Mizoram sawhthing hmun leh khawvel market chu thlunzawm tumin sawrkarin a buaipui mek tih chief minister Lalduhoma chuan a sawi. Mizo Ginger USP Mission Project chungchang leh NCEL Ginger Export Awareness bakah Arhar dal, chhawhchhi leh nihawia price support scheme chungchanga inhrilhfiahna chu Thawhlehni khan neih a ni a. Hmanpuitu chief minister chuan, Mizoram sawrkarin thlai thar pangaa minimum support price a pek hnuah sawrkar laipui kaltlangin thlai pathumah an pe leh dawn tih sawiin, “Loneitute tan khua a var mek,” a ti.
Budget-a thlai thar leina an dahah sawhthing chu a hmanna tam ber a ni a, a thar pawh kan thar tam tih a sawi. Mizoram sawhthing hi a tè deuh nain a quality a tha bik hle a, damdawia hman tlak (pharma grade) a tling a. A pulunga hralh ringawt hian a tlawmin a hlawk tawk loa, sawngbawl hnu ngeia hralh a hlawk, tiin, “A chinna lamah tuna kan kal dan ang renga kan kal chuan kan leilungin a chhiatpui dawn si a. Dinhmun duhawm zawka kan din theihnan hma thar kan la ta a ni,” a ti.
Ministry of DoNER kaltlangin sawhthing chu ‘Unique Selling Proposition’ ah an puang a. Sustainable Cultivation & Post Harvest Management Project an siam a. Post harvest management atan bik DoNER hian cheng vaibelchhe 30.13 pe in, sawhthing thar tam ber district Champhai district-ah pilot project angin processing unit changtlung tak pali an din mek a. Sawhthing chingtu chhungkaw 20000 in an chhawr tangkai turah an ngai a, a process-na lamah hna thar 100 vel a siam dawn bawk tih a sawi.
“Champhai district-a kan hlawhtlin phawt chuan district danga kalpui zelna tur sum pawh DoNER hian min pek a inhuam a ni,” a ti.
Mizoram sawhthing khawvel huapa thehlar an tum dawn a, a quality that bikna, GI tag a nih tawhna behchhanin sawhthing oil leh thildang hlu tak tak siamchhuah an tum a. India ram leh khawvel ram danga a thawnchhuah dan inzirtir tan a tul tih tih a sawi.
“Chutiang min zirtir tur chuan National Co-operative Exports Limited tluka tha an awm chuang lo. An ni hi chah chhuakin sawhthing export dan tur kan zirho dawn a. Kan sawhthing hmun leh global market thlunzawm kan tum tan dawn a ni,” Lalduhoma hian a ti.
Sawrkar laipui hian kumin atan PM- AASHA hnuaia Price Support Scheme a siam chu Mizorama kan thlai chin – Arhar dal, nihawichi leh chhawhchhi ah kumin atangin kalpui ve tum a ni a. National Agricultural Cooperative Marketing Federation of India-in a leisak anga, Mizoram Agricultural Marketing Board nen an thawkdun anga, collection centre an siam dawn tih a sawi bawk.
“Minimum support price aia sanga hralhna hria chuan an hralh zel thei a, support price scheme hi inphuartir loh tur a ni. He scheme kaltlanga hralh chu direct benefit transfer hmangin an account-ah pawisa thun zel a ni anga, middleman an awm lo ang,” a ti.
Kan sawhthing hmun leh global market thlunzawm kan tum tan: – Chief minister
