Daily Newspaper

KAN NIHNAAH CHIANG ILA!

19

-Zoremi Hmar Zote

Kan hri lêng kârah tawngkam mak pui pui, kan la hriat fo loh atanga kan hriat hnu tho, kan sawi zen zen loh tam tak a lêng vel mek tih kan hria a. Kum lama upa deuh ten, ‘ni maia an hriat dan’ an sawi dan tam tak hian nun a tihlimin, hri vanga rilru pik chúk mai pawh a vai kiang fo mai. “Kawvin naity vanga heti tak maia kan han buai mai hi chu aw! A en chhin na’n chuap sampul chuap sampul an ti a, a reh thuai loh phei chuan chuap nei alawi pawh kan awm lo thei hial ang chu!” tih te hi, nuihzatthlak miah loh, hlimpui loh theih si loh a ni.

‘Ram leh hnam hmangaih inti theuh zingah hmeichhiain nge hnam phatsan ching zawk mipain?’ tih vel sawi rik hlek chuan a mipa lamain hnam dang pasala nei, hnam dang fa pawm, hnam dang laka gold digger leh an hriat phâk chin chin, an hriat phâk lem loh pawh thiante zara an hriat, belhchian dâwl leh dâwl lem lo thlenga rawn sawiin, nilengin an hman leh em em ang a.

A hmeichhe lamah pawh hnam chhan bur, a vâi a sâp thliar lova ‘kei zawng ka thlang Mizo vâl ngei’ ti chunga mahni ngaihdan huaisen taka rawn àu chhuahpui ngam kat nuk kârah, ‘an inhmangaih chuan a tha mai alawm, mi nunah lo inrawlh suh u’ ti pawl te, ‘Mizo mipa in nêp ém alawm’ ti ta mai pawh kan awm leh nawk ang. Kan nuna inrawlh an awm loh chuan mi pangngai anga khawsak leh seilen hi thil theih loh tluk a ni.

Kan nu leh pa, kan nuta/laizawn te hi kan nunah inrawlhtir ngam ila. Kan thenawm khawveng leh kan khawtlang te, kan kohhran hruaitu te hi kan nunah inrawlhtir ngam ila, he hringnun kual kawi bumboh leh harsa tak mai hmachhawn tur hian chakna kan nei ang a, ‘ka nunah inrawlh suh’ kan tih thina te ngei hi an inrawlh kan phal em em mai dawn a ni; nun kan uluk miau chuan kan huat tura rawn inrawlhna tur hmu dawn hlawm hek lo!

Eng chu nge kan hnam zia leh kalphung chu ni ta han ti dawn ila, inhrilh thar leh hluai kan ngai kher awm lo ve. Kan zo nun ze mawi hrang hrang vawn nun te, pi leh pu atanga kan lo tihthan, kan hnam hmêl timawitu, kan lo chhuan em em thil tam tak a awm kha. Khawvel hmasawnna hrang hrangin min nangin, hman lai ang diak diaka thil tih vek theih a nih lohna chen tam tak awm mêk kârah, vawn nun theih, zawm hram hram atana tha leh lantirna hun tam tak la awm chu kan la nei ngei a, vul pawh a la vul reng e.

Intih changkàn vak pawh hi a la dik thei tak tak rih lo:

Kan nun phungah ni se, kan in chhungah pawh khumpuia mu dul tawh lovin room hran kan nei vek tawh a, sâpho tawngkam azawnga hlu lo ber mai leh âtthlâk tak, ‘it’s my life’ kan ti ve sek a, kan life a ropui leh falua chuang hauh bawk si law. Incheina pawhin hming hran a ngah teh e! Kawr leh kekawr, puan leh pawnfen, kawrlum nei mai thin kha kawr ringawt pawh hming hrang hrang kan nei ve ta. Branded kan inbel fur a,(Branded tih hi kan sawi thin dan a ni tlat!) smart miah lo pawhin smart phone kan ham tùi vek tawh. Mitthi kan han nei a, puan ‘branded’ bih furin, nulain mitthi thing/buhfai kan khawn leh suau suau tho a, kan tlangval ten iphone ak chungin thlân an lai tho tho bawk! He thil, chhiat tawh thu-a kan tlawmngaihna hi kan hnam zia-a a mawi lai ber a ni lehnghal!

Kan tawngkam leh incheina, kan buaipui duh zawng leh rimawi lama kan thlen chin te, kan hla phuah duh zawng leh a rimawi kan rem duh dan pawh kan han tikhawthlanglam ve hah hah viau thin tak na a, mitthi kan han nei a, khuang hnih rem ngei maiin ‘pialral ram nuam’ kan ti leh tho. Inneihnaah kan kal a, ‘here comes the bride’ kan ti lo; “Aw Pathian nang ngilnei ber,” kan ti. Mizo kan ni a, tih thin dan bik kan nei.

Mizo hla ngei ni si thenkhat, video nalh tak nen, a music pawh tang et awt tak maiin, Mizo ten hla rua kan tih ang ni em em lem lo, kan khawlai tawngkam tuallêng pangngaia a thu ziakin, music leh a thlûkin kan han chei mawi chiam thin tak na a, hmangaih tak tak kan tawnin emaw, kan lo inthen palh emaw a nih chuan Zirsangzela zai te, C.Vansanga zai leh hrânghlui dang zâi, hla raw nalh leh ril em em mai te chu kan lunglenna leh kan natna min chhâwktu atan kan thlang leh tho! A nih loh vek pawhin tun lai zai thiam zaiah pawh, min hnêmtu atan chuan hlâ tak tak satute zâi ngei a ni, kan thlan tho ni!

Kan tun lai hla thar tam tak hi chu thla khat lâr hlâ te, kar khat lâr hla te an ni nawk. Sawi tak ang khian, Mizote hi Mizo kan nih chhung chuan hlâ tak tak, ril leh hla thu mawi, kan Zo pumpui leh beng mil ber ngei maia kha kan la duh zel tho tho dawn a ni. Hip hop-in emaw, blues leh genre hrang hlakin bul tan mah ila, kan chungah eng emaw lian tham deuh a thlen tikah kan Mizo thisen hian ‘leikapui style’-ah min hnûk lêt leh tho tho!

A tawi zawngin, kum sawmnga pawh liam leh se Pu Rokunga hlâ leh Pu Vankhama hlâ te, Zirsangzela hlâ te leh a dang tam tak, hman laia kan hla thate kha chu an la dam reng ang; vawiina kan hla thar tam tak hi chu kan tu leh fa te chuan a awm ve a ni tih pawh an hriat mang loh turte an ni. Chutiang hla chu a tha lo ve, i phuah thin suh ang u khai ka tihna a ni lo va, changkan leh ropui kan tum luatah hian thu leh hlâ-a Mizote kan Mizona kan tidal palh hlauh ang e ka ti a nih hi. Hlâ te hi a hman hman phuah ngawt chi a ni lem lo; Mizote hian hla thu kan nei hrang bik aw. A phuahtuin uluk lo bawk, a satu lahin lo chîk bik bawk lo, a ngaithlatu lahin a hla thu apiang a thain a dik emaw lo ti ve zel bawk si hian kan hla raw neih sa, nalh leh ril em em, mawi em em mai te hi an nêk chhuak zo takngial dâwn ni tein ka hria a, ka lo lungngai lâwk a ni.

‘Khawvel a hmanhmawh tawh a, chhiar tur chi thu tha pawh, thui deuh hlek pawh kan chhiar peih tawh lo va, kan thu leh hla te pawh hi kan chîk peih tawh lo. Hla thu har deuh hlek kan hmuh leh hriat pawha a awmzia hriat tumna nei lo kan ni deuh vek tawh’ kan ti thin a, Kei chuan thatchhiat vang leh kan hnam hmangaih loh vangah ka pawm hmiah! Zaithiamte pawh hian kan hla thu leh a awmzia hi hriat tum ve teh se. Mi siam ang ang sak tawp mai kha a dik ber lo. A chhan maw, kumkhat hla hi a awm tak tak alawm: vul hluai, chuài leh nghal mai tur hla phuahtu nih leh, lo satu nih kha chu a ho dawn riau!

Kan nihnaah chiang ila, kan hnam hi pawm ila. Kan thisen hi i hai lui suh ang u khai! Kan hnam zia leh nunphung kan hnualsuat a, kan pianna chhûlah leh kan seilenna Zoram pialleiah kan dam thei lo a nih a, kan lungawi zo lo anih chuan maw… kan nun zia kan thlohthlâk hun hun chu kan nihna, kan Mizona (kan identity) kan hloh hun tur, hnam ral tur zia rawn inlàr chhuah tanna a ni dawn a nia aw.

Ram ropui hlei hleiin a ram leh hnam hmangaihtu a zahin a ngaihlu zawk tih te hi ka va’n sawi ngun tak! Mizo tawng te hi thiam tum hram hram ang u, kan tawng leh kan hnam zia kan ven him hmasak loh chuan leh, kan zahpui fo mai chuan, engti kawng maha din chhuah ngaihna a awm dawn lo. Sâp tawng a nih vangin ngaisang chiam mah ila khawthlang rama chêng te leh an sawrkar khuan kan hnam min rawn hmangaih phah dawn chuang lo, a teuh lo mai!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy