Daily Newspaper

KAN RING CHE U!

21

-Zoremi Hmar Zote

LC leh VC member atana thlan tlinte zawng zawng, thinlung takin ka lawmpui che u a, Pathianin in hma hruaisak cheu-in, in hnenah awm zel se la, dikna leh rinawmna, kan Zo nun ze mawi hian kiansan lo cheuin, kan ram tân malsawmna ni ngei ang che u tih hi, ka duhthusam leh ka tawngtaina a ni.

Heti khawp hian kan hri lêngin min chiah hnehin min chaih buai emaw tih laiin, rin loh tak maiin veng tin leh khaw tina VC/LC thlanna chuan boruak tha leh chanchin ngaihnawmin min vawm lêt hlauh mai le! Vote a tla tha a, hri lêng hlauhna aia ram leh hnam hmangaih zawkna zia lo lang chhuak hian thla a timuangin, lung a va tiawi tehreng êm!

Chutih laiin, puipunna hmun thenkhat hlauhawm an chan mek lai leh, a huho deuha inhàwr khawmna deuha lo vanduai tawk kan awm thin bawk si avangin, tîm loh tak tak a har em em a. Fiamthu titak deuhin, “Chumi venga chumi hmuna vote thlâk te chu in report tur a ni a, mahni ina lo inkhung rih tura ngen in ni bawk e,” min ti mai ang ah; social distancing maintain tak tak a har khawp mai si a. Kan vanduai palh hlauh chuan a pawi darh tha suau suau dawn êm mai tiin, kan nui bâwk bâwk hlawm kha a ni a. Sawi tur ting chu lo awm ve tho mah se, Pathian vènna leh kaihhruaina zârah liau liau, rin phâk bakin kan him tlâng hlawm niin a lang a. Hei vang hian Zoram mipuite hian Pathian hnenah lawmthu kan sawi mawlh mawlh tur niin ka hria.

Article hmasaah khan, vote thlâk hi khua leh tui tha nihna a ni a, ka tuina lam a ni lo tih leh, tu hi nge thlan tlâk tih pawh ngaihtuah peih miah loh chu ram hmangaih zia a ni lo ve kan ti a nih kha. Mipui ten khua leh tui tha kan nihzia kan lantir ta bawk a, kan ai awhtu tura kan thlante, kan VC leh LC tharte pawh an phûrin, theihtawp chhuaha min enkawl, min hruài an châk sawtin ka ring a ni.

Kan han thlan tlin tâkte zingah khan, thlan manhla deuh, kan veng leh khaw tana chhawrnahawm ve deuh leh, hmasawnna kawng tam tak hmuh theiha lo awm ta, mahni nihnaa chiang tam tak an awm ngei ngei dawn a. Chhutih rualin kar hmasaa kan sawi tâk ang deuhva mahni inhâi vûr ngawt ngaihtuah, mahni party sawrkarna hnuaia VC/LC member nih tâk avanga contract hna ringawt lo ngaihtuah a, lo hausakpui phêt tum pawh an kat leh nuk dawn a ni. Mahni veng chhung kawng chhia aia an in sakna ban lian vei zawk te, khawtlanga thu neih nuam ti em em, eng nge ka mawhphurhna, eng ti tura thlan nge ka nih tih leh, ka hnen atang hian kan veng/khaw mipui, min thlang tlingtute hian eng nge an beisei tih lam ngaihtuah leh chuang miah lo, Chawke lala lal ve ringawt sawi tur pawh kan haihchham leh miah dawn lo! Hêngho hi chu ram tinin kan kawl a, chhinchhiah a, thlan tawh loh mai tur.

LC/VC thar te u:
Hruaitu tha chuan hun rei lo te chauh pawh a hmang tangkaiin veng chhungah hmasawnna rim a nam nghal a. Hruaitu tha nihna chu in leh lo thatah te, lirthei neih thar tâk danah te a innghat lo va. Veng chhungah leh khawtlângah a ni, a lan thin ni. Ram leh hnam hmangaihna tak tak nei lo chu kum sawmhnih panga pawh VC/LC rawh se, a kawmthlangpa takngial pawhin a chhawr chuang lovang.

Mahni nun han inen lêt a, tumah va chhiar tlâk awm bik lo rau rau zingah, khawtlang kaihruaitu ni tura inring tawk, ‘kei hian ram leh hnam, kan khawtlang hi ka hmangaih a, ka enkawl duh e’ ti a, inpe ta hlir zingah pawh a tha tha kan thlan in nih avangin, tun atang hian en bik leh ngaihven in niin, mipuiin kan chhiar tan dawn che u a ni. Kan khua, kan veng tana hma tâwng tur, kan ai awha ding zel tur in nih hriain, in lakah beiseina sang tak kan nei a, kan ring tawk che u.

Pawimawh em em mai chu, hruaitu anga tun dinhmun in chelh mek kha, lalna leh thu neihna, hausakna leh hnam rûn vela tlâktlumna lam ni lovin, rawngbawlna ropui tak a ni a, Pathian leh kan ram tan pên chhuak in ni tih hriat hi a ni. Mipui rawngbawltu, mipui tana thawktu tlâwm tak mai in nihna leh, kan ai awh tura Pathian thlan chhuah, mi bîk in nih avangin, chhiahhlawh ni chunga lal lukhum khum in nihna chen a awm dawn. Huan enkawltu taima takin, chauh pawh sawi lova uluk taka a huan a enkawl ang mai hian, hah leh rim takin in huan thlâite min enkawl dawn a ni tih in hriat fo hi thil pawimawh em em mai chu a ni. Chutiang tur chuan in mite hian kan ring tawk che u!

Kan ram hruaitute hian tuna kan dinhmun mai ni lo, kan thlahte thlah leh chhâwng thlenga kan hma lam hun tur in duang a, in siam a ni a. Kan hruaitu ten kan vengah dikna leh rinawmna, ram leh hnam hmangaihna ziarâng min chhawp chhuahsak na na na chuan, vêng chhung atangin khawtlângah, khawtlâng atangin ram pumah darhin, kan tu leh fate lo la piang leh zel turte luah tur ram hi tih tak zetin vei hlawm ila, chhuang taka an luah tlâk ram i hnutchhiah hrám ang u. Chuti a lo nih chuan, hnam tang rual, hnam zahawm leh belhchian dâwl kan lo ni ang a, hê hnam tlêm tê hi kan dam khawchhuak ngei ngei ang. In kutah kan awm a, kan ring cheu a nia.

Mipui lam chan:
Sawiselna leh inchirhthehna ringawt hian ram a siam tha mawh khawp mai. Kan duh taka kan thlan tlinte an ni chunga kan duh thu an lo sâm lo palh a nih pawhin, an tihdik loh leh khap sual palh hlir hmuhsak hi kan tih tur a ni lo ve. An mawhphurhna sànzia te, an hahzia leh kan rawng bâwl reng renga hmanhlel an nih hi i nghilh bik suh ang u khai. Chu ai chuan, kan theihna kawng kawngah pùi ve zawk ila, remna leh hmangaihna tan rualpuiin, ram leh hnam siam that nan hian ti tur bik, mawhphurtu bik an awm angah ngai tlat lo ila, ngaihtuahna hrisel tak nen i lo thlâwp zawk ang u khai.

Mahni party candidate ni lo, party dang ticket-a tling ta te emaw, independent candidate te an nih avanga lo sîr melh hrú mai te, sawisel thlâkzen te hi sim teh ang u. Party feelings tihnat lutuk leh, a mimal taka duhsak loh zawng an nih avanga an tlin lohna sawi leh, tihlan chiam mai te hi sim tel bawk teh ang u, a hnam phatsan zia riau a nia. Han in-candidate ve chiah mah teh, i tling kher emaw chu! Kan vai hian kan neihchhun ram zîm tê hi, hmangaih takin enkawl tlâng zawk ang u hmiang?!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy