Daily Newspaper

KAN MLA TE HNENA THUCHAH

38

-Mahmuaka Chhakchhuak

Pu te u, kan ngaisang che u a, kan zah em em bawk che u a ni tih hi thil dang zawng aia sawi hmasak ber kan duh a. State rorelna hmun sang bera thu thei tura in beihna leh in thawhrimna a ropuiin kan chhuang em em bawk che u a ni. Keini rual tan chuan dam chhung pawha kan nih phak loh tur dinhmunah in ding a, in chevel engkim mai te hi kan mit fukna ber a nih zel bakah in tawngkam te hi kan bengah a ri ring bik bawk thin. Party Politics lam sawi lo mah ila hetiang dinhmuna in ding hi chhung leh khat tan pawha inchhuanna tham a niin in kawmthlangte tlangval pawh lo induh ve ngawt pawh nisela a sual kher awm chuang lo e.

Assembly House chhunga in thut hma te khan zirlai pawl leh tlawmngai pawl hrang hrangah te thahnemngai takin in lo inhmang tawh thin a, a thente chu zirna sang tak tak zirin Doctorate Degree neite ngei pawh engemawzat in awm bawkin nangmahni line theuhah chuan in in chhuanawm hlawm em em a. A thente chu kum tam tak Politics field-a lo cheng tawh niin kum 25 zet MLA lo ni tawhte in ni bawk a, engti kawng pawhin sawi pawh ni ila keini ve ngawt ang mai in ni lo hrim hrim tih kan hriat vangin kan chhuang hlawm che u a ni. In ram vei zia te, khualliana in tanna hmuna in thusawi thatzia te kan ngaihtuahin he kan Zoram tana ngaihtuahna in lo hman nasatzia tur te a hriat theih mai bawk a, in thlazar hnuaia awm mipuite hi kan hlimin hmabak eng hle tein kan lo hre ve a ni. Thiam taka ‘nangni hi kan VIP te in ni’ tia mipui dah pawimawh tak anga thu in han sawirik kan hriat phei hi chuan lawmna vangin kut kan beng ring thei teh mai asin.

Chutianga chhuang taka kan lo thlira nangmahniah beiseina sang tak kan neih reng lai chuan rin loh leh beisei ngai loh thil te hi nangmahni atang zawkte hian kan han hre leh thut thut thin a. Kan ram hruaitu ber – Chief Minister-in a awmna party leh a hnungzuitu MLA te hriat phak lohin Mau a buaipui chiam te leh ala buaipui chhunzawm zel tih kan han hriat te hi chuan mak tihna kan nei a. Sorkar Flagship Programme hlawhtlinna atana Board 14 din chungchangte hi mak kan ti bawkin, an hnathawh ber pawh kan la hre mumal lo a nih laia Board pakhat tana thlatina Rs. 159,730/- sen ral a ni a, Thla tina Board 14 tana Rs. 2,236,220/- a ni leh Board 14 tana kum khata Rs. 26,834,640/- senral a ni thin hi in VIP te hian uihawm kan lo ti a ni. Hei mai ni loin a hmutu tur hriatsa renga tender chhuah thin leh chumi anga kum 2019 atanga 2020 Aug thla chhunga hna 108 lai, Cheng Nuaih 70,000/- man zet pek a ni te hi kan hriat phak tawk hian mak tihna min thlen tho tho a nih hi. Kan Chief Minister zahawm takin tawngkam fiah taka ‘Chhungkaw tinin cheng Nuaih 3 theuh in dawng dawn a, NLUP dawng tawh zawng zawng pawhin in dawng vek ang’ a tihte kha chilthli thlauh duah duah chunga kan tlirna lamah kan mitmu a pawng zo dawn ta a nih hi.

Nimin lawk, Sept. 22nd, 2020 nia MLA 8 laiin lungrual taka in MLA-pui Lalduhoma chawlhtir tura Speaker hnena lehkha in thlen thu te kha mak kan tiin a chhan in sawi te kha a naupang thu mange kan tih bakah ram hruaitu rual thiltihah chuan a te nau kan ti hle a ni. Pu Lalduhoma hian thilsual a tiin mawi lo takin a khawsa ta e tih pawh engmah awm bawk loin ZPM Party thiltihnaah a tel tam tih emaw vang chauha hetia a MLA puite’n in hek mai hi Pu Duhoma tha tih leh fel tih em em vang pawh ni loin mak kan ti a. In bial mipui nih pawh a zahthlak mai dawn hialin kan hria a, Sept. 24 nia MLA pahnihin inthlahrung hauh loa Pu Lalduhoma banna turin Speaker hnena lehkha an han thehlut leh bawk tih kan hriat phei hi chuan kan lo ngaihsan leh tunhma lama kan lo chhuan em em thinna che u kha in chawk chhe vek hial dawn a nih hi. In bial tan thahnemngai takin thawk ula, in bial mipuite tan hnemhnanawm takin awm ula kan fak mai tur che u a nih laiin hetianga thil atthlak tak inti ta mai hi in VIP te hian kan dah VIP loh phah dawn ta zawk che u em ni le?

Rorelna hmunah chuan thu inchuh te a awm thin a, chutiang hmuna Pu Duha’n fiah tak taka thil a sawi thin leh chiang tak taka thil a sawi thin hi in lo enghelh viau a nih phei chuan in tluk lo tawp tihna a ni mai a, in dinhmun a ti derthawng dawn hiala in hriat vanga hetianga thil ti ta hi in ni em ni zawk ni ngai le. In VIP te hian in che vel hi kan lo hmu ve reng che u a, tunhnaia in thiltih ngei pawh hi kan lo hre vein keini pawhin kan tih duh loh tawp tur niin kan hria a, Ram hruaitu rual thiltih atan meuh chuan a ropui lo hlein kan hria a ni. Keini thlirna lam atang chuan Pu Lalduhoma hi in tluk lo a nih pawhin amah tluk thei turin in zir ve ula, in bialah theih tawpin hnathawk ula mipui fak leh chawimawi in hlawh ve mai ang te kan lo ti a ni. Opposition MLA chauh mai a ni chunga hetia thil ho tak hmanga in han hek ta zel hi Opposition beihna atan pawh hmanraw tenawm berte zing ami a nih hial thei ang a. Nakinah hian MLA alo ni ta lo a nih pawhin keini mipui te hi chuan kan dah chungnung tho tho hmel ta zawkin, nangni House chhunga la thu te ai hian kan dah sang zawk ngei bawkin a rinawm. A chhan chu in thiltih hi nakin zela la zahthlak tak tur a ni tlat siin in hming te nen kan la sawiri reng dawn ngei bawk si a.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy