Khawvel hmun hrang hrang, India ramah ngei pawh Salvation Army rawngbawlna miten an lo dawngsawng tha zel chu lawmawm a tih thu General Brian Peddle chuan a sawi.
India Eastern Territory tlawh paha Territorial Congress 2023 hmanpui tura lokal, khawvel puma Salvation Army hotulu ber hian Thawhlehni khan thuthar thehdarhtute a kawm a. India rama Territory a tlawh pathumte hnathawh a hmuh chuan a tilawm tih a sawi.
Zawhna chhangin, Salvation Army chu khawvel ram 133-ah an inzarpharh a, miten an rawngbawlna tha taka an lo dawngsawng zel chu lawmawm a tih thu a sawi.
Zawhna dang a chhan zingah, neih inang inkawp chu Salvation Army chuan an kohhran huangchhungah an pawm loa, Bible-in a sawi anga inneihna chu mipa leh hmeichhe inkara kalpui tur a nih thu leh chu chu an pawm dan a nih thu a sawi. Chutihrualin neih inang inkawpte chu an ensan hmak tihna a ni loa, an zalenna an zahsak a, a tul hunah puih an ngai a nih pawhin an pui thei reng tih sawiin, “Mitinin Pathian hmangaihna an hriat theih nana thawh hi rawngbawlna pawimawh ber a ni,” a ti.
Salvation Army-in Mizoram People Forum an zawm ve loh chungchang zawh a ni a. A hre thui lutuk lo na in, an ni chuan politics kaihhnawih leh heti lam hawi hmalakna chu an luhchilh ngai loa, diktak leh ralmuang taka inthlan kalpui a niha ram hruai a nih theihna tur erawh chuan an auchhuak thin tih a sawi.
Territorial Congress 2023 hi vawiin, February 1 atang hian Aizawl Temple Corp ah tan tur a ni a, February 5 thleng a awh ang. Hemi hun zawng hi General leh a nupui, World Women’s Ministry president, Commissioner Rosalie Peddle te chuan an hmanpui dawn a ni