Daily Newspaper

Kan ti ta sa sa…

11

Mizoram sawrkarin December ni 1, 2020 atanga January ni 10, 2021 thleng “COVID-19 No Tolerance Drive” a puang a. No Tolerance Drive puan a nih hnuah hri kai thar a tlahniam a, chutih laiin tualchhung atanga hri inkai chhawng erawh a pung ve thung a. Inkhuahkhirhna kalpui kawngah sawrkar leh mipui inthlahdul a rem lo tih chiang takin a lang thei awm e.

Kan hriat angin India ram hmun thenkhatah hun pui an hman laiin hri inkaidarh a hluar phah zel tih kan hmu tawh a. Keini Kristiante pawhin hun pui kan hmachhawn mek a ni a. He hun pui kan hman kawngah hian, hri kai a tlakhniam tak avanga ngaihthaa inthlahdah phah nana kan hman hlauh chuan, kumin kumtir atanga theihtawp kan lo chhuah tawhna zawng zawng kha awmze nei lovin kan chhuah der thei tih kan hriat tlan a pawimawh takzet a ni.

Khawpui ber Aizawl hi, mihring tamna ber a nih angin leh, sumdawnna hmunpui, hmun hrang hrang atanga lut leh chhuak tamna a nih bawk avangin, hri inkaidarh a awlsam lehzual a, hri kai pawh an bukna ber a ni.

Kum dang ang bawkin, krismas leh kumthar vuakvet hi, thingtlang khua atanga eizawnna avanga Aizawl khawpuia awmten mahni khaw lam an pan hun, haw runpui lai a nih avangin, mahni khaw lam pan tura inbuatsaih mekten tunhnai khan buaina an han nei deuh hman a. Khawpui atanga haw turte ‘Covid free Certificate’ lo phut te pawh an awm hman hial a ni awm e. Hei hi sawrkar thuneituten sawrkar thuchhuak ni lo, mahni khaw bil emaw kalphung hranpa siam lo tura thu a chhuah avangin, hetiang lama harsatna hi chu thleng zui lo tura beisei a ni.

Aizawl atanga mahni khaw lama haw turte pawh hian, hri kai tamna khawpui atanga haw tur an nih avangin an fimkhur thiam ang tih a rinawm a, sawrkar inkaihhruaina dinglai pel deuhva kal a tulna chhan tur awm lo turah a ngaih theih awm e.

Kan ti ta sa sa, tuna kan tawrhna hi nakin zela kan himna leh hlimna tur zawk a ni ang tih ring leh beisei chungin, khuahkhirhna dan pela khawsa fal lo turin leh, inthlahdah lova, fimkhur hi damdawi tha ber a ni tih hi thuvawna nei bur turin mipuite i inbuatsaih sauh sauh ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy