President Donald Trump-a chuan US-in ‘na takin’ Iran an kap leh tih sawiin tun tuma an beihna hi tun hnaia US sipai, Jordan-a pahnih leh Iraq-a pakhat thite ‘chawimawi nan’ an tih a nih thu a sawi.
Thawhtanni zing hma takah khan US Central Command (Centcom) chuan ‘thawh tharin’ a zawna zan kua nan an kap tih sawiin Iran hmun hrang hrangah thil puak ri hriat tur a awm.
US chuan sipai hmun leh inbiakpawhna hmunte chu Tehran-in Strait of Hormuz-a lawngte a beih thin ‘tihnep nan’ an kap tih an sawi.
Iran pawhin a chhan let nan Syria leh Jordan-a Aqaba thlawhna tumhmuna US thlawhna ‘an bei thut’ tih an sawi ve bawk.
Kuwait-a sipaite pawhin Iranian drone-te an lo kap thla tih an sawi bawk.
US-in a kah chungchangah Iran-a Tasnim news agency chuan Tabriz, Chabahar, Konarak, Bandar Mahshahr leh Bandar Imam Khomeini telin khawpui hrang hrang kah a ni tih an sawi.
Iranian sorkar chanchinbu chuan strait kân tum tuialhthei phur lawng pahnih a puak tih an tar lang bawk.
Islamic Revolutionary Guard Corps (IRGC) chuan tanker-te hi strait ‘chhim lam kawnga a him lo leh hlauhawm lai’ zawhin ‘a puak a, an din phah’ tiin a sawi a. Centcom chuan hei hi a pawm lo thung.
IRGC chuan US-in a kah chhunzawm reng avang leh anni pawhin ‘awmze neia an chhan’ ve zel avangin strait hi ‘petrochemical product te, tuialhthei leh boruakalhthei’ kal nan a him lo tih a sawi.
Kartawpah khan US chuan Iranian-ten Inrinnia Iraq hmar lam an beihnaah an sipai pakhat a thi tih an sawi.
A hma ni chiah khan Jordan-ah US sipai pahnih thiin pakhat chin hriat loh a lo ni tawh a. US chuan ‘finfiah loh ruang’ hmuh a nih thu leh tunge hriat tuma hma lak mek a ni tih a sawi.
Kartawpa US leh Iran an inkah chhunzawm zel lai hian US Secretary of State Marco Rubio-a chuan US chu ‘palai hmanga chin felna dap turin a la inhawng reng’ tih a sawi.
Rubio-a hian Iran kutah ‘khawvel tuikawng pawimawh chu a awm dawn nge dawn lo’ tihah khawvel chuan thutlukna a siam dawn tih sawiin Tehran chuan tuikawng hi dik lo taka thunun a tum tih a sawi.
Ram pahnihte hian June thla laihawl khan inkahhai siam turin inremna an siam a, inkahhai chhungin indona titawp tura inbiak turin thu an dah a; mahse, bawhchhiaa inpuhin an inkap zui a, July 8 khan Trump-a chuan inremna chu ‘a tawp’ tih a puang zui a ni.
Kan sipai thite chawimawi nan Iran kan kap – Trump
