Daily Newspaper

Kan mimal nunah zir tawp ni a awm lo – Ruatkima

9

I&PR Minister Lalruatkima chuan, “Mihring chu inzir reng tur kan ni a, zirna tâwp a awm lo, hriatbelh tur nei vek kan ni a, kan mimal nunah zirtawpni a awm thei lo,” tiin nimina St. Joseph Higher Secondary School-in an school atang la kumina HSLC leh HSSLC top 10 a langte chawimawina hun an hmannaah a sawi.

St. Joseph HSS hi kumina HSLC leh HSSLC result chhuakah private school-ah chuan result nei tha ber pawl an ni a, HSLC top 10-ah 3-na leh 6-na neiin, HSSLC Arts-ah 1-na, 2-na leh 10-na neiin, Commerce-ah 1-na, 5-na, 8-na, 9-na leh 10-na neiin, Science-ah 4-na leh 6-na an nei bawk. Hei bakah hian HSLC-ah SS leh Hindi-ah subject topper neiin, HSSLC-ah Home Science, History leh Biology-ah te subject topper an nei bawk a ni.

Nimin khan an school-a heng top 10-a tlingte lawmpuina leh chawimawina hun an hmannaah minister hi khuallian niin, zirlai hlawhtling tharte a lawmpuithu sawiin, “Hlawhtling turin hrehawm tam tak tawrh a ngai a, chumi tuar tlangte chuan a tawpah hlimna leh lawmna an chang thin,” a ti a, “Hlawhtlinna bul berah Pathian a ni. Hlawhtling turin Pathian malsawmna a ngai a, Pathian nen chuan hlawhtlinna a awm. A dawtah nu leh pa, kan lei pathiante an ni,” a ti bawk.

Nu leh paten an theih tawp chhuahin lehkha an zir theih nan hna an thawk a, chuvangin hlawhtlinna kan chanin kan chawimawiin enkawl let ve chu kan tih tur a nih thu a sawi a, “Kan nu leh pa-te thawhrimna chu hlawhtlinnain kan rul let ang,” a ti bawk.

School neitute leh zirtirtute an pawimawh thu sawiin, “Min zirtirna avanga hetiang thiamna hi kan nei tih hriat a pawimawh. Khawi hmunah pawh awmin, eng dinhmun thaah pawh lo ding ila, chung hunah chuan zirtirtute ngaihsanna hi hloh tur a ni lo, anmahni atanga finna leh thiamna nei kan ni,” a ti bawk.

Zirlai hlawhtling tharte chu an kal zelna turah fuihin, “Khawvel hi survival of the fittest an ti a…a thei apiang an dingchang. Eng kawngah pawh mi el a ngai a, el ngam turin kan rilru a huaisen a ngai. Ka tlin ve lo ang tih ngawt tur a ni lo a, theih tawp chhuah a bei zel tur kan ni,” tiin central service lamah pawh lut thei tura tang tura fuihin, tun anga kan awm zel chuan kan ramah sorkar hna lian thawktuah hnamdang kan nei zel mai ang tih a hlauhawm thu sawiin, “All India Service hi hnamdang chauh tlin theihna tur a ni bik lo, keini Mizo te hian kan tlin a, kan thluakin a phak ve a ni tih i hria ang u,” a ti bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy