Rev. Dr. Zaichhawna Hlawndo
Thuziak (Article) thupui pangngai ‘Kan thlahtu tobul ka chui chhuah dan’ tih hmangin kan la chhunzawm leh dâwn a ni. Tun tumah chuan kan pi leh puten an lo chenna ram, an pian leh murna khua leh tui an chhuahsan dan te kan chhui ang. Engvanga chhuah san nge an nih a, an chungah enge lo thleng a, enge an tih sual, khawiah nge an kal bo tak? tihte kan ziak dawn a ni. Kan thlahtu tobul lo chhui tawh te khan China rama kan awm thu leh chuta tanga kan thlang tlâk thu chiah an ziak a. China mi leh sa ni si lo, China rama kan lo awm tak dan hi tuman chiang takin an la ziak ngai lo. He kan thlahtu tobul kan lo hriat lohna avang hian kan chanchin pawh kan lo chhui chiang thei lo a, tunah chuan Lalpa Pathianin kan nihna dik tak min hriattir thu ka dawn te, kum sang 3000 dâwn kan bo hnuah tuna kan chênna rama kan lo awm dân te pawh kan la ziak zêl dâwn a ni.
1. ISRAEL LAL RAM A PHEL: Bible-ah chiang taka kan hmuh angin Israel chhungkua chu Pathian thuthlung bawhchhiatna avangin a keh chhia a. Davida fapa Solomona khan a nupuite milem biak pathian te a biak avangin Lalpa a thinur em em a, a lal ram chu thiah sak a lo tum tawh a (1 Lalte 11:11-13, 29-39) . A fapa Rehoboama’n a thlak hnu khan chu chu a takin a lo thleng ta a. Rehoboama chuan Israel hmar lam mite lungawi lo nena remna a siam duh loh avangin Israel lal ram chu a lo phel ta. Solomona fapa Rehoboama chuan chhim lam changin Juda leh Benjamin hnam te chungah ro a rêl a. Jeroboama (Ephraim) hnama mi, Zosefa tupa chuan hmar lam ram changin Israel hnam 10 te chungah ro a rêl ta a ni. Chhim lam ram chu Judai ram emaw Juda chhungkua (House of Judah) tih a ni a, hmar lam ram chu Israel ram, Samari ram emaw Israel chhungkua (House of Israel) tih a ni. He lal ram lo phel dan chipchiar tak hi Bible-ah Lalte leh Roreltute bu-ah a chuang.
2. KAN PU JEROBOAMA BAWHCHHIATNA CHU:
Jeroboama, Ephraim hnam, Zosefa tupa lalah a lo thut a, Israel hnam 10 te chunga ro a rêl tâkah chuan a mite chu Jerusalem Temple-a kal a remti ta lo. Solomona Temple awmna Jerusalem kha an ram chhung a ni lova, Jerusalem a an kal fo chuan Rehoboama lamah an rilru an pe ang a, an hel ang a, amah pawh an that mai ang tih a hlau va. Tichuan a mite biak tur maicham Sebawng no lim rangkachakin a siam a, Bethel-ah leh Dan ah a dah a. Mipuite hnenah chuan ‘ Hei hi in pathian Aigupta ram atnga sala ta hruaichhuaktu che u kha a ni tiin a biak tir ta a ni (1 Lalte 12:26- 29). Lalpa Pathianin Mosia hnena thusawm pek Sinai tlanga a hlan zinga a hmasa leh pawimawh ‘ Keimah lo chu Pathian dang i nei tur a ni lo’ Milem siamchawp I be tur a ni lo tihte chu an lo bawhchhe ta a ni. Jeroboama hnu a Israel lal 18 te khan chu milem pathian chu be chhunzawm zelin Israel mipuite pawh chuan Israel te Pathian be lovin milem pathian chu an be chhunzawm ta zel a ni. Chu an bawhchhiatna avang chuan Lalpa thinur vawrhtâwp an tawngbaw ta a ni.
3. PATHIANIN ISRAEL CHHUNGKUA A MÂK THU A PUANG:
Kan pi leh puten Pathian thuthlung an bawhchhia a, Lalpa Pathian an uiresan tak avang chuan amah pawhin an thuawiloh rah seng turin thutlukna a siam ta a. Amah an kalsan angin a kalsan ve tawh dâwn a, a khawngaih tawh dâwn lova, an Pathian nih pawh a duh tawh dâwn lo. An awmna ram a pêk Samari ram ata pawh a hnawt chhuak tawh dawn a ni tih Zawlnei Hosea hmangin a puang ta a ni (Hosea 1: 1-9). Hosea chu Lalpan a miten nawhchi an zawrh san angin nawhchizuar Gomeri nupuiah a neih tir a, a fa hrin hmasak ber hmingah chuan Jezreel tih hming a vuah a, chumi awmzia chu ‘ kalsan’ tihna a ni. A mi Israel ten an kalsan hmasak avanga a kalsan ve tur entirna a ni. A fa pahnihna hmingah chuan ‘Lo-Ruhama’ tih hming a phuah a, chumi awmzia chu ‘Khawngaihhlawhlovi’ tihna a ni. Pathian thu an awih loh avangin ani pawhin a khawngaih tawh dawn lo tihna a ni. A fa pathumna hmingah chuan Lo-Amia tih a phuah leh a, chumi awmzia chu ‘Duhtawhlovi’ tihna a ni. Lalpa pathian an duh lova, milem pathian biak an duh zawk avangin Lalpa Pathian pawhin an Pathian nih kha a duh tawh bik dawn lo tihna a ni.
4. PATHIANIN AN CHÊNNA RAM ATA A HNAWT CHHUAK: Kan pi leh pute chuan Pathian thuthlung an bawhchhiat tak avang chuan Pathianin khawvel puma thehdarh vek an nih tur thu Zawlnei te hmanga a puan lawk angin BC 722 khan Assuria Sawrkarin an run a, salah an hruai ta vek a, khawvel ram dang dangah an darh ta vek a ni. 2 Lalte 17: 5-6 ‘Tichuan, Assuria lal chuan ram zawng zawng chu a hrût chhuak vek a, Samari khuaah a han chho va, kum thum a hual a. Hosea kum kua a lal kum chuan Assuria lal chuan Samari khua chu a la a, Israel-hote chu Assuria ramah a hruai a, Hala ramah te, Gozan rama Habor luiah te, Media-ho khuaahte a awmtîr a. An chenna Samari ram (Israel ram) luah turin Assuria ram atangin Jentail te a thawn lut ta a ni. 2Lalte 17:24 ‘Tin, Assuria lalin Babulon khuaa mite, Kutha khuaa mite, Ava khuaa mite, Hamath khuaa mite, Sepharvaim khuaa mite a chah chhuak a, Samari ram khuaahte chuan Israela thlahte hmun a luahtîr a; tichuan, Samari ram chu an luah a, a khuaahte chuan an awm ta a. Lal Isua khawvela a lo kal lai pawh khan kan pi leh pute chu Samari ramah an lo awm tawh lo .
5. ISRAEL TE AN BO, JUDATE AN BO LO:
Khawvel ram hrang hrang a Pathian thu zirmi (Theologian) te hian Israel tih hi an sawi pawlhin an hriatpawlh tlat a, chu chu kan buaina a ni. Keini pawh hian Israel tih hian tuna Judate khu emaw kan ti tlat thin. Tuna Israel ram kan tih luah chhunzawm zeltute khu Jakoba fate nimahsela Juda chhungkua an ni a, a ram hmingah Israel tih pu mahsela anmahni chuan Judate kan ni an ti a, Israel mi angin an insawi ngai lo. Israel nihna hmingputute hnam 10 te kha an bo hlen a, khawvelah an darh ta vek a, amah kan Lalpa Isua Krista-in rawn zawng chhuak lehin tuna Kristian ram leh hnam anga inchhal tate hi Israel hnam 10 bo, khawvela darh tate thlah kal zelte nia inchhuite an ni. Chu Israel hnam 10 bo zingah a hnam nihna kengkawhtu Lalna leh puithiam hna vuan kawptu chu kan pu Zosefa thlah kal zelte hi kan ni. A mei lam ni lovin a lu lam kan nih tlat avangin hnam anga tundin lehna tura hma hruaitu, bul tantu tur kan ni tihna a nih chu. Vawiin thlengin chu Israel hnam bote chu hnam angin din thar leh tun din leh kan la ni rih lo.
(Note: Zofate zin kawng -Assuria ram atnga tuna kan chenna rama kan luh dan te kan rawn ziak leh ang).