lam leh natna kaihhnawih thil phei chu Mizo tawnga sawi fiah vak ngaihna awm lo kha a la ni zui a, an tawng kan hre thiam vek lo hi Sap tawng an intih thiam vang pawh a ni lo, a tlukpui tawng hman tur kan neih mai loh vang zawk a ni.

Doctor-te chang an ni lo, Sap sikul chhuak leh phai lama lehkha zir zawng zawngte pawh hian Mizo tawngah harsatna an tawk ve tho a ang. Tun hnaiah TV kal tlanga mipui inzirtir kan uar tharin kan tih zel hmel a; Covid hripui karah chauh lo pawh hetianga inzirtirna hi a pawimawhin a tul hle a ni. Hetianga hun rawn hmang thinte pawh hian an thusawi tur hi awlsam zawka a ngaithlatu ten an lo hriat thiam theih nan Mizo tawnga sawi fiah zir hmasa thin se a duhawm hle mai.

Tuna kan kal tawh chin en hian duhaiin kan mi thiamte hian an sawi fiah tawk lo fo. Dangawk ang deuh maia sawi tum sawi fiah zo lo, Sap tawng nena mam zat lova nam liam tak mai mai hmuh tur a awm thin. A chang leh Sap tawng leh Mizo tawng kaih kawp, a sawitu lam pawh an chiang ta lo em ni tih tur khawpa thusawi awmze man har te pawh kan hre ta fo mai. Anmahni lamah chiang teh mah se, a ngaithlatute kha a hlawkna tel tur an ni a, an hrilh leh zirtir tur ber ten an hriat thiam hleih theih loh chuan a sawt mawh viau ang chu. A changkang leh thiamna sang nei, a hotu leh lal apiang te hian kan tawng an hman dik leh thiam hi a tul zual a ni.

Mizo tawng thiam tak kan tihte hi mihring mihrinna kawngah pawh mi fel kan tihte an ni duh chawk a; hei hi eng dang vang ni lovin Mizo tawng an thiam that vang a ni. An tawngkam a hawihhawm a, a hun leh hmun azira tawngkau chheh dan tur an hriat avangin mi an tilunghnur mang mang lo. Anni kianga thusawi te hi a nuam a, ‘chhanna nemin thinur a tikiang thin’ tih thu ang deuh khan mi an hnialna tawngkam leh zilhhauna thute pawh ngaihthlak hrehawm a ni ngai lo. Fiah tak leh chiang tak si, a dawngsawngtu tana lei la viau si lo ten an sawi thiam a, pawm a nuam bik em em mai a ni. Sawi tur thuhmun, tawngkam hman thiam leh thiam loh vanga suala sual lo thei kan nih avangin Mizo tawng thiam that hi a hlu viau a ni.

Doctor-te hi kan rilru leh taksa tana mi pawimawh an nih avangin an chungchang pawh sawi tur a tam. |henkhat chu biak nuam, damlo tan pawh an aw ka avanga dam phah sawng sawngna tur chi an awm laiin ‘ka lo pan ta kher kher kha…ka pan tawh miah lo vang’ tih tur khawpa inchhirawm ang chi pawh an awm tho. Engpawh ni se, anni ber hian Mizo tawng hi thiam tha se a duhawm ber mai. Natna avanga lungngai, beidawnga indawm kun mekte rilru hnemtu, thlamuantu lo ni tel thei se a va duhawm em! Nei leh nei lovin, neih thinglung khawngin kan pan ve a, tawngkam bul leh ngaihthlak hrehawm ang chi an hman phei chuan damlo tan nat belh loh rual a ni lo. Thiam dan inang rau rauah pawh mahni mihringpuite laka rawngbawlnaa ngai ang chi chu mipui pawhin kan hriain kan pan uar ta zel zawng a nih hi.

Vai hang deuh pakhatin, “I hnam tawng hmang uar la; a nih loh chuan kum 20 hnuah chu tawng chu a ral thawthang ang. Sap tawng nal taka i tawng theih vanga i kianga mahni hnam tawng ngei hmangtute i hmusit a nih chuan zahpuiawm tak i ni; Choak Arawn chang tawn an sawi ang chauh, mi thawmhnaw hawha inthuam mawi chawp mai i ni e” a tih thu hi social media lamah ka chhar a, dik khawpin ka hria. Mahni hnam tawng leh hnam zia zahpui hi hnam ral tur zia a ni si a.

|awng humhalh a tul thute hi kan han sawi ve viau a, kan mi thiam zawkte tawnghmang en hian kan humhalh rei thei lo mai ang tih pawh hlauhawm zawk a ni. Kan chhehvela hnam dang zawng zawng hian min humhalhpui dawn hauh lo va; keini a hmangtute ngei hian hma kan lak a ngai e. Sap tawng hmanna hmunah chuan sap tawng dik leh puam nalh bera han tawng talh talh tur chu a ni ngei mai; mahse, kan Mizo-puite thil hrilh turin Mizo tawnga kan sawi fiah thiam lo a nih chuan Mizo tawng hi i zir tha leh deuh mai ang u hmiang. Mizo tawng zir tih hian A AW B atanga zir that leh lam ni lovin kan mamawhna zawna kan hman tur tawngkam hawihhawm leh tawngkauchheh mawite hi a ni.

Kan sukthlek en hian hnamah kan chiang ve tial tial a; hnam zia leh tawng humhalh duhna rilru pawh kan nei lian ta viau; Mizo tawng thiam loh changkanna a ngai pawh kan tlem tial tialin a rinawm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy