Daily Newspaper

KAN MIT FUKNA – AIZAWLERS

33

-Mahmuaka Chhakchhuak

Khatia Rangvamual lama kal in tam em em thin te kha tunah chuan khawhar thlak khawpin a reh tawh ngei a beiseiawm. Hripui leng hi tu emaw mit hmuha hlau ang takin in lang thin a, hmuhlohna ruamah chuan in pawisa leh chuang der bawk si lo. Bazar hmun leh dawr velah in inzial mup mup bawk a, Pathianthuin eitur aiin nunna a thupui zawk lo ang em ni a tih te kha a chang hi chuan in hre tawh lo ni mai hian kan rawn hre thin che u. Kha, beisei loh deuhin Petrol lakna hmuna thawk chu a lo positive leh daih a nih kha. Nakin lawkah chuan rin lohna hmun tak tak atangte hian positive an la awm leh lo ang tih a sawi theih miah loh bawk avangin fimkhur hle teh u.

Aizawl khawpui hi State Capital niin thingtlang hmun hrang hranga awmte hian eitur kan chawk luhna hmunpui ber a ni a, chhun leh zan chawl loin lut leh chhuak a inpelzut zut reng a nih hi. Damloh nikhua leh dinhmun derthawnga damlo kan awm pawhin kan rawn pan ber a ni lo thei lo bawk a, sorkar lamah pawh hmunpui bera kan neih a niin engkimah kan innghahna ber in ni. A rethei ber atanga hausa ber thleng pawha neih chhun ang anga hmanraw chi hrang hrang kan lakna hmun ber a nih bawk avang hian hetia ni rei lo te lockdown in lo ngai ta pawh kha keini chuan pawi kan ti viau asin. Aizawl dawr lian tak tak te’n nikhat inkhar ngai pawi inti ang bawk hian keini pawhin nikhat emaw lek Aizawl rawn luh theih loh hi pawi kan ti a, hrehawm kan ti tak zet a ni. A chhan kan hriat ve tho bawk si avang erawh chuan tumah kan dem thei bik chuang si lo a, chuti chung erawh chuan lockdown ngai tawh lo hram se tih erawh in duh dan a nih kan rin ang bawkin keini lam pawhin kan duhthusam ber a ni. Lo fimkhur zel phawt teh u.

Zingah khawchhak lam atangin Ni a rawn chhuak a, tlai lamah khawthlang lamah a tla leh thin tih ang maia ngaih awlsam ngawt tur a nih lohzia chu vawiinah chuan kan hre theuh tawh ngeiin a rinawm. March thla te kha chuan mi pakhat chiahin a kai a, chu pawh foreign atanga lo haw a ni nghe nghe. Mahni awmhmunah kan lo sawi ve sep sep a, a hnu deuhah phai lam atanga zirlai rawn haw te atangin kai an awm lehin state pawn atanga Mizoram rawn lut te chu kan thinlungin a tinzawn deuh thup a. Nimahsela vawiinniah chuan Aizawl khawpui hmun hrang hrang atangin kai thar an lo awm ta pheuh pheuh a, hmun tinah ralkhel dar vuak rik alo ngai ta hial a nih hi. A sual sual leh a thawhchhuah atanga ni lo, a eiruk vanga in ropui tak tak nei te bakah chhungte khap beh zawh loha pawn chhuah hrat te chauhin kai tura lo ngai kan awm a nih chuan a dik lo chhia va chiang ngawt ang le. Naupang rilru thianghlim tak pawhin a duh reng vang ni lo, vanduai vang liau liauin a lo kai ta tlat mai bakah nitin eizawnna bera neitu petrol pump a thawk tlangval fel tak pawh chuan hei a lo kai ta mai si. Vanduai thilthuah nang leh kei, kai inbeisei lo tak leh thawveng taka lo nui uar uar ngei pawh hi he hripui hian min la rawn man hun a awm maithei a ni. Lo fimkhur zel teh.

Chhim lam khaw pahnihte chuan mikhual neih an remti lo a, anmahni khaw bil chauh tuallai len an remti a ni awm a. Khaw dang chanchin ka hre tam lo a, hmun danga hetianga mikhual neih remti lo hi an lo awm ve maithei e. Hetianga lungrual taka mikhual neih rem tih loh hi pawi ka ti hauh lo mai a, rah tha tak pawh a chhuah ngei a beiseiawm. Fiamthu nena he hripui hi sawi liam mai mai chi a nih lohzia chu tuna Aizawl khawpuia chengte chuan in hriat chian ngei kan rawn ring che u a. Hmun dang atanga damlohna leh hnathawh tulna leh thildang pawimawh vanga Aizawl kal, lockdown hnan te phei chuan in chian lehzual kan ring che u. Mimal eizawnna chu a nghawng ngei ang a, a tuartu pawh kan ni ngei ang, nimahsela kan Pathianthuin eitur aiin nunna a thupui zawk lo em ni a tih thu kan sawi tawh angin vawiinah chuan nunna hi i dah pawimawh hmasa phawt ang u hmiang. A rukin chhuah tum kher lo ula, sorkar lamin tih tur a tih leh tih loh tur a tihte kha zawmin thuawih tak khan awm phawt ula tiin hmun hla tak atangin kan rawn ngen ngawih ngawih che u a ni. Nangmahni vanga he hripui hi darh thei reng a ni si a.

A bik takin Aizawl khawpuia dawrkaite khan in thil zawrhte kha tih to phah lo hram ula tiin kan rawn ngen bawk duh che u. Lockdown chhung hi a rei maithei a, a rei lo maithei bawk. Engpawhnisela, lockdown zar zo tuma hlawkna um lo tum lo hram turin kan han ngen duh a che u. Dawr bungraw lak tur a awm remchang lo a nih pawhin in kawl chhun chhun te chu a rate pangngaiin zuar tho ula, in hralh zo hma deuh a nih pawhin a zo hma a nih hi ti ve mai rih ula ava tha dawn em. Mizo hnam hi Nuaih 12 chuang awrh chauh kan la niin kan la tlem em si a, inhmangaih viau tur kan ni. Zo nun zemawi – Tlawmngaihna par chhuahtirna hun pawimawh takah ngai thei ila, cheng tlemte hlep duh vang ringawt chuan unau i inti vuivai lo hram teh ang u. Kha cheng tlemte vang khan kan hausak phahin kan retheih phah kher ring lo ila. He hri leng hian kan zonun zemawi ti dal lo sela, parchhuahtirna hun atan hmang thei zawkin thenawm hnaite phei chu chawhmeh te insuah fo thin zawk ila, a tlem emaw a tam emaw, a awm ang anga ei za turin tuna Lockdown hnuaia awm mek – Aizawler te kha kan rawn ngen duh che u a ni e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

1 Comment
  1. Rk Laldawla says

    He hrileng hian min beng harh mawlh teh se.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy